ဇန်နဝါရီ – ၂၆ ၊၂၀၂၆ ၊ဆိုင်းမင်း/People’s Spring
မန္တလေးတိုင်း ၊ ငါန်းဇွန်မြို့နယ် ၊ မြို့သာစက်မှုဇုန်ကနေ ထွက်လာတဲ့ စစ်ကောင်စီစစ်ကြောင်း ပြီးခဲ့တဲ့ ရက်ပိုင်းက မိုင်းဆွဲခံလိုက်ရတယ်လို့ ဒေသခံအချို့က အသိပေးပါတယ်။
မြို့သာစက်မှုဇုန်ကနေ ထွက်လာတဲ့ အင်အား ၇၀ ခန့်ပါ စစ်ကောင်စီတပ်စစ်ကြောင်းဟာ ငါန်းဇွန်မြို့နယ် ထဲက ကျွဲဇိမ်ရွာ အနီး မှာ ဇန်နဝါရီလ ၁၉ ရက် မနက်ပိုင်း ၇ နာရီဝန်းကျင်က မိုင်းဆွဲခံလိုက်ရတာပါ။
အဲဒီနောက်မှာတော့ မိုင်းဆွဲခံရတဲ့ နေရာကနေ နှစ်မိုင်ခန့်အကွာမှာရှိတဲ့ ထန်းတပင်ရွာကို စစ်ကောင်စီတပ်က ဒရုန်းသုံးပြီး ဗုံးကြဲလို့ နေအိမ်နှစ်လုံးထိခိုက်ပျက်စီးသွားတယ်လို့သိရပါတယ်။
Public Service Announcement
“လူတော့မထိဘူး”လို့ ဒရုန်းတိုက်ခိုက်ခံရမှုနဲ့ပတ်သက်ပြီး ငါန်းဇွန်မြို့နယ်အတွင်းက တော်လှန်ရေးတပ်ဖွဲ့ဝင်တစ်ဦးကပြောပါတယ်။
မိုင်းဆွဲတိုက်ခိုက်ခံရမှုကြောင့် စစ်ကောင်စီတပ်ဖွဲ့ဝင်နှစ်ဒါဇင်နီးပါးထိခိုက်တယ်လို့ သိထားရပေမယ့် သီးခြားအတည်မပြုနိုင်ပါဘူး။
မြို့သာစက်မှုဇုန်ထဲမှာ အထိုင်ချထားတဲ့ စစ်တပ် စစ်ကြောင်းက မန္တလေး-မြို့သာ-မြင်းခြံလမ်းပိုင်းကို သွားလာနေတဲ့ ပြည်သူတွေကို ဖမ်းဆီးစစ်ဆေးတာ၊ ပေါ်တာဆွဲတာ ၊ အနီးဝန်းကျင်ရွာတွေကို စစ်ကြောင်းထိုးဝင်ရောက်တာတွေပြုလုပ်ထားပါတယ်။
စစ်ကောင်စီတပ်သုံး ထရပ်ကားတစ်စီးကိုတွေ့ရပုံ (ပုံဟောင်း)
