ဖေဖော်ဝါရီ-၇၊၂၀၂၆။မိုမို/People’s Spring
ရှမ်းပြည်နယ်တောင်ပိုင်း၊ ဖယ်ခုံမြို့နယ်မှာ စစ်တပ်လက်နက်ကြီးကျည် ထိမှန်မှုကြောင့် အရပ်သားတချို့ ထိခိုက်သေဆုံးတယ်လို့ သတင်းရရှိပါတယ်။
ဖေဖော်ဝါရီ ၆ရက် မနက် ၁၁နာရီဝန်းကျင်က ဖယ်ခုံမြို့အနောက်ခြမ်းက လတိန်ကျေးရွာကို လက်နက်ကြီးကျခဲ့တာလို့ ဆိုပါတယ်။
“သေဆုံးသွားသူ ဦးစိုးနဟာ စျာပနပွဲပြုလုပ်ဖို့ဘာမှမရှိလောက်အောင်ကို ဆင်းရဲနွမ်းပါးတဲ့ လက် လုပ်လက်စားရွာခံတစ်ဦးဖြစ်ကြောင်း ရပ်ရွာတာဝန်ရှိသူက အကြောင်းကြားလာပါတယ်”လို့ စစ်ရှောင်အရေးကူညီနေသူတစ်ဦးက ပြောပါတယ်။
Public Service Announcement
ဒါ့အပြင် လက်နက်ကြီးကျည်ပေါက်ကွဲမှုကြောင့် အမျိုးသားတစ်ဦးလည်း ထိခိုက်ဒဏ်ရာ ပြင်းထန် မှုရှိတယ်လို့ သိရပါတယ်။
“လက်နက်ကြီးတွေကို ဖယ်ခုံအခြေစိုက် ခမရ ၃၃၆တပ်က မကြာခဏ ပစ်လေ့ရှိတယ်။အခုက တိုက်ပွဲက ငြိမ်နေတာကြာပြီ။အကြောင်းမဲ့ကို ပစ်တာ”လို့ ရှမ်းပြည်တောင်ပိုင်း သတင်းရင်းမြစ်က ပြောပါတယ်။
ပြီးခဲ့တဲ့ ဇန်နဝါရီကလည်း ဖယ်ခုံမြို့နယ် အနောက်ခြမ်းနဲ့ မိုးဗြဲမြို့ကို စစ်တပ်က လက် နက်ကြီးပစ်ခတ်မှုတွေမှာလည်း သေဆုံးထိခိုက် သူတချို့ရှိခဲ့တယ်လို့ ကရင်နီလူမှုအသင်းအဖွဲ့များကွန်ရက်က ထုတ်ပြန်ထားပါတယ်။
ဖယ်ခုံမြို့နယ်မှာ စစ်တပ်နဲ့ ပအိုဝ်းပြည်သူ့စစ် PNOက မကြာခဏ စစ်ကြောင်းထိုးပြီး နေအိမ်တွေ မီးရှို့ဖျက်ဆီးတာ ရှိပါတယ်။
ဒါကြောင့် ဖယ်ခုံမြို့နယ်က ဒေသခံခြောက်သောင်း ဝန်းကျင်က စစ်ရှောင်နေရပြီး စားနပ်ရိက္ခာနဲ့ ကျန်းမာရေးစောင့်ရှောက်မှုတွေ လိုအပ်နေတယ်လို့ သိရပါတယ်။
