ဩဂုတ်-၁၁၊ ၂၀၂၅။ နေ့သစ်/People’s Spring
အာဏာသိမ်းစစ်ကောင်စီက စစ်ရေးအရ ခေါင်းမဖော်နိုင်အောင်ရှုံးနိမ့်နေ၍ ရက္ခိုင်ပြည်သူများအားပစ်မှတ်ထားတိုက်ခိုက်မှုများလုပ်ဆောင်ခဲ့ရာ ဖမ်းဆီးသတ်ဖြတ်၊ တိုက်ခိုက်မှုများကြောင့် ပြည်သူ ၉၀၀ ကျော်သေဆုံးကာ ၂,၀၀၀နီးပါး ဒဏ်ရာရခဲ့ကြောင်း အာရက္ခတပ်တော်(AA) ပြောရေး ဆိုခွင့်ရှိသူ ဦးခိုင်သုခက ယနေ့(ဩဂုတ် ၁၁ရက်) သတင်းစာရှင်းလင်းပွဲ၌ ပြောကြားသည်။
စစ်ရှုံးစစ်ကောင်စီက ၎င်းတို့ မနိုင်မနင်းထိန်းသိမ်းနေရသည့် စစ်တွေ၊ ကျောက်ဖြူမြို့အပါအဝင် မြို့နယ်သုံးခုက အပြစ်မဲ့ အရပ်သားပြည်သူများကို ဖမ်းဆီးနှိပ်စက်အနိုင်ကျင့် သတ်ဖြတ်နေသကဲ့သို့ အာရက္ခ တပ်တော် သိမ်းပိုက်ထိန်းချုပ်ထားသည့် မြို့ရွာများကိုလည်း ရည်ရွယ်ချက်ရှိရှိ လေကြောင်း ၊ ရေကြောင်း လက်နက်တွေနဲ့ ပစ်ခတ်တိုက်ခိုက်ကာ စစ်ရာဇဝတ်မှုများကို နေ့စဉ်နှင့်အမျှ ကျူးလွန်နေသည်ဟု ဦးခိုင်သုခက ပြောသည်။
မြေပြင်မှတ်တမ်းများအရ စစ်ကောင်စီလက်ချက်ကြောင့် ပြည်သူ ၉၂၆ ဦးသေဆုံးကာ ၁၉၅၄ဦး ဒဏ်ရာရရှိပြီး ဖမ်းဆီးခံရသူ ၉၄၇ ဦး ရှိကြောင်း ဦးခိုင်သုခက ပြောသည်။
Public Service Announcement
“ဤထက်မကလည်းများနိုင်ပါသေးတယ်”ဟု ဦးခိုင်သုခက ပြောသည်။
စစ်ကောင်စီ၏ လေကြောင်း၊လက်နက်ကြီး၊ မီးရှို့မှုများကြောင့် ပြည်သူ လူထုနေအိမ် ၁၀,၅၀၂လုံး ဘာသာရေးအဆောက်အဦး ၉၀၊ စာသင် ကျောင်း ၄၅ကျောင်း၊ ဆေးရုံဆေးခန်း ၁၂ခု၊ တံတား ၁၂ခု၊ UN/INGO/ NGOအဆောက်အဦး များအပါအဝင် အဆောက်အအုံ ၁၁၀၀၀ ကျော် ထိခိုက်ပျက်စီးခဲ့ပြီး ULA/AAက ရှိသည့် အရင်းအမြစ်ဖြင့် တက်နိုင်သမျှ တည်ဆောက်ပေးနေသည်ဟု ပြောသည်။
ရက္ခိုင်ပြည်သူများသည် စစ်ဘေးဒဏ်၊ သဘာ၀ဘေးဒဏ်များကို အပြင်းထန်ဆုံး ခံစားနေရဟု ပြောသည်။
အကြမ်းဖက်စစ်ကောင်စီ၏ ရည်ရွယ်ချက်ရှိရှိ ဦးတည်တိုက်ခိုက်မှုကြောင့်ဘေးလွတ်ရာသို့ထွက်ပြေးကြရသူများရှိသကဲ့သို့ သဘာ၀ဘေးကြောင့် မြို့ရွာအိုးအိမ်များ စွန့်ခွာရသည့် ပြည်သူ များစွာရှိနေသည်ဟု ဦးခိုင်သုခက ပြောသည်။
မှတ်တမ်းများအရဘေးဒဏ်အမျိုးမိုးကြောင့်နေရပ်စွန့်ခွာ ပြည်သူ ၆သိန်းကျော်ရှိ ပြီး စစ်ဘေးရှောင်မိသားစုနှင့် မိုးရာသီ ရေဘေးကြောင့် ဒုက္ခ ရောက်နေသည့် မိသားစုများ ပါဝင်ကြောင်း အသိပေးသည်။
၎င်းတို့သည် အဆင်ပြေရာ၌ ခိုလှုံနေကြရသည်ဟုဆိုသည်။
ကုလနှင့် နိုင်ငံတကာနှင့် ပြည်တွင်းအဖွဲ့များ၏ အကူအညီများ စစ်ကောင်စီ ပိတ်ထား၍ ဒုက္ခသည်များ လုံလောက်သည့် အကူအညီမရဘဲဖြစ်နေသည်ဟု ပြောသည်။
“နိုင်ငံတကာ နဲ့ ပြည်ပ ကူညီရေးအဖွဲ့အစည်းတွေအနေနဲ့ ရက္ခိုင်အမျိုး သားအဖွဲ့ချုပ်က ဖွဲ့စည်းထားတဲ့ လူသားချင်းစာနာမှုနှင့် ညှိနှိုင်းရေးဆိုင်ရာ ပူးပေါင်းဆောင်ရွက်ရေးရုံး(HTCO)နဲ့ ချိတ်ဆက်ပြီး လူသားချင်း စာနာမှု လုပ်ငန်းတွေကို အခုထက် ပိုလို့ ထိထိရောက်ရောက်လုပ်ဆောင်ပေးဖို့ လိုအပ်ပါကြောင်း အလေးအနက် တိုက်တွန်းပြောကြားလိုပါတယ်”ဟု ဦးခိုင်သုခက ပြောကြားသည်။
