စက်တင်ဘာ-၂၅၊ ၂၀၂၅။ ထားမြတ်/People’s Spring
ပြည်သူ့ကာကွယ်ရေးတပ်မတော်သားတွေအနေနဲ့ အရပ်သား ပြည်သူတွေကို အကာအကွယ်ပေးရမှာ ဖြစ်ပြီး လူသားဆန်စွာနဲ့ လေးစားစွာ ဆက်ဆံဖို့လိုအပ်ကြောင်း အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာ ဝန်ကြီးဌာနက ထပ်မံ နှိုးဆော်လိုက်ပါတယ်။
လူ့အခွင့်အရေးဆိုင်ရာ ဝန်ကြီးဌာနအနေနဲ့ ပြည်သူ့ကာကွယ်ရေးတပ်တွေလိုက်နာရမယ့် စစ်ဘက်ဆိုင်ရာကျင့်ဝတ်တွေနဲ့ ပတ်သက်ပြီး အခါအားလျော်စွာ အသိပေးချက်တွေ ထုတ်ပြန်လျက်ရှိရာ အရပ်သားပြည်သူတွေနဲ့ပတ်သက်ပြီးလိုက်နာရမယ့်အချက်တွေကို စက်တင်ဘာ ၂၄ရက်မှာ ထပ်လောင်း ဖော်ပြခဲ့တာပါ။
” ပြည်သူ့ကာကွယ်ရေးတပ်မတော်သားတွေ တိုက်ပွဲဝင်ရတယ့် ရည်ရွယ်ချက်တွေထဲမှာဆိုရင် မတရားမှုကိုလက်မခံလိုခြင်းနဲ့ ကိုယ့်ပြည်သူကို ကာကွယ်ခြင်းတွေဟာ ရေသောက်မြစ်အဖြစ်ပါဝင်တဲ့အချက်တွေဖြစ်ပါတယ်။အရပ်သားပြည်သူတွေအပေါ် လူသားဆန်မှုနဲ့လေးစားစွာဆက်ဆံရမှာဖြစ်ပြီး အရပ်သားပြည်တွေအပေါ် ဖိနှိပ်တာတွေ၊ လူ့အခွင့်အရေးချိုးဖောက်တာတွေမလုပ်ဖို စတဲ့အချက်တွေကို အမျိုးသားညီညွတ်ရေးအစိုးရပြည်သူ့ကာကွယ်ရေးတပ်မတော်က စစ်ဘက်ဆိုင်ရာကျင့်ဝတ်တွေထဲမှာအလေးပေးထည့်သွင်းထားပါတယ်”လို့ ဝန်ကြီးဌာနရဲ့ နှိုးဆော်ချက်မှာ ဖော်ပြထားပါတယ်။
Public Service Announcement
လူ့အခွင့်အရေးဆိုင်ရာဝန်ကြီးဌာနအနေနဲ့လည်း ဒီစစ်ဘက်ဆိုင်ရာကျင့်ဝတ်တွေကို လိုက်နာနိုင်ဖိုအတွက် မြေပြင်မှာ လူ့အခွင့်အရေးဆိုင်ရာ တာဝန်ခံတွေကနေ စဉ်ဆက်မပြတ် ပညာပေးပိုချမှုတွေ လုပ်ဆောင်နေ ကြောင်း အသိပေးပါတယ်။
ဒါ့အပြင် ကျင့်ဝတ်ချိုးဖောက်မှုတွေ ရှိလာခဲ့ရင်လည်း ပြည်သူလူထုကနေ တိုင်ကြားနိုင်ဖိုအတွက် သက်ဆိုင်ရာဝန်ကြီးဌာနကိုဖြစ်စေ၊ လူ့အခွင့်အရေးဆိုင်ရာဝန်ကြီးဌာနကိုဖြစ်စေ တိုင်ကြားနိုင်ဖို တိုင်ကြားရေးယန္တရားတွေကိုပါ ဖွင့်လှစ်ထားကြောင်း ထုတ်ပြန်ပါတယ်။
ပြည်သူ့ကာကွယ်ရေးတပ်ဖွဲဝင်တိုင်းဟာ ဒီစစ်သည်တော်ကျင့်ဝတ်တွေကို တိတိကျကျလိုက်နာပြီး ပြည်သူ့ကိုမျက်နှာမူပြီး ကာကွယ်သူတွေဖြစ်ကြောင်းသက်သေထူရင်း ပြည်သူနဲ့တသားတည်းရှိနေကြရမှာလို့လည်း သတိပေးနှိုးဆော်ထားပါတယ်။
တဖက်မှာလည်း အာဏာသိမ်းစစ်ကောင်စီဟာ စိတ်ဓာတ်၊ ကျင့်ဝတ် စည်းကမ်း အားလုံးချွတ်ခြုံကျပြီး ပြည်သူကို သွေးအေးအေးနဲ့ နည်းမျိုးစုံ အကြမ်းဖက် သတ်ဖြတ်နေတယ်လို့ အမျိုးသားညီညွတ်ရေးအစိုးရ ပြည်ထောင်စုဝန်ကြီး ဦးရည်မွန်က ပြောပြထားပါတယ်။
ဒီလို လူမဆန်တဲ့ အကြမ်းဖက်စစ်တပ်ရဲ့ အုပ်စိုးမှုကို ပြည်သူတွေလက်မခံ သလို လူစိတ်မရှိတဲ့ အကြမ်းဖက်လက်နက်ကိုင်တပ်ဖွဲ့ကို တပ်မတော်အဖြစ် သတ်မှတ်ပြီး တိုင်းပြည်အိမ်ဦးခန်းမှာ ဆက်ထားဖို့ဆိုတာ ဘယ်လိုမှ မဖြစ်နိုင်တော့ဘူးလို့လည်း ဝန်ကြီးက ပြောပါတယ်။
