တော်လှန်​ရေးတပ်များ မိုးဗြဲမြို့ကို ပြန်လည်လက်လွှတ်ရ၊ မြို့​ပေါ်မှတိုက်ပွဲ​တွေဆက်ဖြစ်

ဇူလိုင်-၃၊၂၀၂၅။ရဲခေါင်/People’s Spring

ကရင်နီပြည်နယ်သို့ဝင်ပေါက်ဖြစ်​သောမိုးဗြဲမြို့ ၏မြို့ပေါ်ရပ်ကွက်များကိုစစ်ကောင်စီတပ်က ထိုး​ဖောက်ဝင်​ရောက်တပ်စွဲနိုင်ခဲ့ပြီး တိုက်ပွဲများဆက်လက်ဖြစ်ပွား​နေ​ကြောင်းကရင်နီအမျိုးသားများကာကွယ်ရေးတပ် KNDF ၏ပြောရေးဆိုခွင့်ရှိသူ သာအယ်စိုးကပြောသည်။

မိုးဗြဲလမ်းမကြီးကိုပါစစ်ကောင်စီကထိန်းချုပ်နိုင်ခဲ့ခြင်းဖြစ်ပြီး ခုနှစ်လကျော်ကြာစစ်​ကောင်စီ၏ တန်ပြန်ထိုးစစ်တွင် စစ်သားရာနှင့်ချီ​သေဆုံးပြီး​နောက် မိုးဗြဲတွင် စစ်ရေးအရအသာရရှိခဲ့ခြင်းဟု စစ်ရေးသတင်းရင်းမြစ်များက ဆိုသည်။

“မိုးဗြဲမှာတော့ မြို့ပေါ်ရပ်ကွက်တွေထဲထိ စစ်ကောင်စီကဝင်ရောက်တပ်စွဲသွားပြီ။တော်လှန်ရေးတပ်ဖွဲ့တွေနဲ့ကတော့ တိုက်ပွဲတွေဆက်ဖြစ်နေတုန်းပါ”ဟုသာအယ်စိုးက လူထုနွေဦးသို့ပြောသည်။

Public Service Announcement

စစ်ကောင်စီသည် မိုးဗြဲ မြို့ကို အလုံးစုံ ပြန်ထိန်း ချုပ်ရန် မြေပြင် အင်အား ၁,၀၀၀ ဝန်းကျင်သုံးခဲ့ပြီးမစ်ဇိုင်းဒုံးများနှင့် နေ့စဥ်နှင့်အမျှ လက်နက်ကြီး အသုံးပြုပစ်ခတ်မှုအပြင် လေကြောင်း မှလည်း အကြိမ်ရေ ၃၀၀ ထက်မနည်း တိုက်ခိုက်ခဲ့သည်။

“သူတို့တပ်စခန်း(ခမရ ၄၂၂)ကနေ လမ်းမကြီးအပေါ်ဘက်ပေါ့။မိုးဗြဲကနေလွတ်လွတ်ကျွတ်ကျွတ်ဖောက်ထွက်နိုင်ဖို့တောင်သူတို့မလုပ်နိုင်သေးပါဘူး။လွိုင်ကော်ရောက်ဖို့လည်းနောက်ထပ်အတားဆီးတွေအများကြီးရှိပါသေးတယ်”ဟု မိုးဗြဲမြို့တွင်ရှိနေသည့် မြေပြင်ရဲဘော်တစ်ဦးက လူထုနွေဦးကို ရှင်းပြသည်။

ကရင်နီစစ်ဘက်သတင်းရင်းမြစ်တစ်ဦးကလည်း “လမ်းမကြီးပေးလိုက်ရပြီ။မြို့မကျပေမယ့်လမ်းမကြီးကျတာက။မြို့ကျသလိုပါပဲ။အဖြေကအမြဲပြောင်းနေမှာပါ”ဟု ပြောသည်။

မိုးဗြဲမြို့ကို စစ်ကောင်စီက ပြန်ရရန် စစ်သားရာနှင့်ချီသေဆုံးခဲ့ကာ ကရင်နီပူးပေါင်းတပ်များ မှ လည်း တပ်ဖွဲ့ဝင် လေးဆယ်ဝန်းကျင်ကျဆုံးခဲ့သည်ဟုသိရသည်။

အာဏာသိမ်းပြီးနောက်ပိုင်း စစ်​ကောင်စီက ဆုံးရှုံးခဲ့သည့် မြို့ကို ပြန်သိမ်းနိုင်ရန် တန်ပြန်ထိုးစစ်ဆင်ခဲ့သောတိုက်ပွဲများအနက် မိုးဗြဲမြို့တိုက်ပွဲမှာခုနှစ်လ​ကျော်ကြာခဲ့ပြီး ကာလအရှည်ကြာဆုံးဖြစ်ကြောင်း စစ်ဘက်သတင်းရင်းမြစ်များက မှတ်ချက်ပြုသည်။

ကရင်နီပူး​ပေါင်းတပ်များက ၂၀၂၃ နှစ်ကုန်ပိုင်းက မိုးဗြဲ မြို့စောင့်တပ် ခမရ ၄၂၂ ကလွဲ၍ စစ်ကောင်စီတပ်စွဲခဲ့သော ဝါရီဆူဖလိုင်၊ ဒုန်းဒူထန်၊ ပွဲကုန်း၃၊ ပွဲကုန်း၁၊ ညောင် ဝိုင်း၊ ပီကင်းကောခူ၊ ဆောင်ကန်း ၊ စည် ကား၂ နဲ့ စက်တော်ရာတောင် ကုန်း (ခ)ဗျူဟာကုန်းကို ကရင်နီတပ်ပေါင်းစုက သိမ်းပိုက်ပြီး မိုးဗြဲ မြို့ကိုထိန်းချုပ်ခဲ့သည်။

မိုးဗြဲမြို့ပြန်ရရေး စစ်ကောင်စီက ၂၀၂၄ ခုနှစ် ဒီဇင်ဘာ လမှစတင်၍ ခမရ ၄၂၂ ကိုအခြေပြု၍ ပြန်လည်ထိုးစစ်ဆင်ခဲ့ခြင်းဖြစ်သည်။

လူဦးရေ နှစ်သောင်းကျော်နေထိုင် ခဲ့သည့် မိုးဗြဲ မြို့သည် စစ်အုပ်စုအခြေစိုက်ရာ နေပြည်တော်ကို နာရီပိုင်းနှင့် ရောက်နိုင်သည့် ပင် လောင်း-ဖယ်ခုံ -(မိုးဗြဲ)-လွိုင်ကော် လမ်းပိုင်းပေါ်၌ ရှိသည်။

မိုးဗြဲမြို့ကိုစစ်ကောင်စီက အလုံးစုံပြန်ရခဲ့ပါက ရှမ်းတောင်မှတဆင့်ကရင်နီပြည် နယ်ထဲသို့ အလွယ်တကူစစ်ကူပို့လို့ရသည့် အ​ခြေအ​နေရှိလာ​ကြောင်း ကာကွယ်ရေးတပ်ဖွဲ့ဝင်များက ဆိုသည်။

မိုးဗြဲမြို့သို့ တန်ပြန်ထိုးစစ်ဆင်လာ​သော စစ်​ကောင်စီတပ်ကို ရှမ်း​တောင်-ကယား(ကရင်နီ)တပ်​ပေါင်းစုဖြစ်​သော KNDF ၊ PDF ၊ Local PDF ၊KPLA စ​သော​တော်လှန်​ရေးတပ်များကခုခံတိုက်ခိုက်ခဲ့ရခြင်းဖြစ်သည်။