ဇူလိုင်-၆၊၂၀၂၅။ရဲခေါင်/People’s Spring
မိုးဗြဲမြို့ကို စစ်ကောင်စီထံမှ ပြန်လည်သိမ်းယူမည်ဟု မြေပြင်ရဲဘော်များနှင့် တာဝန်ရှိသူများက ပြောသည်။
ရှမ်းပြည်တောင်ပိုင်းမှ ကရင်နီပြည်နယ်သို့ဝင် ပေါက်ဖြစ်ရာ မိုးဗြဲမြို့ကို စစ်ကောင်စီက ၇ လကြာ ထိုးစစ်ဆင်ပြီးနောက် ဇူလိုင် ၂ ရက်တွင် မြို့အတွင်းပြန်လည်ဝင်ရောက်တပ်စွဲနိုင်ခဲ့သည်။
တော်လှန်ရေးတပ်ဖွဲ့ဝင်များအားလုံးသည် စစ်ကောင်စီ၏ လေကြောင်းမှဗုံးကြဲမှု ၊အဆိပ်ဗုံး ၊ မီးလောင်ဗုံး၊လက်နက်ကြီး ၊ ဒရုန်း စသည်တို့ဖြင့်အကြိမ်ကြိမ်တိုက်ခိုက်မှုကို ခုခံခဲ့ကြောင်း မိုးဗြဲ မြို့ကာကွယ်ရေးတပ်ဖွဲ့ဝင်တစ်ဦးက အသိပေးသည်။
Public Service Announcement
“ကျဆုံးစစ်သည်များရဲ့ စတေးမှု အလကားမဖြစ်ရအောင် ကျွန်တော်တို့အားလုံးမှာ တာဝန်ရှိတယ် ။စိတ်ဓာတ်မကျပဲ အကောင်းဆုံး ပြန်လာကြမယ်၊ ပြန်လာဖို့လိုတယ်”ဟု ၎င်းက ပြောသည်။
မိုးဗြဲမြို့ခုခံစစ်တွင် တပ်ဖွဲ့များအားလုံးတာဝန်ကျေသည်ထက်ပိုကြောင်းလည်း မိုးဗြဲမြို့ကယ်ဆယ်ရေးတပ်ဖွဲ့မှ MBRT တာဝန်ရှိသူကလည်း အသိပေးသည်။
“စစ်တပ်နဲ့ PNA ရဲ့ ၆လကျော် ထိုးစစ်ကို ခုခံကာကွယ်ရင်း ရလိုက်တဲ့ သင်ခန်းစာတွေနဲ့ ကြုံတွေ့ခဲ့ရတဲ့ လိုအပ်ချက်တွေကို ပြန်လည် ဖြည့်စွက်ပြီး အကောင်းဆုံး ပြန်လာလိမ့်မယ်လို့ ကျွန်တော်တို့ ယုံကြည်တယ်”ဟု ၎င်းတို့၏ ခံယူချက်ကိုရေးသားအသိပေးထားသည်။
မိုးဗြဲ မြို့ကို လက်လွတ်လိုက်ခြင်းမဟုတ်ဘဲ ရှေ့ဆက်ခြေလှမ်းအတွက် နောက်တစ်လှမ်းဆုတ်အားယူနေခြင်းဖြစ်ကာ အကောင်းဆုံးစုဖွဲ့မှု၊တာဝန်ယူမှုများဖြင့် ပြင်ဆင်ကာ ပြန်ယူမည်ဟုလည်း ကရင်နီအမျိုးသားများကာကွယ်ရေးတပ် KNDF တာဝန်ရှိသူက လည်းပြောသည်။
လက်ရှိတွင် စစ်ကောင်စီတပ်များကမိုးဗြဲမြို့အတွင်းဝင်ရောက်ကာ နေအိမ်များကို မီးရှို့ခြင်းများဆက်တိုက်လုပ်နေကြောင်းလည်း သိရသည်။
အိမ်များကို မီးရှို့ဖျက်ဆီးခြင်းမှာ မြို့အတွင်းတပ်စွဲပြီး ပစ်ကွင်းရှင်းနေခြင်းဖြစ်ကြောင်းရဲဘော်အချို့က ပြောသည်။
၂၀၂၃ ခုနှစ် နိုဝင်ဘာလတွင် တစ်လေးလုံစစ်ဆင်ရေး(၁၁၁၁) ဖြင့် မိုးဗြဲ မြို့စောင့်တပ် အမှတ် (၄၂၂) ခြေမြန်တပ်ရင်း (ခမရ ၄၂၂ )ကလွဲ၍ မိုးဗြဲမြို့ရှိ စစ်ကောင်စီတပ်စွဲခဲ့သော ဗျူဟာကုန်းနှင့် ကင်းစခန်းရှစ်ခုကိုကရင်နီတပ်ပေါင်းစုက သိမ်းပိုက်ပြီး မိုးဗြဲ မြို့ကိုထိန်းချုပ်ခဲ့သည်။
မိုးဗြဲမြို့ပြန်ရရေး စစ်ကောင်စီက ၂၀၂၄ ခုနှစ် ဒီဇင်ဘာ လကတည်းက ခမရ ၄၂၂ ကိုအခြေပြု၍ အင်အား ၇၀၀ ကျော်ဖြင့် ပြန်လည်ထိုးစစ်ဆင်ခဲ့ခြင်းဖြစ်သည်။
“မိုးဗြဲမြို့ကို ကျွန်တော်တို့ သိမ်းနိုင်ခဲ့တယ် ။အချိန်တစ်ခုထိလဲ ထိမ်းနိုင်ခဲ့တယ် ။ဆက်ပြီးလဲ ပြန်သိမ်းနိုင်လိမ့်မယ်လို့ ယုံကြည်တယ်”ဟု MBRT တာဝန်ရှိသူက ပြောသည်။
လူဦးရေ နှစ်သောင်းကျော်နေထိုင် ခဲ့သည့် မိုးဗြဲ မြို့သည် စစ်အုပ်စုအခြေစိုက်ရာ နေပြည်တော်ကို နာရီပိုင်းနှင့် ရောက်နိုင်သည့် ပင် လောင်း-ဖယ်ခုံ -(မိုးဗြဲ)-လွိုင်ကော် လမ်းပိုင်းပေါ်၌ ရှိသည်။
မိုးဗြဲမြို့ကိုတန်ပြန်ထိုးစစ်ဆင်လာသည့်စစ်ကောင်စီတပ်ကို ရှမ်းတောင်-ကယား(ကရင်နီ)တပ်ပေါင်းစုဖြစ်သော KNDF ၊ PDF ၊ Local PDF ၊KPLA စသောတော်လှန်ရေးတပ်များက ခုခံတိုက်ခိုက်ခဲ့ကြခြင်းဖြစ်သည် ။
