မေ ၁၆၊၂၀၂၅။ရဲခေါင်/People’s Spring
မန္တလေးတိုင်း၊ကျောက်ပန်းတောင်းမြို့နယ်ရှိ လေးပင်တောင်ကျေးရွာကို စစ်ကောင်စီ လေကြောင်းမှ ဗုံးကြဲတိုက်ခိုက်ရာ မီးနေသည် အမျိုးသမီးနှင့် ခင်ပွန်းဖြစ်သူအပါအဝင် လေးဦးသေဆုံးခဲ့ကြောင်း ဒေသခံသတင်းရင်းမြစ်အချို့က ပြောသည်။
လေးပင်တောင်ကျေးရွာကို မေလ ၁၄ရက် နံနက် ၉နာရီ ၁၅မိနစ်နှင့် နေ့လယ် ၂နာရီ ၁၇မိနစ်ခန့်က ဂျက်ဖိုက်တာဖြင့် ပေါင် ၂၀၀ဗုံး လေးလုံးကြဲခဲ့ခြင်းဟု ဆိုသည်။
” ချောင်းထဲကို နှစ်လုံးကျတယ်။နေအိမ်တွေပေါ်ကျတာက သေဆုံးတာတွေ ဖြစ်သွားတယ်။စုစုပေါင်းလေးဦး အမျိုးသမီးသုံးဦးနဲ့ရအမျိုးသားတစ်ဦးပါ။အိမ်က လေးငါးအိမ် လောက်ပျက်သွားတယ်”ဟု ကျောက်ပန်းတောင်းမြို့ခံသတင်းရင်းမြစ်က လူထုနွေဦးသို့ ပြောသည်။
Public Service Announcement
လေးပင်တောင်ရွာဖြစ်စဥ်သည် မည်သည့်တိုက်ပွဲမှမရှိဘဲ အကြောင်းမဲ့ဗုံးကြဲခံရခြင်းဖြစ်ကာ ပြည်သူများ သေဆုံးခဲ့ရကြောင်း ပုပ္ပါးပြောက်ကျားတပ်(PPGF)တာဝန်ခံ ကိုဗျတ္တက ပြောသည်။
သေဆုံးသူများသည် မီးနေသည် မဝင်းသူဇာနှင့် ၎င်း၏ ခင်ပွန်းဖြစ်သူ ကိုဝင်းထွေး၊ ဒေါ်မြင့် မြင့်ဝေနှင့် ဒေါ်ဝင်းကြည်တို့ဖြစ်သည်။ သို့သော် မွေးကင်းစကလေးဖြစ်သူမှာ ကြီးမားသည့်ထိခိုက်မှုမရှိခဲ့ကြောင်းသိရသည်။
ဧပြီ ၂၆ရက်က ကျောက်ပန်းတောင်းမြို့နယ်သို့စစ်ကြောင်းထိုးခဲ့သည့် စစ်ကောင်စီတပ် စစ်ကြောင်းအား တော်လှန်ရေးတပ်များက ထောက်ရှာကျေးရွာအနီး ကြားဖြတ်တိုက်ခိုက်မှုကြောင့် စစ်ကောင်စီတပ်မှ သေဆုံးသူများနှင့် ဖမ်းဆီးရခံရသူ နှစ်ဦးရှိကာ လက်နက်ခဲယမ်းအချို့ သိမ်းရခဲ့သည်။
