မတ်-၂၃၊၂၀၂၆။ အိမ်သွင်/People’s Spring
စစ်ကိုင်းတိုင်း၊ အရာတော်နဲ့ မြင်းမူမြို့နယ်စပ်ဒေသတွေကို စစ်တပ်က ပစ်မှတ်ထား ဗုံးကြဲနေပြီး မတ်လ ၂၂ရက် တစ်ရက်တည်းမှာ ဂျက်ဖိုက်တာအပြင် Gyrocopter(စက်တပ်လေထီး)နဲ့ပါ ဗုံးကြဲလို့ ကလေးငယ်နဲ့ အမျိုးသမီးနှစ်ဦးအပါအဝင် ဒေသခံ ၁၁ဦး သေဆုံးခဲ့တယ်လို့ သိရပါတယ်။
မတ်လ ၂၂ရက်က အရာတော်မြို့နယ်ထဲက မင်းရွာကြီးစံပြကျေးရွာနဲ့ ကငကင်းကျေးရွာပတ်ဝန်းကျင်ကို စစ်တပ်က လေကြောင်းကနေ ဗုံးကြဲခဲ့တာဖြစ်ပါတယ်။
” တစ်နေရာကို ကြဲတာ ကလေးတစ်ယောက်၊ အမျိုးသမီးနှစ်ယောက်နဲ့ အမျိုးသား သုံးယောက်ဆုံးတယ်။ နောက်တစ်နေရာက အမျိုးသား ငါးယောက်ဆုံးတယ်။ မြေပြင်မှာ စစ်ကြောင်းမရှိဘူး။ လေကြောင်းကနေ ချနေတာ။ ဒီနေ့အထိလည်း ဆူဆိုက်ဒရုန်းတွေသုံးပြီး ကြဲနေလို့ ရှောင်နေကြရတယ်”လို့ ဒေသခံတစ်ဦးက ပြောပါတယ်။
Public Service Announcement
စစ်တပ်က ဂျက်ဖိုက်တာသုံးပြီး ဗုံးကြဲတာမှာ တစ်ပြိုင်နက် နှစ်စီး၊ သုံးစီးသုံးလာတယ်လို့ ဒေသခံတွေကပြောပါတယ်။ ယခုရက်ပိုင်း ဗုံးကြဲတဲ့နေရာတွေဟာ အရာတော်မြို့ရဲ့ အနောက်တောင်ပိုင်း၊ အရာတော်နဲ့ မြင်းမူမြို့နယ်စပ်ဒေသတွေ ဖြစ်ပါတယ်။
ဒေသခံတွေအနေနဲ့ ဗုံးခိုကျင်းတွေ အခိုင်အမာတည်ဆောက်ဖို့နဲ့ လေကြောင်းသတင်းတွေ စောင့်ကြည့်ဖို့ ကာကွယ်ရေးရဲဘော်တွေက သတိပေးထားပါတယ်။
စစ်တပ်က ယခုရက်ပိုင်းမှာ စစ်ကိုင်းတိုင်းက ကသာ၊ ကျွန်းလှ၊ ကနီ၊ မြောင်မြို့နယ်တွေကိုလည်း လေကြောင်းကနေ ဗုံးကြဲနေပါတယ်။ဗုံးကြဲတဲ့ပုံစံလည်းပြောင်းလဲသွားပြီး တစ်နေရာတည်းကို ဂျက်ဖိုက်တာနဲ့ဗုံးကြဲပြီး ရော့ကတ်နဲ့ပါ ပစ်ခတ်ခဲ့တယ်လို့ ဒေသခံတွေကပြေညပါတယ်။
မတ်လ ၂၁ရက် နေ့လည်ပိုင်းမှာ ကနီမြို့၊ ဆူးလေကုန်းရွာက ဘုန်းကြီးကျောင်းနဲ့ စာသင်ကျောင်းကို စစ်တပ် ကဂျက်ဖိုက်တာ ၇စီးနဲ့ ဗုံးကြဲလို့ သံဃာတော်တွေနဲ့ အရပ်သားတွေ ထိခိုက်သေဆုံးမှုရှိခဲ့ပါတယ်။
မတ်လ ၁၅ရက် ညနေကလည်း ကျွန်းလှမြို့နယ်၊ သဖန်းဆိပ်ဆည်ထဲက ဒေသခံတွေ တူးဖော်နေတဲ့ တပိုင်တမိုင်ရွှေမျှောတွေကို စစ်တပ်က လေကြောင်းကနေ တိုက်ခိုက်လို့ ဒေသခံ ၁၃ဦး သေဆုံးပြီး ဒဏ်ရာအပြင်းအထန်ရသူတွေနဲ့ ပျောက်ဆုံးနေသူတွေလည်းရှိတယ်လို့သတင်းရရှိပါတယ်။
မတ်လ ၂၃ရက် နေ့လယ်ပိုင်းမှာလည်း မြောင်မြို့နယ် သောင်ကြီးရွာကို စစ်ကောင်စီက လေကြောင်းကနေ ဗုံးကြဲလို့ ဒေသခံငါးဦး သေဆုံးပြီး ဆယ်ဦးထက်မနည်း ဒဏ်ရာရထားတယ်လို့ မြောင်မြို့နယ်အခြေစိုက်အဖွဲ့ CDSOM တပ်ဖွဲ့က သတင်းထုတ်ပြန်ထားပါတယ်။ မတ်လ၂၀ရက်နေ့က ကသာမြို့ကို ဗုံးကြဲလို့ လူ၈၀ထက်မနည်းသေဆုံးခဲ့သလို ဒီနေ့လည်း Y12 လေယာဉ်နဲ့ ဗုံး ၇၂လုံးကြဲသွားတယ်လို့ ဒေသခံသတင်းရင်းမြစ်တွေကပြောပါတယ်။ ကသာမြို့မှာ တိုက်ပွဲဖြစ်နေပြီး စစ်တပ်က တိုက်ပွဲနေရာနဲ့ မသက်ဆိုင်တဲ့ မြို့ထဲနေရာတွေကို ဗုံးကြဲနေတာလို့ ဆိုပါတယ်။
