စက်တင်ဘာ−၇၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU)ညောင်လေးပင်ခရိုင်၊ မုန်း(မူး) မြို့နယ်တွင် စစ်ကောင်စီတပ် က လက်နက်ကြီးဖြင့် ပစ်ခတ်ခဲ့၍ ပြည်သူ ၂ဦး သေဆုံးကာ ၁ဦး ဒဏ်ရာရခဲ့ဟု KNU ဗဟိုက သတင်းထုတ်ပြန်သည်။
စက်တင်ဘာ၄ရက်ညပိုင်းတွင်စစ်ကောင်စီ၏ခမရ(၃၅၁)နှင့် ခလရ (၆၀) တပ်ရင်းမှရည်ရွယ်ချက်ရှိရှိ ကျေးရွာများအတွင်းသို့လက်နက်ကြီးပစ်ခတ်ခဲ့ခြင်းဖြစ်ဟု ဆိုသည်။
ထိုသို့ပစ်ခတ်ခဲ့၍မုန်းမြို့နယ်၊ဖိုးသောင်းစုရွာနေ အသက် (၅၅) နှစ်အရွယ် အမျိုးသား ၁ဦးနှင့် အသက် (၅၀)အရွယ် အမျိုးသား ၁ဦး သေဆုံးကာ (၅၈)နှစ်အရွယ် အမျိုးသမီး ၁ဦး ဒဏ်ရာရခဲ့ပြီး နွားအချို့ ထိမှန်သေဆုံးဟု အသိပေးသည်။
Public Service Announcement
စက်တင်ဘာ၃ရက်ကလည်းစစ်ကောင်စီ လက်နက်ကြီးကြောင့် မုန်းမြို့နယ် ငထွေစုတ်ကျေးရွာနေ အမျိုးသမီး ၁ဦး ဒဏ်ရာရခဲ့သည်။
စက်တင်ဘာ၂ရက်ကလည်း နတ်သံကွင်း စစ်ကောင်စီတပ် လက်နက်ကြီး ပစ်ခတ်၍ ရေလဲအရှေ့ဘက်ကမ်းကျေးရွာမှ အမျိုးသား ၁ဦးသေဆုံးကာ အသက် ၇၅နှစ်အရွယ် အဘိုးအို ၁ဦး ဒဏ်ရာရရှိပြီး နွား အချို့ ထိခိုက်သေဆုံးခဲ့သည်။
အာဏာသိမ်းစစ်တပ်မှလက်နက်ကြီးဖြင့်အဆက်မပြတ် ပစ်ခတ်မှုကြောင့် အပြစ်မဲ့ပြည်သူများထိခိုက်သေဆုံးရပြီး နေအိမ်များပျက်စီးသည့်အပြင် ပြည်သူများထိတ်လန့် ကြောက်ရွံမှုများစွာဖြင့် နေထိုင်ကြရဟု KNU ဗဟိုက သတင်းထုတ်ပြန်သည်။
