ပုသိမ်-မုံရွာလမ်းပိုင်းရှိ တိုက်နယ်ဆေးရုံတွင် တပ်စွဲထားသည့် စစ်ကောင်စီတပ် တိုက်ခိုက်ခံရ

‌ဇူလိုင်-၁၃၊၂၀၂၅ ဇော်ရမ်း/People’s Spring

မကွေးတိုင်း၊ မင်းတုန်းမြို့နယ်၊ ပုသိမ် – မုံရွာ လမ်းမကြီးဘေးရှိ တိုက်နယ်ဆေးရုံတွင် တပ်စွဲထားသည့် စစ်ကောင်စီတပ်ကို သရက်ခရိုင် အမှတ်(၄)တပ်ရင်းနှင့် ပူးပေါင်းတပ်များက တိုက်ခိုက်ခဲ့သည်။

ပုသိမ် – မုံရွာလမ်းမကြီးဘေး ၊ကျောက်တိုင် ကျေးရွာရှိ တိုက်နယ်ဆေးရုံ၌ စစ်ကောင်စီတပ်သား ၃၅ဦးခန့် တပ်စွဲထားသည်ကို ဇူလိုင် ၁၁ရက်က တိုက်ခိုက်ခဲ့ခြင်းဟု သရက်ခရိုင် အမှတ်(၄)တပ်ရင်းက ယနေ့(ဇူလိုင် ၁၃ရက်) ထုတ်ပြန်သည်။

သရက်ခရိုင်အမှတ်(၄) တပ်ရင်းမှ တပ်ခွဲ(၁)ခွဲမူးဦးဆောင်သော ဒရုန်းတပ်စိပ်နှင့် မင်းတုန်းမြို့နယ် ပြည်သူ့ကာကွယ်ရေးတပ်ဖွဲ့တို့ ပူးပေါင်း၍ တိုက်ခိုက်ရေး ဒရုန်းဖြင့် ​ဗုံးလေးလုံးကြဲခဲ့ပြီး ပစ်မှတ်သို့ ကျရောက်ပေါက်ကွဲခဲ့သည်ဟု ရုပ်သံမှတ်တမ်းနှင့်အတူ ထုတ်ပြန် ထားသည်။

Public Service Announcement

စစ်ကောင်စီဘက်က အရာရှိအပါအဝင် တပ်သား လေးဦးနှင့်အထက် ထိခိုက်မှုရှိနိုင်သည်ဟု ဆိုသည်။

တိုက်ခိုက်ခံရပြီးနောက် စစ်ကောင်စီတပ်က လက်နက်ကြီးဖြင့် ရမ်းသမ်းပစ်ခတ်နေပြီး ပုသိမ်-မုံရွာလမ်းမကြီးပေါ်၌ ခရီးသွားပြည်သူများ အား အစစ်အဆေးတင်းကြပ်နေ၍ သတိထားသွားလာကြရန် သရက်ခရိုင်အမှတ်(၄)တပ်ရင်းက ထုတ်ပြန်ထားသည်။

ယခုရက်ပိုင်း၌ မင်းတုန်းမြို့နယ်အပြင် အောင်လံနှင့် အထက်မင်းလှမြို့နယ်တို့တွင်လည်း စစ်ရေးတင်းမာနေကြောင်း အထက်မင်းလှမြို့နယ် ပကဖတာဝန်ခံရန်ကြီးအောင်က ပြောသည်။

အထက်မင်းလှနှင့် ငဖဲမြို့နယ်အတွင်း ရခိုင်ရိုးမတလျှောက် စခန်းများကို တပ်မ(၉၉) ဦးဆောင်သည့် တပ်ရင်းများနှင့် စစ်သင်တန်းဆင်းအများအပြား အင်အားဖြည့်တင်းနေပြီး ဒေသတွင်း၌ စစ်ရေးတင်းမာလာနိုင်သည့် အခြေအနေကို ကြိုတင်သတိပြုကြရန်ကာကွယ်ရေးအဖွဲ့များက သတိပေးထားသည်။