ဒီဇင်ဘာ-၁၅၊၂၀၂၅၊ရှိန်း/ People’s Spring
မန္တလေးတိုင်း၊စဉ့်ကူးမြို့နယ်မှာ စစ်ကြောင်းထိုးနေတဲ့ စစ်ကောင်စီတပ်က ဧရာဝတီမြစ်အတွင်း စက်လှေနဲ့ သွားလာနေတဲ့ပြည်သူတွေကို ပစ်ခတ်ခဲ့ရာ အမျိုးသားတစ်ဦး သေဆုံးခဲ့တယ်လို့ Wetlet information Networkက ပြောပါတယ်။
ဒီဇင်ဘာ ၁၃ရက်က စဉ့်ကူးမြို့နယ် ထုံးကြီးရွာရဲ့ အနောက်ဘက် ဧရာဝတီမြစ်အတွင်း သွားလာနေတဲ့ စက်လှေတစ်စီးကို ပစ်ခတ်ခဲ့တာလို့ သိရပါတယ်။
ပစ်ခတ်ခံရမှုမှာ စက်လှေပေါ်ပါ အမျိုးသားတစ်ဦး သေဆုံးပြီး တစ်ဦးလွတ် မြောက်ခဲ့တယ်လို့ သိရပါတယ်။
Public Service Announcement
“တစ်ဦးက ရေကူး ပြေးလာလို့ လွတ်တယ်လို့ သိရတယ်။မနေ့ကတော့ သေတဲ့ အလောင်းပြန်ရတယ်လို့ သိရပါတယ်”လို့ Wetlet information Network တာဝန်ခံတစ်ဦး ကပြောပါတယ်။
သေဆုံးသူတွေဟာ မတ္တရာမြို့နယ်အနောက်ခြမ်းက ဆင်ကုန်းရွာသားတွေ ဖြစ်တယ်လို့ သိရပါတယ်။
ဒီဇင်ဘာလ၁၃ ရက်မှာဘဲ စစ်ကောင်စီတပ်က ထုံးကြီးရွာကို ပြန်လည်ဝင်ရောက်ခဲ့ပြီး နောက် ဧရာဝတီမြစ်အတွင်းသွားလာသူ တွေကို ယခုလိုသတ်ဖြတ်ခဲ့တာပါ။
၁၀၂၇ စစ်ဆင်ရေးမတိုင်မီကလည်း စစ်ကောင်စီတပ်ဟာ ထုံးကြီးရွာဆိပ်ကမ်းကနေ ကုန်ပစ္စည်း ရောင်းချဖို့လာတဲ့ ဒေသခံတွေကို ပစ်ခတ်တာတွေလုပ်ခဲ့ဖူးတယ်လို့ သိရပါတယ်။
