ဇွန်-၂၁၊ ၂၀၂၅။ ရဲခေါင်/People’s Spring
မကွေးတိုင်း၊ ဆောနှင့် ပေါက်မြို့နယ်တို့ကို စစ်ကောင်စီ လေကြောင်းမှ ဗုံးကြဲရာ ပျက်ဆီးဆုံးရှုံးမှုများရှိခဲ့သည်။
ယနေ့နံနက် ၆ခွဲခန့်တွင် ဆောမြို့အနီးတစ်နေရာကို တံတားဦး လေတပ်မှတက်လာသည့် Y-12 ဗုံးကြဲလေယာဉ်ဖြင့် ဗုံးသီး သုံးလုံးချ၍ တိုက်ခိုက်ခဲ့သည်ဟု ဆောမြို့ခံအချို့က ဆိုသည်။
ထိုတိုက်ခိုက်မှုကြောင့် ဒေသအခေါ်ပြင်ခြောက်(ဆော-ဆိတ်ဖြူကားလမ်းဘေး)ရှိ ခြံတစ်ခုအတွင်းရှိ သိုလှောင်ထားသည့် ဆီပေပါများကို ထိမှန်ကာ မီးလောင်ပေါက်ကွဲမှုဖြစ်ပွားခဲ့သည်။
Public Service Announcement
“ တိုက်ပွဲဖြစ်ပွားခြင်းမရှိဘဲ အကြောင်းမဲ့လေကြောင်းတိုက်ခိုက်ခဲ့တာ။ ပြည်သူထိခိုက်မှုမရှိခဲ့ပေမယ့် ယာယီတဲတစ်လုံး နဲ့ ဆီပေပါ အလုံး ၈၀ လောက် မီးလောင်ခဲ့တယ်” ဟု ဆောမြို့နယ်သတင်းရင်းမြစ် ကိုအောင်ကြီးက စစ်တပ်၏လေကြောင်းဗုံးကြဲမှုအပြီး ဖြစ်စဥ်ကို ရှင်းပြသည်။
ဗုံးကြဲခံရပြီး ဆုံးရှုံးသွားရသည့် ဆီပေပါများမှာ ပြည်သူပိုင်ဖြစ်ကြောင်း ၎င်းက အသိပေးသည်။
“ သတင်းပေးရှိလို့ လာကြဲသွားတာ။ တော်သေးတယ် လူတွေမထိတာ” ဟု ဆောမြို့ခံတစ်ဦးက ပြောသည်။
ယနေ့ နံနက် ၇ နာရီခန့်တွင်လည်း ဆောမြို့နယ် တပြင်းရွာ အရှေ့ဖက်ရှိ ဒေသအခေါ် ပုံညာနတ်ထိပ် ဝန်းကျင်ကို စစ်ကောင်စီက ဗုံးကြဲခဲ့ကြောင်း သိရသည်။
ထိုလမ်းကြောင်းအတိုင်း ပေါက်မြို့နယ်အနောက် မြောက်ဖက်ခြမ်းရှိ ကာကွယ်ရေးပစ္စည်းစက်ရုံ ကပစ ၂၄ စက်ရုံ အနီးတစ်ဝိုက်ကို ဗုံးခုနှစ်လုံး ကြဲခဲ့ကြောင်း ဒေသတွင်းသတင်းရင်းမြစ်ယောအလင်းတန်းက ထုတ်ပြန်ထားသည်။
ယခင်လ ၁ ရက်က ဆောမြို့နယ် အညာကတင်းကျေးရွာကို စစ်ကောင်စီက လေကြောင်းမှ ဗုံးကြဲတိုက်ခိုက်ရာ ၆နှစ်အရွယ်ကလေးငယ်တစ်ဦးအပါအတင် အမျိုးသမီး ၄ဦး သေဆုံးမှုရှိခဲ့သည်။
