ရွှေဘို – မြစ်ကြီးနားလမ်းပိုင်းမှာ စစ်တပ်က ဆီဘောက်ဆာကားတွေကို လေကြောင်းက ဗုံးကြဲနေ

ဒီဇင်ဘာ-၁၈၊ ၂၀၂၅။ဇေအောင်/People’s Spring

စစ်ကိုင်းတိုင်း၊ ခင်ဦးမြို့နယ်၊ ရွှေဘို – မြစ်ကြီးနားလမ်းပိုင်းမှာ စစ်တပ်က ပြည်သူတွေရဲ့ ဆီဘောက်ဆာကားတွေကို လေကြောင်းကနေ ဗုံးကြဲတိုက်ခိုက်နေကြောင်း ဒေသခံတွေက ပြောပါတယ်။

ဒီကနေ့ ဒီဇင်ဘာ ၁၈ ရက် နေ့လယ် ၂ နာရီခန့်က ရွှေဘို-မြစ်ကြီးနားလမ်းပိုင်းနဲ့ ခင်ဦးမြို့ဘက်သွားတဲ့လမ်းဆုံတနေရာမှာ ဆီဘောက်ဆာကားတွေကို စစ်တပ်က ဂျက်ဖိုက်တာာ ၅ စီး ၊ ဂျိုင်ရိုကော်ပတာ ၃စီးနဲ့ လေကြောင်းတိုက်ခိုက်နေပြီး မီးလောင်ပျက်စီးမှုတွေရှိနေကြောင်း ဒေသခံတွေနဲ့ ခင်ဦးမြို့နယ်သတင်းမှန်ပြန်ကြားရေးက ပြောပါတယ်။

“ ဆီဘောက်စာကားတွေ အတန်းလိုက်ကြီးကိုချနေတာ” လို့ ဒေသခံတစ်ဦးက ပြောပါတယ်။

Public Service Announcement

ပြည်သူထိခိုက်သေဆုံးမှုတော့ မသိရသေးဘူးလို့ ခင်ဦးမြို့နယ်သတင်းမှန်ပြန်ကြားရေးက ပြောပါတယ်။

ဒီဇင်ဘာ ၁၇ရက်က ခင်ဦးမြို့နယ်အရှေ့ခြမ်းမှာ စစ်ဘေးရှောင်တွေ ဇက်ကူးတဲ့နေရာကို လေကြောင်းတိုက်ခိုက်လို့ ပြည်သူတွေ ဒါဇင်နဲ့ချီပြီး သေဆုံးခဲ့ပါသေးတယ်။

စစ်ကောင်စီတပ်ဟာ ဒီဇင်ဘာ ၁၇ရက် ညကလည်း ရေဦးနဲ့ဝက်လက်မြို့နယ်မှာ လေကြောင်းတိုက်ခိုက်ခဲ့လို့ ပြည်သူ ၄ ဦးထက်မနည်း သေဆုံးခဲ့ပါတယ်။

ဒီဇင်ဘာ ၁၆ ရက်ကလည်း ရွှေဘိုမြို့နယ်မှာ ခရီးသည်တင်ယာဉ် ကားတန်းကို စစ်တပ်က လေကြောင်းကနေ ၁၀ကြိမ်ထပ်မနည်းတိုက်ခိုက်ခဲ့ရာ သံဃာတစ်ပါးအပါအဝင် ၄ဦးသေဆုံးကာ ထိခိုက်ဒဏ်ရာရသူတွေလည်း ရှိတယ်လို့ ‌‌‌‌‌‌‌ဒေသခံတွေက ပြောပါတယ်။

ရွှေဘိုမြို့နယ်တောင်ခြမ်းက မအူရွာနဲ့ ရွာသစ် ကုန်းရွာအနီး ပိတ်မိနေတဲ့ခရီးသွားယာဉ်တန်းကို စစ်တပ်က ဗုံးကြဲခဲ့တာပါ။