မန္တလေးကရွှေဆိုင်ဓားပြတိုက်သွားတဲ့ အဖွဲ့ခေါင်းဆောင်ကို မိပြီလို့ဆို

သြဂုတ် -၂ ၊ ၂၀၂၅ ၊ဆိုင်းမင်း/People’s Spring

မန္တလေးမြို့ ၊ မန်းမြို့စျေးအနီးက ရွှေနန်းသုခ ရွှေဆိုင်ကို ဓားပြတိုက်သွားတဲ့အဖွဲ့ခေါင်းဆောင်နဲ့အဖွဲ့သား တစ်ဦးကို အခင်းဖြစ်ပြီး တစ်ပတ်အကြာ ပြင်ဦးလွင်မှာ ဖမ်းမိတယ်လို့စစ်ကောင်စီ လက်အောက်ခံ မန္တလေး ရဲတပ်ဖွဲ့က ဆိုထားပါတယ်။

ဓားပြအဖွဲ့ခေါင်းဆောင် အသက် ၃၉ နှစ်အရွယ် အမျိုးသားနဲ့ အဖွဲ့သား အသက် ၃၂ နှစ်အရွယ် အမျိုးသား တို့ကို ပြင်ဦးလွင်မြို့ ၊ တိုးကြီးကုန်းကျေးရွာရှိ နေအိမ်တစ်အိမ်မှာ ဇူလိုင် ၃၁ ရက်ညပိုင်းက ဖမ်းမိတာလို့သိရပါတယ်။

ဖမ်းမိချိန်မှာ ဓားပြတိုက်ချိန်က အသုံးပြုခဲ့တဲ့ ပစ္စတိုသေနတ်နဲ့အတူ ရွှေထည်တွေ သိမ်းဆည်းရမိတယ်လို့လည်း ဓာတ်ပုံ နဲ့ ပြသထားတာတွေ့ရပါတယ်။

Public Service Announcement

ရွှေနန်းသုခ ရွှေဆိုင်ကို ဓားပြတိုက်ချိန် အမျိုးသား ငါး ဦး နဲ့အမျိုးသမီး တစ် ဦး အဖွဲ့ဖြစ်ပြီးဆိုင်ဝန်ထမ်းနှစ်ဦးထိခိုက်ဒဏ်ရာရခဲ့တယ်လို့ဆိုင်ပိုင်ရှင်က လူမှုကွန်ရက်ကနေ အသိပေးထားပါတယ်။

ဓားပြတိုက်ခိုက်ခံရတဲ့ရွှေထည်ပစ္စည်းပမာဏာကိုတော့သူက မပြောထားပါတယ်။

ဖမ်းထားသူ နှစ်ဦးကိုတော့ မဟာအောင်မြေမြို့န​ယ် ၊မြို့မရဲစခန်းမှာ ချုပ်ထားတယ်လို့သိရပါတယ်။

ရွှေဆိုင်ကို ဓားပြတိုက်တဲ့အဖွဲ့ အသုံးပြုခဲ့တဲ့ Honda Fit အဖြူရောင်ကားကို ပုသိမ်ကြီးမြို့နယ်ထဲမှာ စွန့်ပစ်ထားခဲ့တာ အခင်းဖြစ်ပြီး နောက်ရက်မှာ ရှာတွေခဲ့တာပါ။

မန္တလေးမြို့ဟာ စစ်တပ်အာဏာသိမ်းပြီးနောက် လူစည်ကားရာနေရာတွေက ဘဏ်တွေ ၊ ရွှေဆိုင်တွေ အပြင် စက်သုံးဆီဆိုင်တွေကို အဖွဲ့လိုက် ဓားပြတိုက်တဲ့ ဖြစ်စဉ်တွေဖြစ်ထားပါတယ်။