တန့်ဆည်မြို့နယ်ကို စစ်တပ်လေကြောင်းတိုက်ခိုက်၊ ကိုရင် တစ်ပါးနဲ့ ပြည်သူ ၅ဦး သေဆုံး

ဖေဖော်ဝါရီ-၅၊၂၀၂၆၊မိုမို/People’s Spring

စစ်ကိုင်းတိုင်း၊ တန့်ဆည်မြို့နယ်မှာ လေကြောင်း တိုက်ခိုက်ခံရပြီး ကိုရင်တစ်ပါးအပါအဝင် အရပ်သားတွေ ထိခိုက်သေဆုံးမှုများတယ်လို့ ဒေသခံသတင်းရင်းမြစ်အချို့က ပြောပါတယ်။​

ဒီကနေ့(ဖေဖော်ဝါရီ ၅ရက်)မနက် ၁၀နာရီဝန်းကျင်က မြို့မြောက်ခြမ်းက သစ္စေးကုန်းကျေးရွာကို စစ်တပ်က ဂျက်ဖိုက်တာ ၂စီးနဲ့ ဗုံးကြဲတိုက်ခိုက်ခဲ့တာလို့ ဆိုပါတယ်။

“ရွာဘုန်ကြီးကျောင်းကို ကြဲတာ။ဂျက်ဖိုက်တာ ၂စီးနဲ့ ကိုရင်လေးတစ်ပါး၊ ပြည်သူ၅ဦး သေတယ်။ထိခိုက်တာတွေက များတယ်”လို့ ဖြစ်စဥ်ကို သိရှိသူက လူထုနွေဦးကို ပြောပါတယ်။

Public Service Announcement

ဒါ့အပြင် ဘုန်ကြီးကျောင်းဆောင်တွေ အားလုံးနီးပါးပျက်စီးသွားပြီး ကျောင်းဝင်းအတွင်းရှိတဲ့ ကားဝပ်ရှော့က ကားတွေလည်း ပျက်စီးခဲ့တယ်လို့ သူက အသိပေးပါတယ်။

“ဘာပွဲလမ်းသဘင်မှလည်း မရှိဘူး။သံဃာတွေနဲ့ အရပ်သားတွေ ရှိတဲ့နေရာကို အကြောင်းမဲ့ လာသတ်တာ”လို့ တန့်ဆည်မြို့နယ်စစ်ရှောင်အရေးကူညီနေသူက ပြောပါတယ်။

အဲဒီတိုက်ခိုက်မှုကို စစ်တပ်ရဲ့ဝါဒဖြန့် တယ်လီဂရမ်အကောင့်တွေက ဗန်းမော်မြို့ကို စစ်ကူသွားမယ့်ယာဥ်တန်းကို တိုက်ခိုက်ခဲ့တာလို့ ဖော်ပြထားပါတယ်။

တန့်ဆည်မြို့နယ်ကို စစ်တပ်က လေကြောင်း တိုက်ခိုက်မှုတွေ မကြာခဏလုပ်နေပြီး ပြီးခဲ့တဲ့ ရက်ပိုင်း ဖေဖော်ဝါရီ ၂ ရက်ကလည်း တန့်ဆည်မြို့နယ်အ​​နောက်ခြမ်းက ​ကော်တတ်ကျေးရွာကို တိုက်ခိုက်ခဲ့ပါသေးတယ်။

စစ်​ရေးပစ်မှတ်မဟုတ်တဲ့ ​ကျေးရွာ​တွေ၊နေအိမ်​တွေ ဦးတည်လေ​ကြောင်းတိုက်ခိုက်မှု​တွေ ဆက်တိုက်ပြုလုပ်​လာတာ​ကြောင့် ဗုံးခိုကျင်းတွေ တူးထားဖို့နဲ့ လေကြောင်း သတိပေးချက်တွေကို ဂရုစိုက်ဖို့ လည်း ကာကွယ်ရေးတပ်ဖွဲ့တွေက သတိပေးထားပါတယ်။