နေပြည်တော် တပ်ကုန်းမှာဇာတ်အဖွဲ့ ကားချောက်ထဲကျလို့ အသေ အပျောက်များပြား

ဇန်နဝါရီ – ၂၉ ၊၂၀၂၆ ၊ ဆိုင်းမင်း/People’s Spring

နေပြည်တော် ၊ တပ်ကုန်းမြို့နယ်ဆီ ဇာတ်ကဖို့သွားတဲ့ ဇော်လေးနိုင်ဇာတ်အဖွဲ့ကား တပ်ကုန်းမြို့နယ်ထဲက တောင်ညိုလမ်းပိုင်းမှာ မနေ့ (ဇန်နဝါရီလ ၂၈ ရက်) ညပိုင်း ၆ နာရီခန့်က ချောက်ထဲ ထိုးကျပြီး ဇာတ်အဖွဲ့ဝင်တွေထိခိုက်သေဆုံးကြတယ်လို့သိရပါတယ်။

ချောက်ထဲထိုးကျသွားတဲ့ဇာတ်အဖွဲ့ကားကိုရှာဖွေကယ်ဆယ်ရေးလုပ်ဆောင်ရာမှာဒီနေ့ (ဇန်နဝါရီလ ၂၉ ရက်)မနက်ပိုင်း၁၁ နာရီအထိ ရုပ်အလောင်း ခုနှစ်လောင်းတွေ့ရှိထားတယ်လို့ ကူညီကယ်ဆယ်ရေးအဖွဲ့ထံကသိရပါတယ်။

“ကျွန်တော်တို့တွေ့တဲ့စာရင်းကတော့အခုထိ(မနက် ၁၁နာရီ) ခုနှစ်ဦးပါ၊ကျန်တာကတော့ဆက်ရှာနေပါတယ်”လို့ နေပြည်တော်ကလူမှုကူညီရေးအဖွဲ့ဝင်တစ်ဦးကပြောပါတယ်။

Public Service Announcement

ကနဦးတွေ့ရှိထားတဲ့ ရုပ်အလောင်း ခုနှစ်လောင်းမှာတော့ အမျိုးသား ငါး လောင်းနဲ့ အမျိုးသမီး နှစ်လောင်းတို့ဖြစ်ပါတယ်။

အဲဒီရုပ်အလောင်းတွေကို နေပြည်တော် ကုတင်တစ်ထောင်ဆေးရုံဆီပို့ဆောင်ထားပါတယ်။

ဒဏ်ရာရသူဦးရေကလည်း ၁၆ ဦး ဝန်းကျင်ရှိပြီး အဲဒီဆေးရုံမှာပဲကုသနေတယ်လို့သိရပါတယ်။

မြန်မာနိုင်ငံသဘင်အစည်းအရုံးဗဟိုကတော့ဇော်လေးနိုင်ဇာတ်အဖွဲ့ ကားမှာ၂၇ ဦးလိုက်ပါလာပြီး သေဆုံးသူ ၁၂ ဦး ရှိတယ်လို့ မနေ့ ညပိုင်းကသတင်းဖော်ပြထားပါတယ်။

ဓာတ်ပုံ – မွန်မြတ်သူလူမှုကူညီရေးအသင်း