နိုဝင်ဘာ-၁၀၊ ၂၀၂၅။ ထားမြတ်/People’s Spring
ရက္ခိုင်အမျိုးသားအဖွဲ့ချုပ်(ULA/AA)နဲ့ ချင်းညီနောင် ခေါင်းဆောင်တွေ တွေ့ဆုံမှုမှာ စစ်ကောင်စီရဲ့ တန်ပြန်ထိုးစစ်ကိစ္စကို ဆွေးနွေးခဲ့သလို စစ်ရေးအပြန်အလှန်ကူညီဖို့၊ အနာဂတ်မှာ နိုင်ငံရေး၊ စီးပွားရေး မဟာမိတ်အဖြစ် ပူးပေါင်းချိတ်ဆက်ဖို့ ဆွေးနွေးခဲ့ကြောင်း ချင်းညီနောင်ပြောရေးဆိုခွင့်ရှိသူ ဆလိုင်းယောမာန်က ပြောပါတယ်။
နိုဝင်ဘာ ၈ရက်ကကျင်းပတဲ့ ချင်းညီနောင်ရံပုံငွေရှာဖွေပွဲ အစီအစဉ်မှာ ဆလိုင်းယောမာန်က အောက်တိုဘာအတွင်းက AA တပ်မှူးချုပ်ဗိုလ်ချုပ်ထွန်းမြတ်နိုင်အပါအဝင် ULA/AA ထိပ်ပိုင်းခေါင်းဆောင်တွေကို သွားရောက်တွေ့ဆုံခဲ့တဲ့ ရက္ခိုင်ခရီးစဉ်အကြောင်း ပြောပြခဲ့တာပါ။
” ပြီးခဲ့တဲ့လကပဲ တွေ့ကြတယ် ဆုံကြတယ်။ ဆွေးနွေးကြတယ်။ အဓိကတော့ တော်လှန်ရေးနဲ့ ပတ်သက်လို့ပါ။ တော်လှန်ရေးနဲ့ ပတ်သက်လို့ စစ်ရေးမှာ ဘယ်လိုရှိမလဲ ဘယ်လိုပူးပေါင်းကြမလဲ။ ဘယ်လိုမျိုး အပြန်အလှန် ကူညီကြမလဲပေါ့။ အဓိကတော့ စစ်ကောင်စီရဲ့ တန်ပြန်ထိုးစစ်လာနိုင်တာကို ခန့်မှန်းကြတာပေါ့။ ပြင်ဆင်ထားကြတာပေါ့။ အဲဒီအတွက် ပူးပေါင်းကြတာပေါ့” လို့ ဆလိုင်းယောမာန်က ပြောပါတယ်။
Public Service Announcement
ရက္ခိုင်ခရီးစဉ်မှာ မြို့ကြီးအတော်များများကို လွတ်လပ်စွာသွားလာခဲ့ကြောင်းလည်း ဆလိုင်းယောမန်က ပြောပါတယ်။ ရက္ခိုင်နဲ့ ချင်းဟာ နီးနီးလေးသာဖြစ်လို့ နောင်မှာ အပြန်အလှန် ပူးပေါင်းချိတ်ဆက်ဖို့ ကိစ္စတွေပါ ဆွေးနွေးခဲ့တယ်လို့ အသိပေးပါတယ်။
“စစ်ရေးမဟာမိတ်အပြင် နောက်နောင်ကျရင် နိုင်ငံရေးမဟာမိတ် စီးပွားရေး မဟာမိတ် အထိ အဲဒီလိုမျိုး ပူးပေါင်းချိတ်ဆက်ဖို့။ လူမျိုးချင်း အပြန်အလှန် ကူညီဖေးမကြဖို့ပေါ့” လို့ ဆလိုင်းယောမာန်က ပြောပါတယ်။
ULA/AA သဘောထားက ရက္ခိုင်တွေ ကြီးပွားတိုးတက်ရင်ချင်းတွေ ခံစားဖို့၊ ချင်းတွေကြီးပွားတိုးတက်ရင် ရက္ခိုင်တွေလည်း ခံစားရဖို့ အပြန်အလှန် အကျိုးစီးပွားရှိအောင် စဉ်းစားကြဟု ဆလိုင်းယောမာန်က ပြောပါတယ်။
ခရီးစဉ်အတွင်း သင်ခန်းစာယူစရာ လေ့လာသင်ယူစရာများစွာ ရရှိခဲ့ပြီး အကျိုးရှိဆုံးမှာ ULA/AA အကြီးအကဲ အတော်များများနဲ့ တွေ့ဆုံခဲ့ရတာလို့ ပြောပါတယ်။
ချင်းညီနောင်အနေနဲ့ ချင်းပြည်နယ်က ကျင်ဒွေး၊ မတူပီ၊ မင်းတပ်၊ ကန်ပက်လက်နဲ့ ဖလမ်းမြို့နယ်တွေကို မဟာမိတ်တွေနဲ့ တိုက်ခိုက်သိမ်းပိုက်ရာမှာ AA ရဲ့ စစ်ရေးအကူအညီများစွာ ရရှိခဲ့တယ်လို့လည်း မြို့သိမ်း စစ်ဆင်ရေးအောင်ပွဲတွေမှာ ချင်းညီနောင်က အသိပေးထားပါတယ်။
