ရေစကြိုမှာစစ်တပ်က လက်နက်ကြီးနဲ့ပစ်လို့ ၂ နှစ်သားကလေးအပါအဝင် ၂ ဦး ဒဏ်ရာရ

သြဂုတ်-၆၊၂၀၂၅။ဇေအောင်/People’s Spring

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသကို စစ်တပ်က တိုက်ပွဲမဖြစ်ဘဲ လက်နက်ကြီးနဲ့ ပစ်ခတ်တိုက်ခိုက်လို့ ၂ နှစ်သားကလေးအပါအဝင် ပြည်သူ ၂ ဦး ထိခိုက်ဒဏ်ရာ ရရှိခဲ့ကြောင်းဒေသခံတွေကပြောပါတယ်။

ဩဂုတ် (၄) ရက် နေ့လယ် ၁၂ နာရီခန့်ကရေစကြိုမြို့နယ်၊ ရေလယ်ကျွန်းဒေသက ဖြုံဘူးကျေးရွာတောင်ဘက်မှာလက်နက်ကြီး ၂ လုံးကျရောက်ပေါက်ကွဲခဲ့ပါတယ်။လက်နက်ကြီးကျရောက်ပေါက်ကွဲမှုကြောင့်ဖြုံဘူးကျေးရွာကအသက် (၂) နှစ်အရွယ် မောင်ပေါက်စီဟာ ဦးခေါင်းမှာ လက်နက်ကြီး ကျည်စထိမှန်ကာ ဒဏ်ရာရခဲ့ပြီး အသက် (၆၇)နှစ်အရွယ်ဦးဝင်းကြည်ဆိုသူလည်းခြေ​ထောက်နဲ့ တင်ပါးမှာ ဒဏ်ရာတွေ ရရှိခဲ့တယ်လို့ရေစကြိုသတင်းအချက်အလက်ကော်မတီရဲ့ တာဝန်ရှိသူက ပြောပါတယ်။

“ကလေးအခြေအနေကတော့ ခုထိ ဆေးကုသနေရဆဲပါ”လို့ ရေလယ်ကျွန်းဒေသက ပကဖတာဝန်ခံတဦးကပြောပါတယ်။

Public Service Announcement

အဲဒီလက်နက်ကြီးဟာရေစကြိုမြို့ပေါ် စည်ပင်ပန်းခြံမှာ တပ်စွဲထားတဲ့ စစ်ကောင်စီတပ်က ဟောင်ဝှစ်ဇာနဲ့ ပစ်ခတ်ခဲ့တာ ဖြစ်ပြီး ဖြုံဘူးရွာအပြင် မီးလောင်ကျွန်းကျေးရွာ (ရွာကွဲ) နှစ်ရွာကြားက ကျွန်းပေါ်သို့ (၂) လုံး၊ မီးလောင်ကျွန်းတောင်ဘက်ရွာရဲ့ အရှေ့မြောက်ဘက်မှာ (၁) လုံးပါကျရောက်ပေါက်ကွဲခဲ့တယ်လို့ အထက်ပါကော်မတီက ပြောပါတယ်။

“တိုက်ပွဲတွေဘာမှမရှိဘူး။အကြောင်းမဲ့သက်သက် ရမ်းကားပစ်ခတ်နေတာ”လို့ရေစကြိုသတင်းအချက်အလက်ကော်မတီရဲ့ တာဝန်ရှိသူက ပြောပါတယ်။

ရေစကြိုမြို့နယ်ကစစ်အုပ်စုဟာလက်နက်ကြီတွေနဲ့ နေ့စဉ်နီးပါး ရမ်းသမ်းပစ်ခတ်နေလို့ ပြည်သူတွေစိုးရိမ်နေရတယ်လို့ သိရပါတယ်။

ပြီးခဲ့တဲ့ဇူလိုင် ၃၀ ရက်ကမနက်ကလည်းရေစကြိုမြို့နယ်၊ ကုန်းရင်းရွာမ(ကိုရင့်)ရွာကို စစ်တပ်က စက်တပ်လေထီး(paramotor)၂ စီးလေကြောင်းတိုက်ခိုက်မှု (၄) ကြိမ် ပြုလုပ်သွားပြီးထိခိုက်ပျက်စီးမှုတွေ ရှိခဲ့ပါသေးတယ်။