စက်တင်ဘာ -၁ ၊၂၀၂၅ ၊ ဆိုင်းမင်း/People’s Spring
ရှမ်းပြည်နယ်မြောက်ပိုင်း ကျောက်မဲမြို့နယ် ၊နောင်ပိန်ကျေးရွာဘက်မှာ စစ်တပ်ရဲ့ ထိုးစစ်ဆင်တိုက်ခိုက်မှုကြောင့် တိုက်ပွဲတွေပြင်းထန်နေပြီး နောင်ပိန် နဲ့အနီးတဝိုက်ရွာတွေက ဒေသခံပြည်သူတွေ ထွက်ပြေးတိမ်းရှောင်နေရတယ်လို့ ကူညီကယ်ဆယ်ရေးအဖွဲ့တွေ ထံကနေသိရပါတယ်။
နောင်ပိန်ရွာကို စစ်တပ်က ပြီးခဲ့တဲ့ နှစ်ပတ်ကစတင်ပြီး ထိုးစစ်ဆင်လာတာကြောင့် တိုက်ပွဲတွေပြင်းထန်နေတာပါ။
နောင်ပိန်ကျေးရွာအုပ်စုအတွင်းမှာရှိတဲ့ ကျေးရွာ ၁၀ရွာထက်မနည်း က ပြည်သူတွေဟာ သီပေါ၊လားရှိုး ဘက်ကို ထွက်ပြေးတိမ်းရှောင်နေရတာလို့သိရပါတယ်။
Public Service Announcement
သီပေါဟာ TNLA လက်အောက်မှာရှိပြီး လားရှိုးကတော့ စစ်ကောင်စီက ပြန်လည်ထိန်းချုပ်ထားတာပါ။
“ စစ်ရှောင်တွေကို ရသလောက် ခေါ်ထုတ်ပေးနေပါတယ် ၊ ကျွန်တော့ အသင်းတစ်သင်းထဲကို လူ၂၀၀ကျော်ရှိနေပြီ၊ ထပ်ပြီးလည်း ခေါ်ထုတ်ပေးဖို့ရှိနေသေးပါတယ်”လို့ လားရှို့မြို့အခြေစိုက် ကူညီကယ်ဆယ်ရေးသမားတစ်ဦးကပြောပါတယ်။
လားရှိုးမြို့ရှိ ရှမ်းစာပေယဉ်ကျေးမှုခန်းမ၊ မန်အိုင် ဘုန်းကြီးကျောင်းနဲ့ သီပေါမြို့က ဆွတ်လန်းကျောင်းတို့မှာ လာရောက်တိမ်းရှောင်နေကြတယ်လို့ သိရပါတယ်။
နောင်ပိန်ဘက်က လွယ်ပေါင်၊ ရေဆန်၊ နမ် ဝ၊ ဟိုဖိုင်၊ နမ့်ဟူး၊ ပန်စုံ၊ နမ့်ပြင်၊ လွယ်စောင့်၊ ခေါက်ဝိုး၊ ဟဲကွီ၊ ပန်လော့၊ နမ့်ဟန်ခိတ်၊ ပုံဝိုး ၊ကွမ်ဟင်၊ ကုန်းညောင်၊ နမ့်မော်ဘီလူး ၊နောင်မိန်း၊ ခဲလုံ၊ ထန်တပင်၊ ခေးနင်း စတဲ့ကျေးရွာတွေက ပြည်သူတွေ တိမ်းရှောင်နေရတယ်လို့ သိရပါတယ်။
“အရင်က ကျောက်မဲဘက်ဖြစ်ရင်တောင် နောင်ပိန်ဘက်ရှောင်ရတာ”လို့ ကျောက်မဲမြို့ခံတစ်ဦးကပြောပါတယ်။
လက်ရှိမှာ ကျောက်မဲမြို့ပေါ်က မြို့ခံတွေလည်း ကြိုတင်တိမ်းရှောင်တာတွေရှိလာတယ်လို့သိရပါတယ်။
လက်ရှိ တိုက်ပွဲက နောင်ပိန်ရွာလမ်းခွဲနဲ့ ပင်တိန်ရွာမှာ ဖြစ်ပွားနေတာဖြစ်ပြီး တိုက်ပွဲပြင်းထန်နေတယ်လို့ သိရပါတယ်။
