ဇူလိုင်၁၇၊၂၀၂၅။မေ၊ဇော်ရမ်း/People’s Spring
ဧရာဝတီမြစ်ကြောင်းမှ စစ်ရေယာဉ်အုပ်စု ဝက်လက်မြို့နယ်အတွင်းရောက်လာချိန်မှာ ဝက်လက်မြို့နယ်အရှေ့ခြမ်း၊မြစ်ကမ်းဘေးကျေးရွာတွေကို စစ်တပ်က လေကြောင်းတိုက်ခိုက်ခဲ့တာမို့ ပြည်သူ၁၉ဦးထက်မနည်း သေဆုံးခဲ့တယ်လို့ ကနဦးသိရပါတယ်။
ဝက်လက်မြို့နယ်အရှေ့ခြမ်းက ရေလည်မော်၊သစ်ဆိမ့်ကြီး၊သျှားကွဲ၊ငါးပတ်ချောင်း ကျေးရွာ တွေကို ဇူလိုင် ၁၇ ရက် ညနေ ၅ နာရီခွဲကျော်မှာ စစ်တပ်ကY-12 လေယာဥ်နဲ့ ဗုံးကြဲခဲ့ရာမှာ ပြည်သူ၁၉ဦး၊ပကဖ၁ဦး သေဆုံးပြီး ပြည်သူ၃၀ ကျော်ဒဏ်ရာရထားတယ်လို့ ဒေသခံ တွေကပြောပါတယ်။
“မနက်က မတ္တရာဘက်ကို ဒီသင်္ဘောတွေ ရောက်တဲ့အချိန် လက်နက်ကြီး စပစ်တာပဲ။ရှိမ်းမကားအရှေ့လည်းရောက်ရော လေယာဉ်က ရွာတွေကို ဆက်တိုက်ကြဲတာ။တညနေလုံးပစ်တာ။အလုံးရေ ကိုမရေတွက်နိုင်ဘူး”လို့မြစ်ကမ်းဘေးကျေးရွာက ဒေသခံ တဦးက ပြောပါတယ်။
Public Service Announcement
လက်ရှိမှာ ဒဏ်ရာရနဲ့ သေဆုံးသူစာရင်းအတိအကျကိုတော့ကောက်ယူနေဆဲဖြစ်တယ်လို့လည်း ဒေသခံတွေကပြောပါတယ်။
အခြားဒေသခံတဦးကလည်း “သတင်းဝင်လာတယ်။ အခုအပစ်ခံရတဲ့ရွာတွေက ဧရာဝတီ မြစ်ဘေးကရွာတွေဖြစ်တယ်။ သေဆုံးတာတွေလည်းများတယ်။ ဒဏ်ရာရလည်းများတယ်”လို့ပြောပါတယ်။
စစ်တပ်က ဗန်းမော်မြို့ကို စစ်ကူသွားဖို့ဆိုပြီးသတင်းထွက်နေတဲ့ စစ်သင်္ဘော အစီးရေ ၂၀ ကျော်ပါတဲ့ စစ်ရေယာဥ်အုပ်စုဇူလိုင် ၁၇ ရက်မနက်မှာ မန္တလေး ၊ဂေါဝိန်ဆိပ်ကနေ စတင်ထွက်ခဲ့တာပါ။ ဒီရေယာဥ်တွေထဲမှာဇွန်လကတည်းကပြည်သူပိုင်သင်္ဘောတွေကိုပါဖမ်းဆီးပြီးယာဥ်အမည်တွေဖျက်ပြီး စစ်တပ်ကသုံးဖို့ပြင်ဆင်ထားတဲ့ သင်္ဘောတွေပါဝင်ပါတယ် ။
သင်္ဘောအုပ်စုကိူ စစ်ကောင်စီက လေကြောင်းမှလုံခြုံရေး အကူအညီပေးနေပြီး ယနေ့ညနေမှာ မြစ်ကမ်းဘေးရွာတွေကိုဗုံးကြဲခဲ့တာဖြစ်ပါတယ်။ စစ်သင်္ဘောအုပ်စုဟာ ဇူလိုင် ၁၇ ရက်ညမှာ ဝက်လက်မြို့နယ် ရှိမ်းမကားရွာအနီးမှာရပ်နားထားတယ်လို့ စုံစမ်းသိရပါတယ် ။
ဒီရေလမ်း ကြောင်းကို စစ်တပ်က သပိတ်ကျင်းမြို့ကို တော်လှန်ရေး တပ်တွေသိမ်းပိုက်ခဲ့ချိန် ထွက်ပြေးစဥ်ကနောက်ဆုံးအသုံးပြုခဲ့တာဖြစ်ပါတယ် ။ သပိတ်ကျင်းမြို့ကိုတော်လှန်ရေးတပ်တွေ သိမ်းပိုက်ချိန် မှာ သပိတ်ကျင်းက စစ်ကောင်စီဝန်ထမ်းတွေနဲ့ ကသာမြို့က ပေါ်တာဆွဲလာသူ တွေနဲ့ ၊ Non -CDM စစ်တပ်ဝန်ထမ်းတွေကို ခေါ်ပြီး ဧရာဝတီမြစ်အတိုင်း မန္တလေးမြို့ကို စစ်တပ်ထွက်ပြေးလာခဲ့တာပါ။ သပိတ်ကျင်းမြို့နယ်ကို တော်လှန်ရေးတပ်တွေက၂၀၂၄ သြဂုတ် ၂၅ ရက်မှာ အပြီးသတ်သိမ်းပိုက်ခဲ့တာပါ ။ဒါကြောင့် ၁၁ လခန့်ကြာမှ အခုရေလမ်းကြောင်းကို စစ်ကောင်စီကပြန်သုံးလာတာဖြစ်ပါတယ် ။
