အပစ်ရပ်ထားသည်ဆိုသည့်စစ်ကောင်စီတပ်က ရှမ်းပြည်နယ်မြောက်၊ နောင်ချိုမြို့နယ် အုမ္မသီးကျေးရွာကို လေကြောင်းမှ ဗုံးကြဲတိုက်ခိုက်ခဲ့ကြောင်း တအာင်းတပ်မတော် (TNLA)က ထုတ်ပြန်သည်။
ယနေ့(မေလ ၂၂ရက်) နေ့လည်ပိုင်း ၁၂နာရီခန့်တွင် စစ်ကောင်စီက ဂျက်ဖိုက်တာဖြင့် ဗုံးလေးလုံးကြဲ တိုက်ခိုက်ခဲ့ခြင်းဟု TNLAက ထုတ်ပြန်သည်။
စစ်ကောင်စီသည် မေလ ၂၀ရက် ညနေပိုင်းကလည်း PSLF/TNLAအုပ်ချုပ်သော နောင်ချိုမြို့နယ်၊ ဟိုခိုကျေးရွာကို တိုက်ပွဲဖြစ်ပွားခြင်းမရှိဘဲ လေကြောင်းမှ ဗုံးကြဲချခဲ့သည်။ အဆိုပါဗုံးကြောင့် ဒေသခံပြည်သူ၏ နေအိမ်တစ်လုံး ထိမှန်ပျက်စီးဆုံးရှုံးခဲ့သည်။
Public Service Announcement
ပြီးခဲ့သည့် မေလ ၁၈ရက်လည်း နောင်ချိုမြို့နယ်၊ ဒိုးပင်အုပ်စု၊ ရတနာသင်္ဂီကျေးရွာအနီးကိုလည်း ပေါင်(၂၅ဝ)ဗုံး ခြောက်လုံးကြဲချတိုက်ခိုက်ခဲ့သေးသည်။
ထို့အပြင် မေလ ၁၁ရက်က နောင်ချိုမြို့နယ်အတွင်းရှိ ရှဲဆန်သတ္တုကုမ္မဏီအား တိုက်လေယာဉ်ဖြင့် ပေါင် (၅ဝဝ)ဗုံး နှစ်လုံးကြဲချတိုက်ခိုက်မှုတွင် ကုမ္မဏီအသုံးပြုနေသော ဘတ်ဖိုး တစ်စီး၊ သတ္တုထုတ်စက် တစ်လုံး၊ စက်ပစ္စည်းများထားရှိသောဂိုဒေါင် တစ်လုံးနှင့် အခြားသောပစ္စည်းများစွာ ထိမှန်ပျက်စီးခဲ့ပြီး စုစုပေါင်းကာလတန်ဖိုး တရုတ်ငွေ ၁၆၈ဝဝဝဝယွမ် ပျက်စီးဆုံးရှုံးခဲ့ဟု TNLAက အသိပေးထားသည်။
တရုတ်အစိုးရကြားဝင်မှုဖြင့် စစ်ကောင်စီနှင့် TNLAအကြား အပစ်ရပ်စဲရေး ဆွေးနွေးအပြီး စစ်ကောင်စီက နောင်ချိုအပါအဝင် TNLA ထိန်းချုပ်မြို့ရွာများကို လေကြောင်း ဗုံးကြဲတိုက်ခိုက်မှုများ ဆက်တိုက်ပြုလုပ်နေခြင်းဖြစ်သည်။
နောင်ချို၊ မိုးကုတ်၊ ကျောက်မဲ၊ မိုင်းငေါ့ ၊ မန်တုံမြို့နယ်များကို စစ်ကောင်စီက လေကြောင်း တိုက်ခိုက်ခဲ့သည့်အပြင် ဒရုန်းဖြင့် တိုက်ခိုက်မှုများ လုပ်ဆောင်ခဲ့၍ ပြည်သူ သေဆုံးထိခိုက်မှုများ ရှိခဲ့သည်။
တဖက်တွင် စစ်ကောင်စီက ငလျင်ဘေးအကြောင်းပြပြီး မေလကုန်အထိ အပစ်ရပ်စဲကြောင်း ကြေညာထားသော်လည်း PSLF/TNLA အုပ်ချုပ်သောမြို့နယ်များကို မြေပြင်ထိုးစစ်ဆင်ခြင်း၊ ရည်ရွယ်ချက်ရှိရှိ လက်နက်ကြီးများပစ်ခတ်ခြင်း၊ဒရုန်း၊ လေကြောင်းတို့ဖြင့် နေ့စဉ် တိုက်ခိုက်လျက်ရှိဟု TNLAက အသိပေးသည်။
ထိုကြောင့် ပြည်သူများအနေဖြင့် စစ်ကောင်စီတပ်၏ လေကြောင်း၊ ဒရုန်းနှင့် လက်နက်ကြီး ပစ်ခတ်တိုက်ခိုက်မှုရန်မှ ရှောင်ရှားနိုင်ရန်စစ်ရေးသတိအမြဲရှိရန်လိုအပ်ကြောင်း ထပ်လောင်း အသိပေးထားသည်။
