ဖေဖော်ဝါရီ-၆၊ ၂၀၂၆ ဟာနာဆန်၊မိုမို/People’s Spring
မကွေးတိုင်း၊ ပေါက်မြို့နယ်မှာ အမှတ်(၂၄) ကာကွယ်ရေးပစ္စည်းစက်ရုံ(ကပစ-)က စစ်ကြောင်းထိုးပြီး ဂျက်ဖိုက်တာနဲ့ပါ ပစ်ခတ်နေလို့ ကျေးရွာ ၆ရွာက ဒေသခံပြည်သူ ၅၀၀၀ နီးပါး ထွက်ပြေးတိမ်းရှောင်နေရကြောင်း ပေါက်မြို့နယ် လူသားစာနာဌာနရဲ့ တာဝန်ရှိသူက ပြောပါတယ်။
ဖေဖော်ဝါရီ ၄ ရက်ကတည်းက ပေါက်မြို့နယ်ကကပစ(၂၄)လက်နက်စက်ရုံကနေ အင်အား ၂၀၀ ခန့်ပါတဲ့ စစ်ကြောင်းဟာ သစ်ချိုကုန်းပျူစောထီးကျေးရွာရောက်ရှိပြီး အဲဒီရွာကနေတဆင့် အနီးရှိကျေးရွာတွေကို စစ်ကြောင်းထိုးနေပါတယ်။
ဒါ့အပြင် ဂျက်ဖိုက်တာနဲ့ပါ ပစ်ခတ်ပြီး ကပစ(၂၄)လက်နက်စက်ရုံကနေလည်း လက်နက်ကြီးတွေနဲ့ ရမ်းသမ်းပစ်ခတ်နေတာကြောင့် ကျေးရွာ ၆ ရွာ အိမ်ထောင်စု ၁၁၀၀ ၊ လူဦးရေ ၅၀၀၀ နီးပါးဟာ ဘေးလွတ်ရာသို့ တိမ်းရှောင်နေရကြောင်း ပေါက်မြို့နယ် လူသားစာနာဌာနရဲ့ တာဝန်ရှိသူက ပြောပါတယ်။
Public Service Announcement
“ပေါက်တောင်ပိုင်းကို စကစ စစ်ကြောင်းက ပျူစောထီးရွာရိက္ခာအတွက် စစ်ကြောင်းဝင်ရောက်နေတာ။ပြည်သူတွေ လက်နက်ကြီးနဲ့ မနားတမ်းအပစ်ခံနေရတယ်။စစ်ကြောင်းဝေးရာ ပြေးလွှားနေကြတယ်။”လို့ ပေါက်မြို့နယ်က တော်လှန်ရေးရဲဘော်တစ်ဦးက ပြောပါတယ်။
ပေါက်မြို့နယ်က စစ်ရှောင်တွေဟာ စားနပ်ရိက္ခာ၊ ဆေးဝါးနဲ့ အမိုးအကာတွေ အရေးပေါ်လိုအပ်နေပြီး ကာလရှည်ကြာ ရှောင်နေရတဲ့ စစ်ရှောင်တွေမှာလည်း အရေပြားရောဂါတွေဖြစ်ပွားကာ ဆေးဝါးပြတ်လပ်နေတယ်လို့ စစ်ရှောင်ကူညီသူတွေက ပြောပါတယ်။
“တောင်ပိုင်းမှာကသစ်ချိုကုန်း၊ဝန်ခြုံးတို့သီးချောက်တို့က ပျူစောထီးရွာတွေ ဖြစ်တယ်။အဲဒီရွာတွေက ပြီးခဲ့တဲ့ သုံးလလောက်က တော်လှန်ရေးအဖွဲ့တွေ ဝင်တိုက်ခိုက်ဖူးတယ်။နောက်ပြီး အခုက တောင်ပိုင်း တပ်ကုန်းရွာမှာလည်း စစ်ကြောင်းတစ်ခုရှိနေသေးတယ်။အင်အားအလုံးအရင်းနဲ့ နယ်မြေရှင်းတဲ့ ပုံစံ”လို့ ပေါက်မြို့နယ်ဒေသခံတစ်ဦးက ပြောပါတယ်။
လတ်တလော စစ်ရှောင်နေရတဲ့ ပြည်သူတွေအတွက် အရေးပေါ် စားနပ်ရိက္ခာနဲ့ ဆေးဝါးတွေလိုအပ်နေတယ်လို့လည်း သိရပါတယ်။
ပေါက်နဲ့ နယ်မြေချင်းဆက်နေတဲ့ မြိုင်မြို့နယ်မှာလည်း စစ်ကောင်စီတပ်က ဖေဖော်ဝါရီ ၁ ရက်က စစ်ကြောင်းထိုးပြီး ပြည်သူတွေရဲ့ ဆန်အိတ်ပေါင်း ၄၀၀ ကျော်နဲ့ ပဲအိတ်တွေ သိမ်းယူသွားကြောင်း ဒေသခံတွေဆီက သိရပါတယ်။
(ထွက်ပြေးတိမ်းရှောင်နေရသော ပြည်သူများအား တွေ့ရစဥ်။ ဓါတ်ပုံ-ပေါက်လူသားစာနာဌာန)
