မေ ၂၄၊၂၀၂၅။မေရီ/People’s Spring
ငလျင်ဘေးဒဏ်သင့် စစ်ကိုင်းမြို့က လူငယ် ၂၀ကျော် စစ်မှုထမ်းဖို့ စစ်ကောင်စီရဲ့ဖမ်းဆီးမှုခံလိုက်ရတယ်လို့ ဒေသခံတွေက ပြောပါတယ်။
ပြီးခဲ့တဲ့ မေလဒုတိယပတ်အတွင်းက စစ်ကိုင်းမြို့အဝင် ရတနာပုံတံတား စစ်ဆေးရေးဂိတ်ကနေ မန္တလေးမြို့ဘက်ကိုသွားမယ့် လူငယ် အယောက် ၂၀ကျော်ကို စစ်မှုထမ်းဖို့ တပ်မ(၃၃)ထဲ ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။
“မနက်ခင်း အလုပ်သွားတဲ့အချိန် တားဖမ်းတာ။ တော်တော်အဖမ်းခံလိုက်ရတယ်။”လို့ စစ်ကိုင်းမြို့ခံတဦးက ပြောပါတယ်။
Public Service Announcement
ငွေကြေးလိုက်နိုင်သူတချို့ကတော့ ကျပ်သိန်း ၂၀၀နီးပါး အကုန်ခံပြီးလိုက်ခဲ့လို့ ပြန်လည်လွတ်မြောက်လာတယ်လို့လည်း ဒေသခံတချို့က ဆိုပါတယ်။
ဒါ့အပြင် အဲဒီရက်ကပဲ ဆီမှောင်ခိုသယ်တဲ့ ပြည်သူ ၂၀နီးပါးကိုလည်း စစ်တပ်က မြို့အဝင်ဂိတ်မှာတင် ဖမ်းဆီးသွားတယ်လို့ ဒေသခံတွေက ပြောပါတယ်။
“ဆီသယ်တဲ့သူတွေကော အကုန်ရောဖမ်းတာ။”လို့ မန္တလေးမြို့ခံတစ်ဦးက ပြောပါတယ်။
ဒါ့အပြင် စစ်ကိုင်းမြို့ထဲမှာလည်း စစ်အုပ်စုက နေရာတွေခွဲပြီး စစ်ဆေးရေးလုပ်ကာ စစ်မှုထမ်းဖို့ ဖမ်းဆီးနေတယ်လို့ မြို့ခံတွေက ပြောပါတယ်။
စစ်ကိုင်းမှာ ငလျင်ဘေးသင့်လို့ ပြည်သူ ၆၀၀ နီးပါးသေဆုံးပြီး ပြိုပျက်နေတဲ့အဆောက်အဦးများလည်း အများအပြားရှိနေကာ အကူအညီတွေလည်း လိုအပ်နေတယ်လို့ သိရပါတယ်။
