သြဂုတ်-၃၀၊၂၀၂၅။ဇေအောင်/People’s Spring
မကွေးတိုင်း၊ နတ်မောက်မြို့နယ်မှာ စစ်ကောင်စီတပ်က စက်တပ်လေထီးနဲ့ဗုံးကြဲလို့ တောင်သူလုပ်နေတဲ့ သားအဖနှစ်ယောက် ဗုံးထိပြီး သမီးဖြစ်သူ သေဆုံးခဲ့ပါတယ်။
ဒီကနေ့ သြဂုတ် ၃၀ ရက် မနက် ၉ နာရီခန့်က နတ်မောက်မြို့နယ်၊ ကန်သာကျေးရွာနဲ့ ဖတ်တောရေကျေးရွာကြားကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ စက်တပ်လေထီး ၃ စီးနဲ့ ပေါင် ၃၀၀ ဗုံး ၄ လုံး ကြဲခဲ့တယ်လို့နတ်မောက်ဂဠုန် PDF တာဝန်ခံ ဗိုလ်အောင်ဒင်က ပြောပါတယ်။
စစ်တပ်ဗုံးကြဲမှုကြောင့် တောတိုက်ထဲ တောင်ယာလုပ်နေတဲ့ သားအဖနှစ်ဦးထိခိုက်ပြီး အသက် ၂၇ နှစ်အရွယ် သမီးဖြစ်သူမှာ နေရာတင်သေဆုံးခဲ့တယ်လို့ ဗိုလ်အောင်ဒင်က ပြောပါတယ်။
Public Service Announcement
“တောင်သူလုပ်နေတဲ့တဲပါ။ သမီးဖြစ်သူကနွားကျောင်းနေတာ။ အဖေဖြစ်သူကဆေးဖြန်းနေချိန်ထိခိုက်သွားတာပါ။ တိုက်ပွဲဖြစ်ပွားခြင်းမရှိဘဲ ကြဲသွားတာပါ။”လို့ ၎င်းကဆက်ပြောပါတယ်။
ထိခိုက်ဒဏ်ရာရရှိခဲ့တဲ့ အသက် ၅၀ အရွယ် ဖခင်ဖြစ်သူမှာလည်း ဒဏ်ရာပြင်းထန်ပြီး ဆေးကုနေရကြောင်း သိရပါတယ်။ ဒါ့အပြင် နွားနှစ်ကောင်လည်း သေဆုံးခဲ့ကြောင်း ဒေသခံတွေက ပြောပါတယ်။
ပြီးခဲ့တဲ့ ဩဂုတ် ၂၄ ရက်ညကလည်း နတ်မောက်မြို့နယ်၊လဲဘူးကျေးရွာကိုစစ်တပ်ကဗုံးကြဲခဲ့လို့ ကလေးငယ် ၂ ဦးအပါအဝင် ၅ ဦးသေဆုံးပြီး ၁၁ ဦးထက်မနည်း ထိခိုက်ဒဏ်ရာ ရရှိခဲ့ပါသေးတယ်။
