ဇူလိုင် – ၂၂ ၊၂၀၂၅ ၊ ဆိုင်းမင်း/People’s Spring
မန္တလေးနန်းတွင်းကနေ ၁၅ မိုင်ခန့်အကွာအဝေးဝန်းကျင်မှာ တိုက်ပွဲတွေ ဖြစ်နေပေမယ့် မြို့ပေါ်မှာတော့ စစ်ကောင်စီလက်အောက်ခံ အုပ်ချုပ်ရေးပိုင်းက လာမယ့် စစ်မှုထမ်းအပတ်စဉ် အတွက် လူအင်အားစုဆောင်းဖို့ ရပ်ကွက်တွေမှာ မဲနှိုက်စေတာတွေ ပြုလုပ်နေတယ်လို့မြို့ခံတွေဆီကသိရပါတယ်။
ဒီနေ့ (ဇူလိုင်၂၂ ရက်)မှာဆိုရင် အောင်မြေသာစံမြို့နယ်ထဲကသင်္ဘေတန်း၊အမရဋ္ဌာနီအရှေ့၊ ပြည်ကြီးရန်လုံ၊ပုလင်းဝင်း ၊ရုံးသာ၊ရွှေကျင်၊ အိုးဘို၊ အနှိမ်တော်ရပ်ကွက် ၊ အောက်ကမ်းနားလမ်းရပ်ကွက်တွေမှာ မဲနှိုက်ခဲ့ကြတယ်လို့သိရပါတယ်။
ရပ်ကွက်ထဲက လူငယ်တွေ ၊ လူငယ်တွေ ရှိတဲ့မိသားစုတွေကို ရပ်ကွက် ဓမ္မာရုံ၊ ရပ်ကွက်ရုံးတွေမှာ ခေါ်ယူမဲနှိုက်စေတာလို့ မြို့ခံတွေက ဆိုပါတယ်။
Public Service Announcement
အောင်မြေသာစံမြို့နယ်ထဲကရပ်ကွက်တွေမှာစစ်မှုထမ်းအပတ်စဉ်အလိုက်နာမည်စာရင်းပါသူကိုယ်တိုင်လာရောက်မဲနှိုက်ရမှာဖြစ်သလို၊ ကိုယ်တိုင်မလာရောက်နိုင်ရင်တော့ အိမ်ထောင်စုစာရင်းမှာပါတဲ့အသက် ၁၈ ပြည့်ပြီးသူက ကိုယ်စားမဲနှိုက်ရမယ်လို့ ရပ်ကွက်အုပ်ချုပ်ရေးပိုင်းက ဖိအားပေးထားတယ်လို့သိရပါတယ်။
“သားက အိမ်မှာမရှိလည်း အမေဖြစ်သူလာရမယ်ပြောတယ်၊ မဲပေါက်ရင်တော့ မဖြစ်ဖြစ်အောင် ပြန်ခေါ်ပေးရမယ်တဲ့”လို့ အောင်မြေသာစံမြို့နယ်၊ ၁၂လမ်းအနီးနေထိုင်သူတစ်ဦးကပြောပါတယ်။
အခုလိုမန္တလေးမှာစစ်မှုထမ်းလူသစ်စုဆောင်းတာကို အာဏာသိမ်းစစ်ကောင်စီကို ထောက်ခံအားပေးတဲ့ ပေါက်ကိုယ်တော်လို့ လူသိများတဲ့ ဘုန်းကြီး ရဲ့ တပည့် ပြည်သူ့စစ် (ပျုစောထီး)တွေက အဓိက လုပ်ကိုင်နေတာလို့ မြို့ခံတွေရဲ့ပြောပြချက်အရသိရပါတယ်။
အလယ်ပိုင်းတိုင်းစစ်ဌာနချုပ်( လပခ) အခြေစိုက် မန္တလေးမှာပျုစောထီးလို့ အရပ်က ခေါ်တဲ့ ပြည်သူ့စစ်တွေကို စစ်သင်တန်းပေးကာ လက်နက်တပ်ဆင်ပြီး မွေးထုတ်ပေးနေတာကြောင့် ပျုစောထီးအားကောင်းရာ နယ်မြေလည်းဖြစ်ပါတယ်။
လက်ရှိမှာတော့ လပခ ရှိရာ မန္တလေးနန်းတွင်းနဲ့ ၁၅ မိုင် ခန့်သာဝေးတဲ့ မတ္တရာမြို့နယ်နဲ့ ပုသိမ်ကြီးမြို့နယ်အစပ်က စစ်တပ်နောက်တန်းစခန်းတွေကို မန္တလေး PDF က ဇူလိုင်လ ၂၀ ရက်မှာ သိမ်းယူထားပါတယ်။
မနေ့က ဆိုရင် စစ်ကောင်စီတပ်က လက်လွှတ်ရတဲ့နေရာတွေပြန်ရဖို့ ဗုံးကြဲ တိုက်ခိုက်တာတွေလုပ်ဆောင်နေပြီး လေယာဉ်သံတွေ ၊ လက်နက် ကြီး ပစ်ခတ်သံတွေကို ပုသိမ်ကြီးမြို့ပေါ်ကနေအတိုင်းသားကြားနေရတယ်လို့မြို့ခံတွေက ပြောကြပါတယ်။
