စက်တင်ဘာ−၁၈၊ ၂၀၂၅။ ဟန်နွေ/People’s Spring
အာဏာသိမ်းစစ်ကောင်စီတပ်သားများအနေဖြင့် တော်လှန်ရေးတပ်ဖွဲ့များနှင့်အမြန်ဆုံးချိတ်ဆက်ပြီး အလင်းဝင်ကြရန် ကလေးခရိုင် ပြည်သူ့ကာကွယ်ရေးအဖွဲ့(ပကဖ) ဒရုန်းတပ်ဖွဲ့တာဝန်ခံက ပြောကြားသည်။
ကလေးခရိုင် ဒရုန်းတပ်ဖွဲ့ Wings of Kalay ထံသို့ စစ်ကောင်စီတပ်သား ၁၄ဦး လက်နက် ၇လက် ယူလာပြီး အလင်းဝင်ရောက်ခဲ့မှု အခြေအနေနှင့် ရှင်းလင်းပြောကြားစဉ် စစ်ကောင်စီတပ်တွင်း ကျန်နေသည့် စစ်ကောင်စီတပ်သားများကို ယခုကဲ့သို့တိုက်တွန်းလိုက်ခြင်းဖြစ်သည်။ ပြီးခဲ့သည့် ဇူလိုင်နှင့် ဩဂုတ် ၂လတာအတွင်း Wings of Kalay ထံ အလင်းဝင်လာသည့် စစ်ကောင်စီတပ်သား ၁၄ဦး ရှိသည်ဟုဆိုသည်။
“အလင်းဝင်လာပြီဆိုလည်း လက်နက်ခဲယမ်းနဲ့အ ပြည့်အစုံနဲ့ အလင်းဝင်လာရင်တော့ ပိုလို့အကောင်းဆုံးပဲ။ အဲဒီကနေ ပြည်သူ့ရင်ခွင်က ချီးမြှင့်တဲ့ ငွေရေးကြေးရေးလေးနဲ့ အပြင်လောကမှာ နေထိုင်တာပဲ ဖြစ်ဖြစ် ကျနော်တို့ တပ်ဖွဲ့တွေထဲမှာပဲ စစ်ကောင်စီကို ပြန်လည်တွန်းလှန်တိုက်ခိုက်မှာပဲ ဖြစ်ဖြစ် ပါလာတဲ့ လက်နက်ခဲယမ်းနဲ့တိုက်ခိုက်လို့ရတာပေါ့” ဟု ကလေးခရိုင် ပကဖ ဒရုန်းတပ်ဖွဲ့ တာဝန်ခံက ပြောသည်။
Public Service Announcement
စစ်ကောင်စီတပ်တွင်း ကျန်နေသည့် စစ်ကောင်စီတပ်သားများ နီးစပ်ရာ တော်လှန်ရေးတပ်ဖွဲ့များနှင့် အမြန်ဆုံးချိတ်ဆက်ရန်လည်း ၎င်းက တိုက်တွန်းသည်။
“ မကြာခင်လည်း တနိုင်ငံလုံး အနေနဲ့ ထိုးစစ်ကြီးလည်း ဆင်နွှဲတော့မှာ ဖြစ်တဲ့အတွက် ကျနော်တို့ဘက်က တကယ်ကိုဆင်နွှဲကာချမှ စခန်းထဲတိုက်ခါမှ ကျည်ကုန်သွားလို့ လက်မြောက်တာကျတော့ လုံး၀ အဆင်မပြေဘူး။ အခုအချိန်မှာ တယောက်နဲ့ တယောက် သေနတ်တွေမပစ်ရခင် တယောက်နဲ့တယောက် ကိုယ်ပစ်သူပစ် မပစ်ရ ခင်လေးမှာ အတက်နိုင်ဆုံး ဖုန်းနဲ့သော်လည်းကောင်း အင်တာနက်နဲ့သော်လည်းကောင်း နီးစပ်ရာ ဆွေမျိုးအသိုင်းအဝိုင်းနဲ့ သော်လည်းကောင်း ဒါမျိုးတွေအမြန်ဆုံး ချိတ်ဆက်ပြီး ပြည်သူ့ရင်ခွင်အမြန်ဆုံးခိုလှုံကြပါလို့ကျနော်တို့တိုက်တွန်းချင်ပါတယ်” ဟု ကလေးခရိုင် ပကဖ ဒရုန်းတပ်ဖွဲ့ တာဝန်ခံက ပြောသည်။
ကလေးခရိုင် ပကဖ ဒရုန်းတပ်ဖွဲ့ Wings of Kalay ထံ အလင်းဝင်လာသည့် စစ်ကောင်စီတပ်ဖွဲ့ဝင် ၁၄ဦးသည် စစ်ကောင်စီတပ်က ပေါ်တာဆွဲ အဓမ္မ စုဆောင်းခဲ့သူများဖြစ်ပြီး ၎င်းတပ်သားသစ်အများစုမှာ ရန်ကုန်၊ ပဲခူး၊ ပြည်၊ ဧရာ၀တီ စသည့် ဒေသများမှ ဖြစ်သည်ဟု ပြောသည်။
“အဲဒီဘက်က ပြည်သူတွေကို ပြောချင်တာက ဂရုစိုက်ပါ။ စကစတွေပေါ်တာမဆွဲခင်လည်း ပြည်သူ့ကာကွယ်ရေးတပ်မတော်တွေ၊ ပကဖတွေ နီးစပ်ရာ ERO အဖွဲ့အစည်းတွေမှာ လွတ်မြောက်နယ်မြေတွေလည်းရနေပါပြီ။ အဲဒီ လွတ်မြောက်နယ်မြေတွေမှာ အချိန်မီသွားပြီးခိုလှုံကြပါ ။ အဓိကအားဖြင့် လူငယ်တွေကိုတိုက်တွန်းချင်တယ်” ဟု ကလေးခရိုင် ပကဖ ဒရုန်းတပ်ဖွဲ့ တာဝန်ရှိသူက ပြောသည်။
စစ်ကောင်စီဘက်က ပေါ်တာဆွဲ၍ ပါသွားပါက အသက်အာမခံချက်မရှိကြောင်း ၎င်း ကဆိုသည်။
“ကျနော်တို့ ဘက်မှာ ဆိုရင်တော့ လူကို လူလို ဆက်ဆံတဲ့ တော်လှန်ရေးတပ်ဖွဲ့တွေဖြစ်တဲ့အတွက် လူကို လူလိုဆက်ဆံတဲ့ တော်လှန်ရေးတပ်ဖွဲ့တွေဘက် ဝင်ဖို့ပဲ ကျနော်တို့က အကြံပေးတယ်” ဟု ပကဖ ဒရုန်းတပ်ဖွဲ့ တာဝန်ရှိသူက ပြောသည်။
စစ်ကောင်စီက နည်းမျိုးစုံဖြင့်ပေါ်တာဆွဲသည့် ဖြစ်စဉ်များ နိုင်ငံတဝန်း ဖြစ်ပေါ်နေ၍ ဂရုစိုက်ကြရန်လည်း လူငယ်များကို ၎င်းက ထပ်လောင်းတိုက်တွန်းသည်။
စစ်အာဏာရှင်အမြစ်ပြတ်မှ အဆင်ပြေမည်ဖြစ်၍ တော်လှန်ရေး လုပ်ကြရန် လူငယ်များကို တိုက်တွန်းသည်။အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်ကလည်း စစ်အာဏာရှင်စနစ် အဆုံးသတ်နိုင်ရေး အထွေထွေထိုးစစ်ကို မဖြစ်မနေ ပြုလုပ်ရမည်ဖြစ်ကြောင်း ယခုလအတွင်း အသိပေးပြောကြားထားသည်။
