စက်တင်ဘာ-၃၊၂၀၂၅။လူအေး/People’s Spring
မန္တလေး – လားရှိူးပြည်ထောင်စုလမ်းမပေါ်ရှိသီပေါမြို့ဘော်ကြိုဘုရားအနီးကို စစ်ကောင်စီက ယနေ့ (စက်တင်ဘာ၃ရက်)၁နာရီခွဲခန့်တွင် လေကြောင်းမှဗုံးကြဲတိုက်ခိုက်ရာ ဒေသခံပြည်သူနှင့် တိရစ္ဆာန်အချို့ ထိခိုက်သေဆုံးမှုရှိခဲ့သည်။
ဘော်ကြိုဘုရားအနီးရှိနေအိမ်များကိုဂျက်ဖိုက်တာဖြင့်ဗုံးကြဲခြင်းဖြစ် သည်။
“အိမ်တွေရစရာမရှိအောင် ပျက်စီးသွားတယ်။ လူတယောက်ထိတယ်ကြားတယ်။ နောက်ပြီး အိမ်မွေးတိရိစ္ဆာန်တချို့သေဆုံးတာ ဟုတ်တယ်။ အခုလည်း Y 12ပတ်နေလို့လေ။ အပြင်မထွက်ရဲဘူး”ဟု သီပေါမြို့ခံတဦးက ပြောသည်။
Public Service Announcement
သီပေါမြို့သည် တအာင်းတပ်မတော်(TNLA) ထိန်းချုပ်ဒေသဖြစ်ပြီး စစ်ကောင်စီက မြေပြင် ထိုးစစ်ဆင်မည်ဟု ဝါဒဖြန့်နေသည့် ကျောက်မဲမြို့နှင့် တစ်ဆက်တည်းရှိသည်။
လက်တလောတွင်ကျောက်မဲမြို့နယ်၊ နောင်ပိန်ကျေးရွာ၌တိုက်ပွဲပြင်းထန်နေသည်။
ဩဂုတ်၂၉ရက်ကကျောက်မဲမြို့နယ်၊ပန်သပြေကျေးရွာဘုန်းကြီး ကျောင်းကို စစ်ကောင်စီက ဗုံးကြဲခဲ့ရာ သီလရှင်တစ်ပါးအပါအဝင် အမျိုးသမီး ၂ ဦး သေဆုံးပြီး ၆ဦးဒဏ်ရာရခဲ့သည်။
ယမန်နေ့ညကလည်းကျောက်မဲမြို့နယ်၊လွယ်ခေါ်ကျေးရွာကို စစ်ကောင်စီက ဗုံးကြဲခဲ့သည်။
TNLAနှင့် စစ်ကောင်စီတို့ တရုတ်နိုင်ငံတွင်ဆွေးနွေးနေသော်လည်း နှစ်ဖက်စလုံးကသတင်းထုတ်ပြန်ခြင်းမရှိသေးဘဲ တိုက်ပွဲများပိုမိုပြင်းထန်နေခြင်းဖြစ်သည်။
ဆွေးနွေးပွဲပျက်ကြောင်း သတင်းများထွက်ပေါ်နေသော်လည်း TNLAက အတည်မပြုသေးပေ။ ထို့အပြင် ဆွေးနွေးနေစဉ်အချိန်၌ စစ်ကောင်စီကလေကြောင်းတိုက်ခိုက်မှုများပိုမိုပြုလုပ်ခဲ့သည်။
