ဒီဇင်ဘာ-၁၈၊ ၂၀၂၅ ဇေအောင်/People’s Spring
စစ်ကိုင်းတိုင်း၊ မြောင်မြို့ပေါ်ကို တော်လှန်ရေးရဲဘော်တွေ ဝင်ရောက်ပြီး စစ်ကောင်စီရွေးကောက်ပွဲကို ဆန့်ကျင်ကြဖို့ တိုက်တွန်းလှုံ့ဆော်မှုပြုလုပ်သွားပါတယ်။
မနေ့က ဒီဇင်ဘာ ၁၇ ရက် ညနေ ၃ နာရီကျော်မှာ မြောင်မြို့ပေါ်က ဗိုလ်ချုပ်ကြေးရုပ်အပါအဝင် မြို့ပေါ်နေရာတွေကို တော်လှန်ရေးရဲဘော်တွေ ဝင်ရောက်လာပြီး အားလုံးမပါဝင်နိုင်တဲ့၊ မတရားတဲ့ ရွေးကောက်ပွဲ အလိုမရှိ၊ ဗုံးကြဲသတ်ဖြတ်နေတဲ့ စကစရွေးကောက်ပွဲ အလိုမရှိ စတဲ့စာသားပါ စာရွက်တွေကို လိုက်လံ ကပ်သွားခဲ့ကြောင်း CDSOMဗိုလ်စကြာစစ်ကြောင်းက ရဲဘော်စမာက ပြောပါတယ်။
“ရွေးကောက်ပွဲမဲမထည့်ဖို့နဲ့ အသိပေးစာတွေကြဲခဲ့တာပါ။ ခါတိုင်းစကစလာပြီး ကင်းပုန်းဝပ်တဲ့နေရာကို။ ပြည်သူကိုထင်တိုင်းကြဲ ဗုံးကြဲသတ်ဖျက်နေပြီးရွေးကောက်ပွဲ လုပ်ပြီးနာမည်ကောင်းလိုချင်နေတဲ့စကစကိုမလိုမရှိလို့ လုပ်ခဲ့ဖြစ်တာပါ”လို့ ရဲဘော်စမာက ပြောပါတယ်။
Public Service Announcement
မြောင်မြို့ပေါ်မှာလည်း အာဏာသိမ်းစစ်အုပ်တွေ စစ်ဆေးတင်းကြပ်လေ့ရှိပြီး ဖမ်းဆီးနှိပ်စက်ငွေညှစ်တာတွေ မကြာခဏ ပြုလုပ်လေ့ရှိတယ်လို့ သိရပါတယ်။
ပြီးခဲ့တဲ့ ရက်ပိုင်းကလည်း စစ်ကိုင်းတိုင်းထဲက မုံရွာနဲ့ ရွှေဘိုမြို့ပေါ်တွေကို တော်လှန်ရေးအဖွဲ့တွေဝင်ရောက်ပြီး စစ်ကောင်စီရွေးကောက်ပွဲကို ဆန့်ကျင်ကြဖို့ ဗီနိုင်းတွေထောင်တာ၊ လက်ကမ်းစာရွက်တွေဝေတာတွေ ပြုလုပ်ခဲ့ပါသေးတယ်။
