နိုဝင်ဘာ – ၂၅ ၊၂၀၂၅ ၊ ဆိုင်းမင်း/People’s Spring
မကွေးတိုင်း ပေါက်မြို့နယ်နဲ့ မြိုင်မြို့နယ် အစပ်ကို စစ်ကြောင်းထိုးနေတဲ့ စစ်ကောင်စီတပ်စစ်ကြောင်းက တပ်သားလေးဦး လက်နက်နဲ့ တကွ ဘက်ပြောင်းလာတယ်လို့ အညာမြေတပ်ပေါင်းစုအဖွဲ့ရဲ့ သတင်းနဲ့ပြန်ကြားရေး တာဝန်ခံ ကိုဘိုဘိုသန့်စင်ကပြောပါတယ်။
နိုဝင်ဘာလ ၂၂ ရက်ကနေ ၂၄ ရက် အထိ သုံးရက်တာအတွင်း စစ်ကောင်စီ တပ်သား လေးဦး ဘက်ပြောင်းလာတာပါ။
“ ကျနော်တို့အတည်ပြုထားသလောက်ဆိုရင် ပကဖ တွေဆီမှာ သုံး ယောက်နဲ့ ကျနော်တို့ဆီမှာ ဝင်တာ တစ်ယောက်နဲ့ဆိုရင် လေး ယောက်ပေါ့ အတည်မပြုနိုင်သေးတာတွေလည်း ရှိဦးမှာပါ “ လို့ ကိုဘိုဘိုသန့်စင်က ပြောပါတယ်။
Public Service Announcement
ဘက်ပြောင်းလာသူတွေတွေ သေနတ်တွေပါသယ်ယူလာကြတာဖြစ်ပြီး တပ်သားပြည့်စုံဟိန်း ၊ တပ်သားအောင်မိုး ၊ တပ်သား သန့်ဇင် နဲ့ တပ်သား တင်ထွန်းတို့ဖြစ်ပါတယ်။
သူတို့လေးဦးစလုံးဟာ ပြည်သူ့စစ်မှုထမ်းဥပဒေ နဲ့ တပ်သားစုဆောင်းခံရသူတွေဖြစ်ပြီး အပတ်စဉ် ၁၁ ၊ ၁၂ နဲ့ ၁၅ သင်တန်းဆင်းတွေဖြစ်တယ်လို့သိရပါတယ်။
မြန်မာနိုင်ငံအလယ်ပိုင်း မကွေးတိုင်း ၊ ပေါက်မြို့နယ်နဲ့ မြိုင်မြို့နယ်အစပ်က ကျေးရွာတွေကို စစ်ကောင်စီတပ်စစ်ကြောင်းက နိုဝင်ဘာလ ၁၆ ရက်ကစတင်ပြီး စစ်ကြောင်းထိုးနေတာပါ။
အဲဒီစစ်ကြောင်းမှာ စစ်ကောင်စီတပ်က ပြည်သူ့စစ်မှုထမ်း သင်တန်းဆင်း တပ်သားသစ်တွေကိုအပါအသုံးပြုနေတယ်လို့သိရပါတယ်။
