ဇန်နဝါရီ – ၁၄ ၊၂၀၂၆
ရပ်ထားတဲ့ ကားအစီး ၂၀ နီးပါးလောက်ကို ဖျက်ဆီးခဲ့တဲ့အတွက် မြန်မာ အမျိုးသား တစ်ဦးကို ထိုင်းရဲတပ်ဖွဲ့က ဖမ်းဆီးထားလိုက်ပါတယ်။
အဲဒီအမျိုးသားဟာ ဇန်နဝါရီ ၁၃ ရက် မနက်အစောပိုင်း ဒေသစံတော်ချိန် ၃ နာရီခန့်မှာ ထိုင်းနိုင်ငံတောင်ပိုင်း ဆာတွန်ပြည်နယ်၊ လာငူခရိုင်မှာရှိတဲ့ ကားလမ်းတစ်ခုမှာလမ်းဘေး ရပ်ထားတဲ့ ကားတွေကို တိုက်ခိုက် ဖျက်ဆီးခဲ့တာ ဖြစ်ပါတယ်။
အသက် ၄၅ နှစ်အရွယ်ရှိပြီး ထိုင်းမီဒီယာတွေက ‘စော’လို့သာ နာမည်ဖော်ပြထားခဲ့တဲ့ မြန်မာအမျိုးသားဟာ ကျောက်တုံးတွေနဲ့ ပေါက်ချွန်းတစ်ခုကို အသုံးပြုပြီး ကားတွေရဲ့ ကိုယ်ထည်နဲ့ မှန်တွေကို ဖျက်ဆီးခဲ့တာ ဖြစ်ပါတယ်။
Public Service Announcement
သူ့ရဲ့ လက်ချက်ကြောင့် ကား ၁၉ စီးမှာ အပျက်အစီးတွေ ဖြစ်ပေါ်ခဲ့ပါတယ်။
လုံခြုံရေး ကင်မရာတွေမှာတော့ သူဟာ ခဲကြီးတစ်လုံးကို ယူပြီး အိမ်တွေရှေ့မှာ ရပ်ထားတဲ့ ကားနှစ်စီးရဲ့ မှန်တွေကို ခွဲပစ်ခဲ့တာ တွေ့ရပါတယ်။
အဲဒီနောက် သူဟာ နောက်ထပ် ခဲလုံးတွေနဲ့ ၂၉ လက်မလောက်ရှည်တဲ့ ပေါက်ချွန်းတစ်လက်ကိုပါ ယူလာပြီး လမ်းဘေးတလျှောက် ရပ်ထားတဲ့ ကားတွေကို တိုက်ခိုက်ခဲ့ပါတယ်။
ထိုင်းရဲ့ CH7 သတင်းဌာနက စောရဲ့ လက်ချက်ကြောင့် ကား ၁၉ စီး ပျက်စီးခဲ့တယ်လို့ ဖော်ပြခဲ့ပါတယ်။
သတင်းပေး တိုင်ကြားမှုတွေကို လက်ခံရရှိခဲ့တဲ့နောက် လာငူ ရဲစခန်းရဲ့ ရဲတပ်ဖွဲ့ဝင်တွေဟာ ကျူးလွန်သူကို လိုက်ရှာခဲ့ပြီး တစ်နာရီ အတွင်းမှာပဲ ဖမ်းမိခဲ့ပါတယ်။ ကားတွေကို ဖျက်ဆီးရာမှာ သူအသုံးပြုခဲ့တဲ့ ပေါက်ချွန်းကိုလည်း ရဲတွေက ရှာတွေ့ခဲ့ပါတယ်။
ကားတွေကို ဖျက်ဆီးတဲ့ အမျိုးသားကို ဖမ်းမိထားပြီလို့ သတင်းကြားတဲ့အခါ ဒေသခံတွေဟာ ရဲစခန်းဆီ စုရုံးရောက်ရှိလာခဲ့ပြီး ဖြေရှင်းပေးဖို့ တောင်းဆိုခဲ့ကြပါတယ်။ မျက်မြင် အခြေအနေအရတော့ ကားတချို့ဟာ တော်တော်ကြီး ဆိုးဆိုးရွားရွား ပျက်စီးနေခဲ့တာကို တွေ့ရပါတယ်။
ဒေသခံ တစ်ဦးက ဆူညံသံတွေကြားလို့ အိမ်အပြင်ဖက်ကို ချောင်းကြည့်တဲ့အခါ ကားတွေကို သတ္တုကိရိယာ တစ်ခုခုသုံးပြီး လူတစ်ယောက်က ဖျက်ဆီးနေတာကို တွေ့ခဲ့ကြောင်း၊ အဲဒီလူက အရမ်းရန်လိုနေဟန် ရှိတာကြောင့် သွားပြီး ဟန့်မတားရဲခဲ့ကြောင်း ပြောပါတယ်။
ရဲတွေရဲ့ အဆိုအရ ဆေးစစ်ကြည့်တဲ့အခါ သံသယ တရားခံဟာ မူးယစ်ဆေး တစ်မျိုး သုံးစွဲထားကြောင်း အတည်ပြုနိုင်ခဲ့ကြောင်း၊ သူဟာ ထိုင်းမှာ မှန်ကန်တဲ့ အလုပ်လုပ်ခွင့် ပါမစ်မျိုးနဲ့ ရောက်လာတာ မဟုတ်ဘဲ တရားမဝင် အခြေချနေတာဖြစ်ကြောင်းလည်း သိရပါတယ်။
ရဲတွေကတော့ သူ့ကို ဖျက်ဆီးမှု၊ တရားမဝင် ခိုးဝင်မှုနဲ့ မူးယစ်ဆေး သုံးစွဲမှုတွေအတွက် စွဲချက်တင်ထားကြောင်း သိရပါတယ်။
ကိုးကား ၊ ဓာတ်ပုံ – Thaiger
