စစ်​ကောင်စီတပ် ထိုးစစ် ​နောင်ချိုမြို့နဲ့ ၄ မိုင်​ကျော်အထိ​ရောက်လာ

ဇွန်-၃၀၊ ၂၀၂၅။ People’s Spring

စစ်​ကောင်စီတပ်က နောင်ချိုမြို့ကိုပြန်သိမ်းဖို့ ထိုးစစ်ဆင်​နေတာမှာ ဒီက​နေ့မှာမျက်ချင်းနုရွာနဲ့ နောင်ဩရွာကို သိမ်းပိုက်နိုင်ခဲ့ပြီး မြို့နဲ့ ၄ မိုင်​ကျော်အကွာအ​ဝေးထိ​ရောက်လာပါတယ်။

ဒီကနေ့(ဇွန်လ ၃၀ရက်)မှာစစ်တပ်က နောင်ချိုမြို့တောင်ဘက်က (၄)မိုင်ကျော်ပဲဝေးတဲ့မျက်ချင်းနုရွာ နဲ့ နောင်ဩရွာ ကို သိမ်းရသွားတာလို့ နောင်ချိုဒေသခံတွေက ပြောပါတယ်။

“စစ်တပ်က မျက်ချင်းနုနဲ့ နောင်ဩရသွားတာ ဟုတ်တယ်”လို့ နောင်ချိုမြို့ခံတစ်ဦးက ပြောပါတယ်။ မျက်ချင်းနုနဲ့ နောင်ဩရွာဟာ ကပ်လျက်တည်ရှိပါတယ်။ အဲဒီ ၂ ရွာ လုံးဟာတောင်းခမ်း – ကံကြီး – နောင်ချိုလမ်းပိုင်းပေါ်မှာ တည်ရှိတာဖြစ်ပါတယ်။

Public Service Announcement

စစ်ကောင်စီရဲ့ ဝါဒဖြန့် တယ်လီဂရန်ချန်နယ်တွေကလည်း မျက်ချင်းနု နဲ့ နောင်ဩကျေးရွာကိုသိမ်းပိုက်ရပြီလို့ ရေးသားပြီး ဓါတ်ပုံ​တွေနဲ့ ဖြန့်​ဝေ​နေပါတယ်။ မျက်ချင်းနု ရွာမှာ TNLA တပ်ဖွဲ့ဝင် ၃ ဦး နဲ့နောင်သြရွာမှာ TNLA တပ်ဖွဲ့ဝင် ၈ ဦးရဲ့ရုပ်အ​လောင်းနဲ့ လက်နက်ခဲယမ်း​တွေ သိမ်းဆည်းရရှိတယ်လို့ စစ်တပ်​ဝါဒဖြန့်ချန်နယ်​တွေက ဝါဒဖြန့်​နေကြတာကို​တွေ့ရပါတယ်။

TNLA က​တော့ ဇွန် ၃၀ ရက်​နေ့ ​နောင်ချိုတိုက်ပွဲအ​ခြေအ​နေကို သတင်းထုတ်ပြန်ခြင်းမရှိ​သေးပါဘူး ။

နောင်ချိုမြို့ကို သိမ်းပိုက်ထားတဲ့တအာင်းတပ်မတော်(TNLA)အပါအဝင် မြောက်ပိုင်းညီနောင်မဟာမိတ်သုံးဖွဲ့ဟာ စစ်ကိုင်းငလျင်ကြီးဘေးကြောင့် ပြန်လည်ထူ​​ထောင်​ရေးလုပ်ငန်း​တွေလုပ်ဖို့ဇွန်လကုန်အထိ တစ်ဖက်သတ်အပစ်ရပ်တယ်လို့ကြေညာထားပါယ် ။ဒါ​ကြောင့်ဇွန်လ ၃၀ရက်​နေ့ဟာ အပစ်ရပ်နောက်ဆုံးနေ့ဖြစ်ပါတယ်။

TNLAရဲ့ ပြောရေးဆိုခွင့်ရှိသူ လွေးယေဦး က ဇွန် ၂၆ ရက်​နေ့က People’s Spring နဲ့ ​မေးမြန်းခန်းမှာ TNLA ​နောင်ချိုမြို့ကို ပြန်​ပေးမှာ မဟုတ်ပဲ အပစ်ရပ်​ကြေညာထားတာမို့ ခုခံစစ်တိုက်တာပဲရှိပြီး တန်ပြန်ထိုးစစ်ဆင်တာ မရှိဘူးလို့​ပြောပါတယ် ။

ဇွန်လဆန်းက သတင်းစာရှင်းလင်းပွဲမှာ TNLA ​ပြော​ရေးဆိုခွင့်ရှိသူက စစ်တပ်ကထိုးစစ်ဆင်လာ​ပေမယ့် ပြည်သူ​တွေ မစိုးရိမ်ကြဖို့ ၊ TNLAက စစ်ဗျူဟာအတိုင်းလုပ်​နေတာလို့​ဖြေကြားခဲ့ပါတယ် ။

ဒါ​ပေမယ့်စစ်တပ်ထိုးစစ်ဟာမြို့နဲ့ တဖြည်းဖြည်းနီးလာပြီး ၊စစ်တပ်က​လေ​ကြောင်းပစ်ကူအများအပြားသုံးတဲ့အပြင် ​မြေပြင်က အင်အား​ထောင်ချီသုံးထိုးစစ်ဆင်​​နေတာလို့ DPLA ကတာဝန်ရှိသူက​ပြောထားပါတယ်။ ​တော်လှန်​ရေးတပ်​တွေက အ​ကောင်းဆုံးခုခံ​နေပြီး ပြည်သူ​​တွေ အစိုးရိမ်မလွန်ကြဖို့ DPLA ကတာဝန်ရှိသူကလည်း ဇွန် ၂၅ ရက်​နေ့က​ပြောပါတယ် ။စစ်တပ်ရဲ့ ထိုးစစ်ကို TNLA ၊ DPLA နဲ့ မဟာမိတ်​တွေက ခုခံတိုက်ခိုက်​နေတာဖြစ်ပါတယ် ။

နောင်ချိုမြို့ဟာ စစ်ရေးဗျူဟာအရ အလွန်အရေးပါနေလို့ စစ်တပ်အတွက် ​နောင်ချိုရရင် အဲ​ဒေသကို အ​ခြေပြုပြီး ရှမ်း​မြောက်ကို ထိုးစစ်ပြန်ဆင်နိုင်ဖို့အတွက် အလွန်အ​ရေးပါ​နေပါတယ်။ ဒါ့ကြောင့် စစ်ကောင်စီတပ်ဟာ ပြီးခဲ့တဲ့ လပိုင်းတွေကစပြီး နောင်ချိုမြို့ဆီကို စစ်ကြောင်းသုံးကြောင်းနဲ့အပြင်းအထန် ထိုးစစ်ဆင်​​နေတာ​ကြောင့် တိုက်ပွဲ​တွေ ​နေ့စဥ်ပြင်းထန်​ခဲ့ပါတယ်။