စက်တင်ဘာ-၁၄၊၂၀၂၅။မေရီ/People’s Spring
မန္တလေးမြို့မှာ မိုးသည်းထန်စွာရွာသွန်းနေတာကြောင့် လမ်းတွေရေလျှံနေပြီးယာဥ်တွေပိတ်နေကြောင်း မြို့ခံတွေက ပြောပါတယ်။
စက်တင်ဘာ ၁၃ ရက် ည ၁၁ နာရီခွဲခန့်ကတည်းက ဒီမနက်အထိ မိုးဆက်တိုက်ရွာသွန်းနေတာကြောင့် မန္တလေးမြို့က အဓိက လမ်းမကြီးတွေဖြစ်တဲ့ ၃၅ လမ်း၊ ၆၂ လမ်း၊ လမ်း ၆၀၊ ၆၅လမ်း၊ လမ်း ၃၀၊ ၇၄ လမ်း၊ စတဲ့ လမ်းမကြီးတွေရဲ့ နေရာတချို့မှာ ရေမြုပ်နေကြောင်း မြို့ခံတွေက ပြောပါတယ်။
“ရေတွေ လမ်းတလျှောက်အရမ်းများတယ်။ ကားတွေ ကြပ် ပိတ်နေတာပဲ။ တချို့ကားတွေ ဆင်းတွန်းနေရတယ်”လို့ မြို့ခံတဦးက ပြောပါတယ်။
Public Service Announcement
ဒါ့အပြင် မိုးသည်းထန်စွာ ရွာသွန်းတာကြောင့် အောင်မြေသာစံမြို့နယ်၊ပြည်ကြီးကျက်သရေအနောက်ရပ်ကွက်၊ ၂၃လမ်းနဲ့ ၂၄လမ်းကြား၊ ၈၆လမ်းမှာလည်း စိန်ပန်းပင်လဲကျပြီး ကားတစ်စီး ထိခိုက်ပျက်စီးခဲ့တယ်လို့ သိရပါတယ်။
မန္တလေးဟာ မိုးရွာတိုင်း ရေလျှံတဲ့ပြဿနာ ကြုံတွေ့ခဲ့ရပြီး ပြည်သူ့အစိုးရလက်ထက်တုန်းကတော့ အဲဒီပြဿနာ လျော့ပါးသွားခဲ့ပါသေးတယ်။ စစ်ကောင်စီအာဏာသိမ်းပြီးချိန်မှာတော့စည်ပင်သာယာလုပ်ငန်းတွေလည်း လျော့တိလျော့ရဲ ဖြစ်လာခဲ့ပြီး အခုလို မိုးရွာတာနဲ့ ရေကြီးရေလျှံတာတွေ ပြန်လည်ဖြစ်ပွားလာတာဖြစ်ကြောင်း မြို့ခံတွေက ပြောပါတယ်။
အမျိုးသားညီညွတ်ရေးအစိုးရNUGရဲ့မိုးဇလဌာနကတော့ စက်တင်ဘာ ၁၄ ရက်အထိ မိုးလေသခန့်မှန်းချက်ထုတ်ပြန်ခဲ့ရာမှာစစ်ကိုင်းတိုင်း၊ ရန်ကုန်တိုင်း၊ ကချင်ပြည်နယ်၊ ချင်းပြည်နယ်၊ရခိုင်ပြည်နယ်နဲ့ ရှမ်းပြည်နယ်တို့မှာ နေရာကွက်ပြီး မိုးကြီးခြင်းတွေကြောင့် မြေပြိုခြင်း၊ တောင်ပြိုခြင်းနှင့် ကမ်းပါးပြိုခြင်းများဖြစ်ပေါ်နိုင်လို့အထူးသတိပြုနေထိုင်သင့်ကြောင်းသတိပေးထားပါတယ်။
