ဇွန်-၂၇၊၂၀၂၅။ထားမြတ်/People’s Spring
ကချင်လွတ်လပ်ရေးအဖွဲ့/ကချင်လွတ်လပ်ရေးတပ်မတော်(KIO/KIA) ထိန်းချုပ်နယ်မြေအတွင်းရှိ KTV၊ နိုက်ကလပ် နှင့် ဘားများအားလုံးကိုရက်အကန့်အသတ်မရှိပိတ်ပင်ကြောင်း အမိန့်ထုတ်ပြန်လိုက်သည်။
ကချင်ဘာသာဖြင့်ဖော်ပြထားသည့်အဆိုပါအမိန့်စာကိုဇွန်လ၂၂ ရက်နေ့စွဲဖြင့်ထုတ်ပြန်ခဲ့ခြင်းဖြစ်သည်။
“မူးယစ်ဆေးဝါး ပပျောက်နှိမ်နင်းရေးပေါ်လစီအရ ပိတ်တာဖြစ်ပါတယ်” ဟု KIO/KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုသည်။
Public Service Announcement
မူးယစ်ဆေးဝါး ရောင်းဝယ်ဖောက်ကားသူများကို အမြဲတမ်းဖမ်းဆီးနေသကဲ့သို့ KTV၊ နိုက်ကလပ်နှင့် ဘားတို့မှတဆင့်ပေါ်ပေါက်လာနေသည့် မူးယစ်ဆေးနှင့်ဆက်နွယ်သည့် ပြဿနာများ ကိုင်တွယ်နိုင်ရန် ယခုကဲ့သို့ အမိန့်ထုတ်ပြန်ခြင်းဖြစ်သည်ဟုဆိုသည်။
“အခုKTV ၊နိုက်ကလပ်၊ဘားတွေမှာကတော့ မူးယစ်ဆေးဝါးမျိုးစုံပေါ့သူတို့ သုံးစွဲပြီးမှ လူငယ်လူရွယ်တွေ နောက်အိမ်ထောင်သည်တွေက အစ အမျိုးသား၊အမျိုးသမီးတွေအားလုံး အဲဒီမှာ ပျော်ပါးပြီးမှ အကျင့်စာရိတ္တ ပျက်ပြားတာတွေ ငွေရေး၊ ကြေးရေး ပြဿနာပေါ်တာတွေအများကြီးရှိတယ်။ ဒါကြောင့် ကျနော်တို့ ထိန်းသိမ်းနိုင်ဖို့အတွက် အခုလိုမျိုး KTV တို့ နိုက်ကလပ်၊ ဘားတွေကို ပိတ်ခိုင်းတာဖြစ်ပါတယ်” ဟု ဗိုလ်မှူးကြီးနော်ဘူကရှင်းပြသည်။
ရက်အကန့်အသတ်နှင့်ပတ်ခြင်းမျိုးမဟုတ်ဘဲ KIO ထိန်းချုပ် နယ်မြေအားလုံး အတွက် အကျုံးဝင်ကြောင်းလည်း ၎င်းက ဆက်ပြောသည်။
စစ်ကောင်စီ ထိန်းချုပ်ရာ မြို့ကြီးများနှင့် တော်လှန်ရေးအင်အားစုများ ထိန်းချုပ်ရာနယ်မြေအချို့၌လည်း KTV၊ နိုက်ကလပ်၊ ဘား၊ အလုံပိတ် DJခန်း၊ ဟိုင်းခန်း စသည့် အမည်မျိုးစုံဖြင့် နေရာများစွာရှိကြပြီးမူးယစ်ဆေးဝါးမျိုးစုံ ရောင်းဝယ် သုံးစွဲရာနေရာများအဖြစ်ရှိနေသည်။
စစ်တပ်အာဏာသိမ်းပြီးနောက်ပိုင်း ရန်ကုန် ၊မန္တလေး အပါအဝင် စစ်တပ်ထိန်းချုပ်ရာမြို့ကြီးများတွင် KTV ၊ ဘား ၊ကလပ်တို့၌ မူးယစ်ဆေးဝါးပြသာနာပိုကြီးလာပြီး ထိုလုပ်ငန်းများကို စစ်တပ် နှင့်နီးစပ်သူအများစုကလုပ်ကိုင်ကြကြောင်းရန်ကုန်မြို့ရှိ အသက် ၃၅ နှစ်အရွယ် အမျိုးသားတစ်ဦးကပြောသည်။ စစ်ကောင်စီကလည်း လူငယ်များကိုတော်လှန်ရေး ၊နိုင်ငံရေးတွင် စိတ်မဝင်စားစေရန် ထိုနေရာများကို အထူးအခွင့်အရေးပေးသကဲ့သို့ ဖန်တီးပေးထားသောအခြေအနေမှာ မူးယစ်ဆေးပြသာနာများပိုကြီးလာစေသည်ဟုဆိုသည်။စစ်တပ်က၎င်းတို့ထိန်းချုပ်ရာဒေသများမှလူငယ်များကို စစ်မှုထမ်းရန် အဓမ္မစစ်မှုထမ်းစေသော်လည်း KTV ၊ဘား ၊ကလပ် ၊ ရှိုးပွဲများသို့သွားရောက်ပျော်ပါးသူများကိုမူ ပေါ်တာဆွဲခြင်း၊ ဖမ်းဆီးစစ်မှုထမ်းခိုင်းခြင်းမရှိသည်ကိုကြည့်၍စစ်တပ်၏ရည်ရွယ်ချက်ကိုသိနိုင်ကြောင်းအထက်ပါအမျိုးသားကပြောသည်။
