စက်တင်ဘာ-၁၈၊ ၂၀၂၅။ထားမြတ်/People’s Spring
တနင်္သာရီတိုင်းရှိ ထားဝယ်၊ သရက်ချောင်း၊ လောင်းလုံနှင့် ရေဖြူမြို့နယ်ရှိ ကျေးရွာများကို စစ်ကောင်စီက လေယာဉ်ဖြင့် ဗုံးပတ်ကြဲတိုက်ခိုက်ခဲ့၍ ပြည်သူ ၃ဦးသေဆုံးကာ ၄ဦး ဒဏ်ရာရခဲ့ကြောင်း ကရင်အမျိုးသားအစည်း အရုံး(KNU) မြိတ်-ထားဝယ်ခရိုင်က ထုတ်ပြန်သည်။
စက်တင်ဘာ ၁၇ရက်ကထားဝယ်မြို့နယ်ရှိပကာရီကျေးရွာ ၊ ပခပ်ကျေးရွာ ၊ ရေဝိုင်းကျေးရွာ၊ သရက်ချောင်းမြို့နယ်ရှိ ကင်းရှေ့ကျေးရွာ ၊ ဥတ္တူကျေးရွာ ၊ စော်ဖျားကျေးရွာ ၊ မဲနယ်အိုး ကျေးရွာ၊ လောင်းလုံမြို့နယ်ရှိ ဝေဒီကျေးရွာ ၊ သပြေရှောင်ကျေးရွာ ၊ ကြက်ယက်တွင်းကျေးရွာ နှင့်ရေဖြူမြို့နယ်ရှိ ကျောက်တွင်းကျေးရွာတိုကို စစ်ကောင်စီက Y12 လေယာဉ် ၂စင်းဖြင့် ၁၂၀ မမ ဗုံးသီးများ ကြဲချခဲ့ခြင်းဖြစ်သည်ဟု ဆိုသည်။
ထိုသို့ ဗုံးသီးချတိုက်ခိုက်ခဲ့၍ လောင်းလုံးမြိုနယ်၊ ဝေဒီရွာကျေးရွာရှိ အသက်(၆၀)အရွယ် အမျိုးသမီး တဦး၊ ၎င်း၏ သားမီး နှင့်သားမက်ဖြစ်သူတို့ သေဆုံးကာ အသက်(၆၀) အရွယ် အမျိုးသား တဦး၊ အသက် ၁၀နှစ်အောက် ကလေးငယ် ၂ဦးနှင့် အခြား ကလေးငယ် တဦး တို့ ဒဏ်ရာရခဲ့ဟု အသိပေးသည်။
Public Service Announcement
” တိုက်ပွဲဖြစ်ပွားမှုမရှိဘဲ ပြည်သူလူထုကို ပစ်မှတ်ထားပြီးတော့ လေယာဉ်နဲ့ ဗုံးကြဲတာပေါ့။ ဒါကတော့ လူ့အခွင့်အရေးချိုးဖောက်တာပေါ့။” ဟု ဒေသသတင်းရင်းမြစ်တဦးက ပြောသည်။
စစ်ကောင်စီတပ်သည် တနင်္သာရီတိုင်းအတွင်း တိုက်ပွဲများ၌ အထိနာလျက်ရှိရာ ပြည်သူကို ပစ်မှတ်ထားသည့် လေကြောင်း၊ လက်နက်ကြီး တိုက်ခိုက်မှုများ မကြာခဏ ပြုလုပ်နေခြင်းဖြစ်သည်။
စစ်တပ်က အာဏာရှင်ဆန်ဆန် ပြည်သူကို ပစ်မှတ်ထား ဗုံးကြဲတိုက်ခိုက်နေသလို တဖက်တွင်လည်း စစ်အာဏာရှင်များ သက်ဆိုးရှည်စေရန် ရွေးကောက်ပွဲလုပ်ဆောင်ရန် ကြိုးပမ်းနေကြောင်း ၎င်းက ပြောသည်။
ထို့ကြောင့် ပြည်သူများအနေဖြင့် စစ်ကောင်စီ၏ ရွေးကောက်ပွဲကို ပူးပေါင်းခြင်းမပြုရန် ဒေသ သတင်းရင်းမြစ်က တိုက်တွန်းသည်။
စစ်ကောင်စီသည် နိုင်ငံတဝန်း ပြည်သူများကို ပစ်မှတ်ထားသည့် လေကြောင်းတိုက်ခိုက်မှုများကို အရှိန်မြှင့်လုပ်ဆောင်လျက်ရှိရာ ပြည်သူသေဆုံးထိခိုက်မှုများစွာ ဖြစ်ပေါ်လျက်ရှိသည်။
