ဖေဖော်ဝါရီ-၆၊၂၀၂၆။တာရာ/People’s Spring
ရန်ကုန်မြို့ သံလမ်းမှတ်တိုင်မှာ စစ်သားတွေ မူးပြီး သေနတ်နဲ့ ရမ်းကားပစ်ခတ်ခဲ့တယ်လို့ ဖြစ်စဉ်အနီးနား ရှိနေသူတွေက ပြောပါတယ်။
ဖေဖော်ဝါရီ ၅ရက်ည ၈ နာရီကျော်လောက်ကရန်ကုန်မြို့ရှိ လှိုင်မြို့နယ်၊ အင်းစိန်လမ်းမကြီးပေါ်က သံလမ်းမှတ်တိုင်အနီးမှာ ဖြစ်စဉ်ဖြစ်သွားခဲ့တာဖြစ်ပါတယ်။
“လေးငါးချက်လောက်ရှိတယ်။ ပစ်သွားတာ။ အကုန်လုံးကလန့်ဖြန့်ပြီး ပြေးကြတာပေါ့။ မောင်းပြန်သေနတ်အရှည်နဲ့ ကားပေါ်ကနေပစ်သွားတာ။ လူထိခိုက်တာတော့မရှိဘူး”လို့ ဖြစ်စဉ်အနီးနားမှာ ရှိနေသူတစ်ဦးက ပြောပါတယ်။
Public Service Announcement
စစ်သားတွေဟာ အိမ်စီးကားနဲ့မဟုတ်ပဲ လုံခြုံရေးလှည့်ကင်းကားနဲ့ မူးပြီးရမ်းသမ်းပစ်သွားတာလို့ ဆိုပါတယ်။
ရန်ကုန်မြို့ကို စစ်ခေါင်းဆောင် မင်းအောင်လှိုင် ရောက်ရှိနေလို့ စစ်တပ်က မြို့နေရာအများအပြားမှာ လုံခြုံရေးတင်းကြပ်စွာချထားပါတယ်။
အဲဒီလို လုံခြုံရေးတွေ ချထားတဲ့ကြားက စစ်သားတွေဟာ ပြည်သူတွေအပေါ် ခြောက်လန့် ပစ်ခတ်ခဲ့တာ ဖြစ်ပါတယ်။
စစ်ကောင်စီတပ်သားတွေဟာ အခုလိုမျိုး မူးရမ်းကားပြီးမကြာခဏ သေနတ်တွေနဲ့ ရမ်းသမ်းပစ်ခတ်လေ့ရှိတယ်လို့လည်း ရန်ကုန်မြို့နေသူတွေက ဆိုပါတယ်။
