ဒီဇင်ဘာ-၁၈၊ ၂၀၂၅။ ဆန်အောင်/People’s Spring
နိုင်ငံရေးမှာ အမြဲတမ်းသဘောထားတိုက်ဆိုင်နေတာတွေ မရှိဘူးဆိုတာ ပုံမှန်သဘောတရားပဲ ဖြစ်ပေမယ့် တော်လှန်ရေးမှာတော့ သဘောထားတွေက ဖြစ်နိုင်သမျှ တိုက်ဆိုင်နိုင်အောင်၊ သဘောမျှနိုင်အောင် ကြိုးစားကြရမှာဖြစ်ကြောင်း အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ပြောပါတယ်။
ဒီကနေ့ ဒီဇင်ဘာ ၁၈ရက်မှာ ကျင်းပတဲ့ ပြည်ထောင်စုလွှတ်တော်အစည်းအဝေး မိန့်ခွန်းမှာ ဝန်ကြီးချုပ် မန်းဝင်းခိုင်သန်းက အခုလို ပြောကြားခဲ့တာပါ။
“ လူ့အသက်တွေ အများကြီး စတေးပြီး တိုင်းပြည်ရဲ့အနာဂတ်ကိုရင်းကာ ဆင်နွှနေကြရတဲ့ တော်လှန်ရေးဖြစ်တဲ့အတွက်ကြောင့် ကျွန်တော်တို ဦးဆောင်တိုက်ပွဲဝင်နေသူတွေအတွက်ပိုပြီး တာဝန်ကြီးတဲ့တော်လှန်ရေးလည်း ဖြစ်ပါတယ်။”လို့လည်း ဝန်ကြီးချုပ် မန်းဝင်းခိုင်သန်းက ပြောပါတ်။
Public Service Announcement
လက်ရှိ တော်လှန်ရေးဘက်က ရင်ဆိုင်နေရတဲ့ အကြမ်းဖက်စစ်အုပ်စုဟာ လူ့အခွင့်အရေးနေ့မျိုးမှာတောင် ဆေးရုံလို နေရာမျိုးကို ဗုံးကြဲချခဲ့တဲ့ ဆိုးရွားလွန်းသူတွေဖြစ်တယ်ဆိုတာကို မေ့လိုမရကြောင်း သတိပေးပါတယ်။
“ ဒီလို အကြမ်းဖက်စစ်အုပ်စုမျိုးကို တော်လှန်နေကြရတဲ့ ကျွန်တော်တို တော်လှန်ရေးအင်အားစုတွေအားလုံးရဲ့ ပထမဆုံး ဦးတည်ချက်က အကြမ်းဖက်စစ်အုပ်စုကို ဖြိုချဖိုပဲ ဖြစ်ပါတယ်။ ဒီအတွက် ကျွန်တော်တိုအားလုံး ဒီထက်ပိုမိုစုစည်းပြီး ပိုမိုအလုပ်လုပ်ကြဖိုပဲ ဖြစ်ပါတယ်”လို့ ပြည်ထောင်စုဝန်ကြီးချုပ်က ပြောပါတယ်။
၂၀၂၅ ခုနှစ်ဟာ နွေဦးတော်လှန်ရေးရဲ့ စိန်ခေါ်မှုတွေ အများဆုံးဖြစ်နေတဲ့၊ အရှိန်မြင့်နေတဲ့ ကာလတခုကို ရောက်ရှိဖြတ်သန်းနေရတာ ဖြစ်ကြောင်းလည်း ပြောပြပါတယ်။
“ စစ်ရေးကဏ္ဍဘက်မှ အရှိန်အဟုန်တွေက ပြင်းထန်သလို နိုင်ငံရေးကဏ္ဍဘက်မှာလည်း ပိုမိုခိုင်ခိုင်မာမာ ပြတ်ပြတ်သားသား ဆွေးနွေးဆုံးဖြတ်ကြရမဲ့အရာတွေ အများကြီးကြုံတွေ့လာကြရတယ်ဆိုတာ ကိုယ်စားလှယ်တော်ကြီးများအားလုံးလည်း သိရှိပြီးဖြစ်မယ်လို ယုံကြည်ပါတယ်”လို့လည်း ပြည်ထောင်စုဝန်ကြီးချုပ်ရဲ့ လွှတ်တော်အစည်းအဝေး မိန့်ခွန်းမှာ ပါရှိပါတယ်။
ဒီလို လှိုင်းကြမ်းလေထန်ကာလမျိုးမှာ ၅ နှစ်နီးပါးကာလအတွင်း ပြည်သူကို ပေးခဲ့တဲ့ ကတိတွေအတိုင်း တော်လှန်ရေးရဲ့ ဦးတည်ချက်၊ ရည်မှန်းချက်တွေကို မယိမ်းမယိုင်နဲ့ လက်ချင်းချိတ်ပြီး ရှေ့ခရီးကို အတူဆက်လှမ်းကြရမယ့်အချိန်ဖြစ်ကြောင်းလည်း ပြည်ထောင်စုဝန်ကြီးချုပ်က ပြောကြားပါတယ်။
