အောက်တိုဘာ-၉၊၂၀၂၅။People’s Spring
အာဏာသိမ်းစစ်ကောင်စီကလုပ်မယ့်ရွေးကောက်ပွဲနဲ့ ပတ်သက်ပြီး ဆွေးနွေးဖို့မလေးရှား နိုင်ငံခြားရေး ဝန်ကြီးဟာမြန်မာနိုင်ငံကို သွားရောက်မယ်လို့ မလေးရှား အစိုးရကထုတ်ပြန်ပါတယ်။
မလေးရှားဟာအရှေတောင်အာရှ နိုင်ငံများ အစည်းအရုံး(အာဆီယံ)ရဲ့အလှည့်ကျဥက္ကဋ္ဌတာဝန်ယူထားတဲ့ နိုင်ငံဖြစ်ပါတယ်။နိုင်ငံခြားရေးဝန်ကြီးမိုဟာမက်ဟာဆန်ဟာနေပြည်တော်ကို အောက်တိုဘာ ၉ ရက်နေ့မှာ တစ်ရက်တာခရီးသွားရောက်မယ်လို့ အစိုးရက ထုတ်ပြန်ပါတယ်။
သူ့ရဲ့ တစ်ရက်တာ ခရီးစဉ်မှာ အတောအတွင်း ဟာဆန်ဟာ စစ်ခေါင်းဆောင် မင်းအောင်လှိုင်နဲ့ စစ်ကောင်စီ နိုင်ငံခြားရေး ဝန်ကြီးတို့ကို တွေ့ဆုံမှာ ဖြစ်ပါတယ်။ ပြီးတော့ နှစ်ကုန်ကျရင် စစ်ကောင်စီက ဦးဆောင်ပြီး ပြုလုပ်မယ့် ရွေးကောက်ပွဲကိစ္စ၊ တိုးတက်မှု မရှိဘဲ ရပ်တန့်နေတဲ့ မြန်မာ့ ငြိမ်းချမ်းရေး လုပ်ငန်းစဉ် ကိစ္စတွေကို ဆွေးနွေးဖို့လည်း စီစဉ်ထားကြောင်း သိရပါတယ်။
Public Service Announcement
မူလက မလေးရှား၊ အင်ဒိုနီးရှား၊ ထိုင်းနဲ့ ဖိလစ်ပိုင်တို့ အာဆီယံ ၄ နိုင်ငံရဲ့ နိုင်ငံခြားရေး ဝန်ကြီးတွေဟာ စက်တင်ဘာ ၁၉ ရက်နေ့မှာ မြန်မာနိုင်ငံကို သွားရောက်ပြီး စစ်ကောင်စီနဲ့ ဆွေးနွေးဖို့ စီစဉ်ထားပေမယ့် နောက်တော့ အချိန်ရွှေ့ခဲ့တာ ဖြစ်ပါတယ်။
စစ်တပ် အာဏာမသိမ်းခင်က မြန်မာနိုင်ငံကို အုပ်ချုပ်ခဲ့တဲ့ အမျိုးသား ဒီမိုကရေစီ အဖွဲ့ချုပ် (NLD) အပါအဝင် နိုင်ငံရေး ပါတီပေါင်း ၄၀ ကျော်ဟာ စစ်ကောင်စီ ကြီးမှူးတဲ့ ရွေးကောက်ပွဲမှာ မပါဝင်ကြ၊ ဒါမှမဟုတ် ပါဝင်ခွင့် ပိတ်ပင်ခံထားကြရပါတယ်။ NLDဟာ ၂၀၂၀ ရွေးကောက်ပွဲမှာ လူထုထောက်ခံမဲ ၈၂ ရာခိုင်နှုန်းထိ ရရှိခဲ့ပါတယ်။
မြန်မာ့အရေး စောင့်ကြည့်လေ့လာနေတဲ့ နိုင်ငံတကာ အကဲခတ်တွေကတော့ မလေးရှား အပါအဝင် အာဆီယံ နိုင်ငံခြားရေး ဝန်ကြီးတွေ အနေနဲ့ မြန်မာနိုင်ငံကို မသွားတာက ပိုကောင်းကြောင်း၊ စစ်ကောင်စီရဲ့ ရွေးကောက်ပွဲဟာ လွတ်လပ်ပြီး တရားမျှတမယ့် အကြောင်းရင်း ဘာတစ်ခုမှ မရှိကြောင်း စက်တင်ဘာလ ခရီးစဉ် မရွှေ့ဆိုင်းခင်တုန်းက ပြောကြားထားဖူးပါတယ်။
အမျိုးသား ညီညွတ်ရေး အစိုးရ (NUG)ရဲ့ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီး ဒေါက်တာ ဆာဆာကလည်း အာဆီယံဟာ မြန်မာ့ ငြိမ်းချမ်းရေးကို အမှန်တကယ် လိုလားတယ်ဆိုရင် လူထုက ဦးဆောင်တဲ့ လုပ်ငန်းစဉ်မျိုးကို ထောက်ခံရမှာဖြစ်ပြီး စစ်တပ်က ဖန်တီးထားတဲ့ ဟန်ဆောင်ပန်ဆောင် ကိစ္စမျိုးကို အားပေးရမှာ မဟုတ်ကြောင်း၊ အဲဒီလိုဆိုရင် အာဏာရှင်ကို တရားဝင်မှု ပေးတာနဲ့ ဘာမှ မခြားကြောင်း သတိပေး ထောက်ပြထားခဲ့ပါတယ်။
ကိုးကား- Reuters
