မေ ၄၊၂၀၂၅။Scorpio/People’s Spring
မန္တလေးမြို့မှာ ငလျင်ထိထားတဲ့ ၈ထပ်တိုက်တလုံး ပြိုကျခဲ့တယ်လို့ မြို့ခံတွေက ပြောပါတယ်။
ဒီကနေ့ မေလ ၄ရက် နေ့လယ်ပိုင်းက မန္တလေးမြို့၊ ၁၅လမ်း၊ ၈၂ A လမ်းထောင့်က ၈ထပ်တိုက်တစ်လုံးဟာ ပြိုကျလာပြီး အောက်ဆုံးနှစ်ထပ် မြုပ်သွားတယ်လို့ ဒေသခံတွေက ပြောပါတယ်။
“နှစ်ထပ်မြုပ်သွားတာ။ ငလျင်ထပ်လှုပ်တယ် ထင်ပြီး ပြေးရသေးတယ်။”လို့ ရပ်ကွက်ခံတစ်ဦးက ပြောပါတယ်။
Public Service Announcement
လူမနေတော့လို့ လူထိခိုက်မှုမရှိဘူးလို့ ရပ်ကွက်ခံတွေက ပြောပါတယ်။ အဲဒီတိုက်ရဲ့ ပတ်ဝန်းကျင် အိမ်တွေ ထိခိုက်မှုရှိနိုင်လို့ လိုအပ်တာတွေ ပြုလုပ်ပေးနေတယ်လို့ မြန်မာနိုင်ငံလူမှုကယ်ဆယ်ရေးအဖွဲ့ – မန္တလေးတိုင်းဒေသကြီး ကော်မတီက အသိပေးပါတယ်။
မန္တလေးမြို့မှာ နှစ်ရက်လောက် မိုးကောင်းနေခဲ့တာကြောင့် ပြိုကျခဲ့တာဖြစ်နိုင်ပြီး ဒီတိုက်လိုမျိုး ပြိုကျနိုင်တဲ့တိုက်တွေ အများအပြားရှိနေတယ်လို့ မြို့ခံတွေက ပြောပါတယ်။
ပြီးခဲ့တဲ့ ဧပြီလဆန်းပိုင်းကလည်း မန္တလေးမြို့မှာ မိုးသည်းထန်စွာ ရွာသွန်းလို့ ငလျင်ထိထားတဲ့တိုက် ၃လုံးထက်မနည်း ပြိုကျခဲ့ပါသေးတယ်။
မန္တလေးမြို့မှာ ငလျင်ကြောင့် ပြိုကျခဲ့တဲ့အဆောက်အဦးလေးထောင်ကျော်ရှိပြီး တစ်လကျော်တဲ့အထိ ရှင်းလင်းနိုင်ခြင်းမရှိသေးဘူးလို့ မြို့ခံကယ်ဆယ်ရေးအဖွဲ့တွေထံကနေ သိရပါတယ်။
