စက်တင်ဘာ-၂၄၊ ၂၀၂၅။ ဇေအောင်/People’s Spring
မုံရွာမြို့ အနောက်မြောက်တိုင်းစစ်ဌာနချုပ်အနီးမှာ စစ်သားဟောင်း ဖွင့်ထားတဲ့ သံတိုသံစဆိုင်မှာ သံတိုသံစထုခွဲရင်း ပေါက်ကွဲမှုဖြစ်ပွားပြီး တစ်ဦးသေဆုံးခဲ့ပါတယ်။
မနေ့က စက်တင်ဘာ ၂၃ ရက် နေ့လယ် ၁ နာရီခွဲခန့်က မုံရွာအနောက်မြောက်တိုင်း စစ်ဌာနချုပ်အနီး အလုံရပ်ကွက်မှာ ဖွင့်ထားတဲ့ သံတိုသံစဆိုင်မှာ သံတိုသံစတွေကိုထုခွဲရင်း ပေါက်ကွဲမှုဖြစ်ပွားပြီး ကိုထွန်းဇော်လင်းဆိုသူ သေဆုံးခဲ့ကြောင်း၊ ဒါ့အပြင် ဆိုင်ပိုင်ရှင် အပါအဝင် အလုပ်သမား ၂ ဦးပါ ထိခိုက် ဒဏ်ရာရရှိခဲ့ကြောင်း မုံရွာမြို့နယ်သတင်းမှန်ပြန်ကြားရေးအဖွဲ့က အသိပေးပါတယ်။
“ ပေါက်ကွဲမှုဖြစ်တဲ့နေ့က ကိုထွန်းဇော်လင်း ဆိုသူဟာ သံတိုသံစ တွေကို ထုခွဲရင်း မိုင်းမှန်းမသိဘဲ ထုခွဲလိုက်ရာကနေ ပေါက်ကွဲမှု ဖြစ်ပွားခဲ့တာလို့ သိရပါတယ်” လို့ မုံရွာမြို့နယ်သတင်းမှန်ပြန်ကြားရေးအဖွဲ့က ဆိုပါတယ်။
Public Service Announcement
“ နမခနား၊ အလုံသုံးထောင့်ချွန်းနားက သံတိုသံစဆိုင် ပေါက်ကွဲမှု ဖြစ်တာ။ အလုံသုံးထောင့်ချွန်းက စစ်ဆေးရေး ဂိတ်လည်းရှိတယ်။” လို့ ဒေသခံတစ်ဦးက ပြောပါတယ်။
ပေါက်ကွဲမှုဖြစ်တဲ့ ကောင်းကောင်း သံတိုသံစ ဆိုင်ပိုင်ရှင်ဟာ စစ်သားဟောင်း တစ်ဦးဖြစ်ပြီး စစ်ကောင်စီတပ်သားတွေက ၎င်းတို့သိမ်းဆည်းလာတဲ့ မိုင်းလုံးတွေကို အရက်ဖိုးရဖို့ သံတိုသံစအဖြစ် ပြန်လည်ရောင်းချလာတဲ့အခါ ဝယ်ယူမိတယ်လို့ သိရှိရကြောင်း မုံရွာမြို့နယ်သတင်းမှန်ပြန်ကြားရေးအဖွဲ့က ဆိုပါတယ်။
စစ်ကောင်စီတပ်သားတွေဟာ မုံရွာ-မန္တလေးလမ်းပေါ် သွားလာနေတဲ့ ခရီးသည်တင်ကားတွေကို တားဆီးပြီး ပြည်သူတွေကို မိုင်းရှင်းခိုင်းခြင်း၊ ခရီးသည်ကားတွေပေါ် မိုင်းများတင်ပေးပြီး မုံရွာအဝင်က ဂိတ်တွေမှာ ချထားခိုင်းတာတွေ ပြုလုပ်လေ့ရှိကြောင်း သတင်းရရှိပါတယ်။
