ဇွန်-၂၉၊၂၀၂၅။ဇော်ရမ်း/People’s Spring
ရှမ်းပြည်နယ် မြောက်ပိုင်း၊ကျောက်မဲမြို့ကို စစ်ကောင်စီက ယနေ့ မွန်းလွဲ ၂နာရီခွဲခန့်တွင်လေကြောင်းမှဗုံးထပ်ကြဲသွားသည်။
“Y-12 က ပတ်ပျံနေလို့ ဗုံးကျင်းထဲဝင်ချိန် ကြဲချသွားတာ။ မြို့ထဲလား မြို့ပြင်လား သဲသဲကွဲကွဲမသိရသေးဘူး။ ပေါက်ကွဲသံကတော့ မြို့ပေါ်ကနေကျယ်ကျယ်ကြီးကြားရတယ်”ဟုဒေသခံတဦးကပြောသည်။
စစ်ကောင်စီသည်ကျောက်မဲမြို့ကို ဇွန်လ ၂၄ရက်နှင့် ၂၇ရက်က လေကြောင်းမှ ဗုံးကြဲခဲ့၍ ကလေးငယ်များအပါအဝင် ဒေသခံများ သေဆုံးဒဏ်ရာရခဲ့ပြီး ဇွန် ၂၉ ရက်တွင် ထပ်မံဗုံးကြဲခဲ့ခြင်းဖြစ်သည်။
Public Service Announcement
ဇွန်လ ၂၄ရက် ညနေက ကျောက်မဲမြို့၊ ရပ်ကွက် (၃)နှင့် ရပ်ကွက်(၇)ကို ဂျက်ဖိုက်တာဖြင့် ပေါင်၅၀၀ ဗုံးနှစ်လုံး ကြဲချရာ အရပ်သား လေးဦးသေဆုံးပြီး၁၄ဦး ဒဏ်ရာရခဲ့ကြောင်း TNLAက သတင်းထုတ်ပြန်ထားသည်။ ဇွန်လ၂၇ရက်က ဗုံးကြဲမှု၌ အရပ်သားတစ်ဦး သေဆုံးခဲ့သည်။ ယနေ့ ဗုံးကြဲတိုက်ခိုက်သည့် ဖြစ်စဉ်၌ ထိခိုက်မှုကို စုံစမ်းနေဆဲဖြစ်သည်။
“မြို့ကခြောက်ကပ်ပြီး တိတ်ဆိတ်နေတယ်။ ဘာတွေဆက်ဖြစ်လာမလဲမသိနိုင်တော့ဘူး”ဟု မြို့ခံတစ်ဦးကပြောသည်။
ဇွန်လနှောင်းပိုင်းကာလ၌ကျောက်မဲအပြင် TNLA ထိန်းချုပ်ဒေသ မိုးကုတ်၊ နမ္မတူမြို့တို့ကိုလည်း စစ်ကောင်စီက ဗုံးကြဲနေပြီး နောင်ချိုမြို့တွင်တိုက်ပွဲအပြင်းအထန်ဖြစ်ပွားနေသည်။
