ဒီဇင်ဘာ-၂၅၊၂၀၂၅။အိမ်သွင်/People’s Spring
လေယာဉ်ဗုံးတွေထုတ်လုပ်နေတဲ့ အမှတ်(၂၁) ကာကွယ်ရေးပစ္စည်းစက်ရုံ(ကပစ-၂၁)အပါအဝင်ပခုက္ကူခရိုင်ထဲမှာရှိတဲ့ ကပစ စက်ရုံ၃ ရုံကိုပို့နေတဲ့ လျှပ်စစ်ဓာတ်အားလိုင်းတွေကို တော်လှန်ရေးတပ်တွေက ဖျက်ဆီးပြီး လျှပ်စစ်ဓာတ်အား ဖြတ်တောက်လိုက်ပါတယ်။
ပေါက်မြို့နယ်က ကပစ(၂၄)၊ဆိပ်ဖြူမြို့နယ်က ကပစ(၂၁)နဲ့ ကပစ(၂၂)ဆီ ပို့နေတဲ့ လျှပ်စစ်ဓာတ်အားလိုင်း သုံးနေရာကို တော်လှန်ရေးတပ်တွေက မိုင်းခွဲဖျက်ဆီးလိုက်တာပါ။
“အခုရက်ထဲမှာ ဖောက်ခွဲဖျက်ဆီးလိုက်တာပါ။ကပစတွေဆီ လျှပ်စစ်ဓာတ်အားဖြတ်တောက်တာပါ။ သူတို့ ပြင်ဆင်ဖို့ ကြိုးပမ်းနေပေမယ့် မရသေးပါဘူး”လို့ ဒေသတွင်းက ကာကွယ်ရေးရဲဘော်တစ်ဦးကပြောပါတယ်။
Public Service Announcement
ကပစ(၂၁) နဲ့ ကပစ(၂၂)ကိုစလင်းမြို့နယ်ကတညောင်တအားခွဲရုံကနေလျှပ်စစ်ဓာတ်အားပို့ဆောင်နေတာပါ။
လေယာဉ်ဗုံးတွေထုတ်တဲ့ ကပစ(၂၁)ဟာဆိပ်ဖြူမြို့နယ်၊ကန်စွန်းမကျေးရွာအနီး၌တည်ရှိပါတယ်။ ကပစ (၂၁)မှာClusterအမျိုးအစားလေယာဉ်ဗုံး ထုတ်လုပ်တယ်လို့လည်းသိရပါတယ်။
ကပစ(၂၁)ဟာ ဆိပ်ဖြူမြို့နယ်၊ ရွှေပို့ကျွန်းရွာမှာရှိပြီး ရိုင်ဖယ်အမျိုးအစားလက်နက်ငယ်တွေထုတ်ပါတယ်။ ကပစ(၂၄)ကတော့ ပေါက်မြို့နယ်ရဲ့ အနောက်တောင်ဘက်မှာတည်ရှိပြီးအရည်ကျိုစက်ရုံအဖြစ်လည်ပတ်နေသလို လက်နက်ကြီးကျည် ၆၀ မမ၊၈၀ မမ နှင့် ၁၂၀ မမ တို့ကို အဓိကထုတ်လုပ်နေတာပါ။
လေယာဉ်ဗုံးနဲ့လက်နက်တွေထုတ်လုပ်ပြီး လူထုကို သတ်ဖြတ်မှုတွေကျူးလွန်နေလို့ အရေးကြီးတဲ့နေရာကိုဦးတည်ပြီးစစ်ဆင်ရေးလုပ်တာလို့ကာကွယ်ရေးရဲဘော်တစ်ဦးကပြောပါတယ်။ ဒေသခံပြည်သူလူထုအနေနဲ့ စစ်ရေးအခြေအနေကို သူက နားလည်ပေးဖို့ မေတ္တာရပ်ခံပါတယ်။
“စစ်တပ်ရဲ့စစ်လက်နက်ပစ္စည်းထုတ်လုပ်ရေးနေရာတွေကို ဖြတ်တောက်ဖို့လိုလို့ လုပ်တာပါ။ပြည်သူကိုခက်ခဲစေချင်တာမဟုတ်ဘူး။ အသက်သေဆုံးတာထက်စာရင်လျှပ်စစ်မီးနဲ့ပဲရန်သူက စက်လက်နက်ပစ္စည်းတွေထုတ်လုပ်နေတာမို့လို့ ဒါကိုဖြတ်တောက်နိုင်မှ ပြည်သူရဲ့အသက်အိုးအိမ်စည်းစိမ်နဲ့ဆုံးရှုံးမှုအားပိုနည်းမှာမို့လို့လုပ်တာပါ”လို့ ဆိုပါတယ်။
မြန်မာနိုင်ငံအနှံ့မှာကပစစက်ရုံ၂၅ ရုံရှိပြီးမကွေးတိုင်းထဲမှာ ၁၅ခုအထိ ရှိနေတာဖြစ်ပါတယ်။ စစ်ကောင်စီကိုအပြီးသတ် ဖြိုချနိုင်ဖို့အတွက် ကပစတွေကို အထိနာအောင်တိုက်ခိုက်ဖို့လိုအပ်တယ်လို့ တော်လှန်ရေးတပ်တွေကထုတ်ဖော်ပြောကြားထားပါတယ်။ပဲခူးတိုင်းထဲမှာရှိနေတဲ့ကပစတွေကိုလည်း တော်လှန်ရေးတပ်တွေက ပစ်မှတ်ထားပြီးတိုက်ခိုက်နေတာရှိပါတယ်။
