ဇွန်-၂၅၊၂၀၂၅။ရဲခေါင်/People’s Spring
ကရင်နီပြည်နယ်၊ဖားဆောင်းမြို့နယ်၊မော်ချီးဒေသကိုစစ်ကောင်စီက ယနေ့ နံနက်ပိုင်းတွင် လေ ကြောင်းမှ ဗုံးကြဲရာ ခဲလုပ်သားခုနှစ်ဦး သေဆုံးခဲ့ပြီး ပြည်သူ ၄၀ ကျော်ဒဏ်ရာရခဲ့သည်။
စစ်ကောင်စီက ဇွန် ၂၅ ရက်နံနက် ၁၁ နာရီဝန်းကျင်တွင် မော်ချီးဒေသမှလူနေထူထပ်သည့် တောင်ပေါ်ခဲလုပ်ကွက်ပေါ်သို့ ဗုံးကြဲခဲ့ခြင်းကြောင့် ပြည်သူတွေ ထိခိုက်သေဆုံးများခဲ့ရခြင်းဟု ဒေသတွင်းကူညီနေသူအချို့က ပြောသည်။
“ ခဲကျင်း နဲ့ ကုန်စုံဆိုင်ပေါ်ကျတော့ အထိအခိုက်များခဲ့တယ်။တိုက်ပွဲဖြစ်နေတာကဖားဆောင်းဘက်။လာကြဲတာက မော်ချီး။ခဲကျင်းဝင်နေကြတဲ့အချိန် ၊အလုပ်တွေလုပ်နေကြတဲ့အချိန်ဆိုတော့ အထိ အခိုက်များတယ်” ဟု ဖားဆောင်းမြို့ခံတစ်ဦးက ပြောသည်။
Public Service Announcement
စစ်ကောင်စီသည် တိုက်ပွဲ ဖြစ်ပွားသည့်နေရာကို ဗုံးကြဲခြင်းမဟုတ်ဘဲ ပြည်သူများနေထိုင်ရာနေရာကို အကြောင်းမဲ့တိုက်ခိုက်ခြင်းဟု ကရင်နီစစ်ရှောင် အရေးကူညီနေသူတစ်ဦးကလည်းပြောသည်။
“ ဂျက်ဖိုက်တာတွေကရင်နီ(ကယား)ဖက်ကို တောက်လျှောက်လာနေတာမို့ ပြည်သူများစစ်ဘေးရှောင်များလေယာဉ်သံနားစွင့် ဂရုပြုနေထိုင်ကြဖို့ သတိပေးပါရစေ” ဟု ၎င်းကပြောသည်။
လေကြောင်းတိုက်ခိုက်ခံရမှုကြောင့် ထိခိုက်သူများ၏ နောက်ဆက်တွဲအခြေအနေကို ကရင်နီပြည်ကြားကာလအုပ်ချုပ်ရေးကောင်စီထံ လူထုနွေဦးက ဆက်သွယ်မေးမြန်းနေဆဲ ဖြစ်သည်။
ယခုတိုက်ခိုက်မှုအပါအဝင် အာဏာသိမ်းပြီးနောက်ပိုင်း မော်ချီးဒေသကို စစ်ကောင်စီသည် လေကြောင်းတိုက်ခိုက်မှုလေးကြိမ်ထက်မနည်းပြုလုပ်ခဲ့သည်။ထိုသို့တိုက်ခိုက်မှုကြောင့် လသားအရွယ်ကလေးငယ် အပါအဝင် ပြည်သူ ၂၀ ဦးခန့် သေဆုံးခဲ့ရသည်။
ဖားဆောင်းမြို့တွင်ဇွန် ၂၅ ရက်နေ့ကတိုက်ပွဲ ဖြစ် ပွားခဲ့ကြောင်း ကရင်နီစစ်ရေးသတင်းရင်းမြစ်က ဆိုသည်။
၂၀၂၄ ဖေဖော်ဝါရီ ၂၉ရက်တွင်စတင်သည့် ဖားဆောင်းမြို့သိမ်းတိုက်ပွဲအတွင်း စစ်ကောင်စီတပ်စခန်း ၉ ခုနှင့် ကာကင်းနေရာသုံးခုကို ကရင်နီတပ်ပေါင်းစုက သိမ်းပိုက်နိုင်ခဲ့ပြီး အခြေစိုက်တပ် ရင်း(၂)ခု ဖြစ်သော ခလရ(၁၃၄) နှင့် ခလရ (၁၃၅)တပ်ရင်းတို့သာသိမ်းပိုက်ရန် ကျန်ရှိနေခြင်းဖြစ်သည်။
