ဇူလိုင်-၂၁၊၂၀၂၅။ဇေအောင်/People’s Spring
စစ်ကိုင်းတိုင်း၊အရာတော်မြို့နယ်မှာဘုန်းကြီးကျောင်းတပ်စွဲထားတဲ့ စစ်တပ်ကို တော်လှန်ရေးတပ်ဖွဲ့တွေကဝင်ရောက်တိုက်ခိုက်ခဲ့ရာစစ်အုပ်စုထိခိုက်မှုရှိပြီး ဓါးစားခံ အဖမ်းခံထားရတဲ့ဘုန်းကြီးနဲ့ ပြည်သူတွေကိုကယ်ထုတ်နိုင်ခဲ့ကြောင်း မုံရွာခရိုင်တပ်ရင်းအမှတ် (၁၉)ရဲ့တာဝန်ရှိသူတဦးက ပြောပါတယ်။
ဇူလိုင် ၁၅ ရက်မှ ၁၇ ရက်အတွင်း အရာတော်မြို့နယ်အတွင်း စစ်ကြောင်းထိုးပြီး မြေနက်ရွာဘုန်းကြီးကျောင်းမှာ တပ်စွဲထားတဲ့ စစ်တပ်နဲ့ စစ်တပ်လက်အောက်ခံပျူစောထီးစစ်ကြောင်းကို တော်လှန်ရေး ပူးပေါင်းတပ်တွေက တိုက်ခိုက်ခဲ့ကြပါတယ်။
၃ ရက်ကြာ တိုက်ပွဲအတွင်း စစ်အုပ်စု ယာယီတပ်စွဲထားတဲ့ ဘုန်းကြီးကျောင်းကို တိုက်ခိုက်သိမ်းပိုက်နိုင်ခဲ့ပြီး စစ်အုပ်စု ငွေတွင်းပျူရွာအထိ ဆုတ်ခွာသွားအောင် လိုက်လံတိုက်ခိုက်ခဲ့တယ်လို့ မုံရွာခရိုင်တပ်ရင်းအမှတ် (၁၉)ရဲ့ တာဝန်ရှိသူတဦးက ပြောပါတယ်။
Public Service Announcement
တိုက်ပွဲအတွင်း စစ်အုပ်စုက ဓားစာခံအဖြစ် ဖမ်းဆီးထားတဲ့ ဘုန်းကြီး ၃ ပါးနဲ့ အရပ်သားပြည်သူ ၄ဦးကို အသက်ရှင်လျက် ကယ်ထုတ်နိုင်ခဲ့တယ်လို့ ၎င်းက ပြောပါတယ်။
တိုက်ပွဲအတွင်းအရာတော်မြို့ စကတ-၁၀ တပ်ကနေ လက်နက်ကြီးတွေနဲ့ ပစ်ကူပေးခဲ့တဲ့ကြားကနေ တိုက်ခိုက်ခဲ့ရာမှာ စစ်အုပ်စုဝင် ၁ဦးသေဆုံးပြီး ၅ဦး ဒဏ်ရာပြင်းထန်စွာရခဲ့တယ်လို့ မုံရွာခရိုင်တပ်ရင်းအမှတ် (၁၉)က ထုတ်ပြန်ပါတယ်။
“စစ်ကြောင်းကအထိနာထားတော့ပြန်လည်ထိုးစစ်ဆင်ဦးမယ်လို့ ခန့်မှန်းရလို့ ပြည်သူများစစ်ရေးသတိရှိကြဖို့နဲ့ ကျည်အင်အားနည်းနေလို့ ထောက်ပံ့ကူညီနိုင်သူများလဲကူညီပါဦးလို့ပြောချင်ပါတယ်”လို့ မုံရွာခရိုင်တပ်ရင်းအမှတ် (၁၉)ရဲ့ တာဝန်ရှိသူတဦးက ပြောပါတယ်။
အဲဒီတိုက်ပွဲကို မုံရွာခရိုင်တပ်ရင်းအမှတ် (၁၉)၊ ဗျူဟာ(၆၆)စစ်ကြောင်း၊ အရာတော်မြို့နယ်ပကဖ၊ဘုတလင်မြို့နယ်ပကဖ၊ဝက်လက်မြို့နယ်ပကဖ၊ရေဦးမြို့နယ်ပကဖ၊မုံရွာမြို့နယ်ပကဖ၊ မုံရွာခရိုင်ပကဖအထူးတိုက်ခိုက်ရေးအဖွဲ့၊မုံရွာခရိုင် တပ်ရင်း (၂၀၊၁၆)၊ကျားသစ်နက်ပျောက်ကြားတပ်ဖွဲ့၊ အရာဝောာ်မြို့နယ်နှင့်ဘုတလင်မြို့နယ် ဒရုန်းအဖွဲ့များ၊ အခြားမဟာမိတ်တပ်များ ပူးပေါင်းတိုက်ခိုက်ခဲ့တယ်လို့ ထုတ်ပြန်ထားပါတယ်။
