ဩဂုတ်-၁၈၊၂၀၂၅။ မေ/People’s Spring
စစ်ကိုင်းတိုင်း၊ ဝက်လက်မြို့နယ် အရှေ့တောင်ခြမ်း၊ နပဲပင်လှကျေးရွာ ဘုန်းကြီးကျောင်းကို စစ်ကောင်စီက လေကြောင်းတိုက်ခိုက်ခဲ့တာမို့ သံဃာ ၁ပါးနဲ့ ပြည်သူ ၂ဦး ထိခိုက်ခဲ့တယ်လို့ ဒေသခံတွေဆီက သိရပါတယ်။
ဒီနေ့မနက် ၁၀နာရီ ဝန်းကျင်မှာ တံတားဦး လေတပ်ကတက်လာတဲ့ ဂျက်ဖိုက်တာတစ်စီးနဲ့ ဘုန်းကြီး ကျောင်းဝန်းအတွင်းကို ဗုံးကြဲတိုက်ခိုက်သွားတာလို့ ဒေသခံတွေက ပြောပါတယ်။
ဗုံးကြဲခံရမှုမှာ အသက် ၇၀အရွယ် ကိုရင်ကြီးတစ်ပါး၊ အသက်၇၀ ဝန်းကျင်အရွယ် အဘွားအိုတစ်ဦးနဲ့ အသက် ၁၁နှစ်အရွယ် ယောကျာ်းလေးတစ်ဦးတို့ ဒဏ်ရာရခဲ့တယ်လို့ သိရပါတယ်။
Public Service Announcement
“တိုက်ပွဲမရှိပါဘူး။ ဘုန်းကြီးကျောင်းကို လာကြဲသွားတာ။ အသေဆုံးတော့မရှိဘူး။ သုံးဦးထိခိုက်ပြီး ဓမ္မာရုံတစ်ခုတော့ပျက်ဆီးသွားတယ်”လို့ Wetlet Informational Network တာဝန်ခံ ကိုနဂါးလေးက ပြောပါတယ်။
စစ်ကောင်စီတပ်က ဝက်လက်မြို့နယ်ကို ဆက်တိုက်ဗုံးကြဲတိုက်ခိုက်တာတွေပြုလုပ်နေပြီး ဩဂုတ် ၁၅ရက်ကလည်း ဝက်လက်မြို့နယ်အရှေ့တောင်ဘက်ခြမ်းကို ဗုံးကြဲတိုက်ခိုက်သွားပါသေးတယ်။
ဩဂုတ် ၁၁ရက်ကနေ ၁၃ ရက်အထိလည်း စစ်ကောင်စီတပ်က ဝက်လက်မြို့နယ်အရှေ့ခြမ်းကို သုံးရက်ဆက်တိုက် လေကြောင်းတိုက်ခိုက်မှုပြုလုပ်ခဲ့ပြီး ပြည်သူ ၇ဦးထပ်မနည်း သေဆုံးကာ ပြည်သူ အများအပြား ဒဏ်ရာရခဲ့ပါတယ်။
