ကိုး​တောင်ဘို့စခန်း စစ်​ကြောင်းထိုးတဲ့ စစ်တပ်စစ်​ကြောင်းကို တော်လှန်​ရေးတပ်​တွေတိုက်လို့ စစ်​ကြောင်းပျက်

ဖေဖော်ဝါရီ-၁၀၊၂၀၂၆။ဇော်ဝင်း/People’s Spring

စစ်ကိုင်းတိုင်း၊ကောလင်းမြို့နယ်မှာ စစ်ကောင်စီ တပ် စစ်ကြောင်းလိုက်​ချေမှုန်းခံရပြီး စစ်သုံ့ပန်း နဲ့ လက်နက်တွေရရှိတယ်လို့ ဒေသခံစစ်ရေးသတင်းရင်းမြစ်တွေက လူထုနွေဦးကို ပြောပါတယ်။

ကောလင်းနဲ့ကန့်ဘလူမြို့နယ်အစပ်က ကာကွယ်ရေးတပ်တွေ သိမ်းပိုက်ခဲ့တဲ့ ကိုးတောင်ဘို့ စခန်းဆီတန်ပြန်ထိုးစစ်ဆင်လာတဲ့ ကောလင်းမြို့နယ်က စစ်တပ် စစ်ကြောင်းကို​ ​တော်လှန်​ရေးတပ်​တွေကဖေ​ဖော်ဝါရီလ ၇ ရက်နေ့မှာ တိုက်ခိုက်ခဲ့တာပါ။

“ မနက်အစောကတည်းကစဖြစ်တာ။ရင်း ၂ တပ်စိတ်ကင်းပေါက်ပြီးရဲဘော်နှစ်ဦးကျတယ်။နောက်တော့ အဲဒီနေ့တနေကုန်တိုက်ပွဲ ဖြစ်ပြီးစစ်တပ် စစ်ကြောင်းအကုန်ပြုတ်သွားတယ်။လက်နက်တွေရော သုံ့ပန်းတွေရော အကုန်လုံးနီးပါးရလိုက်တယ်” လို့ ဖြစ်စဥ်ကို သိရှိတဲ့ ရဲဘော်တစ်ဦးက ပြောပါတယ်။

Public Service Announcement

ကောလင်းမြို့နယ်က အခြားစစ်ရေးသတင်းရင်းမြစ်နှစ်ဦးကလည်း စစ်တပ်စစ်ကြောင်းလိုက် ချေမှုန်းခံရတာနဲ့ပတ်သက်ပြီး လူထုနွေဦးကို အတည်ပြုပါတယ်။

“ အင်အားက ၂၀၀ ကျော်တယ်။ကိုးတောင်ဘို့ ပြန်ရဖို့တိုးလာတာ။အကုန်ရလိုက်တယ်” လို့ကောလင်း မြို့နယ်စစ်ရေးသတင်းရင်းမြစ်က ပြောပါတယ်။

တိုက်ပွဲ ဖြစ်ပွားခဲ့တဲ့ ကျေးရွာ ကိုတော့လုံခြုံရေးအရလတ်တလောမဖော်ပြဖို့သတင်းရင်းမြစ်တွေက တောင်းဆိုပါတယ်။

ဒါ့အပြင် စစ်တပ်စစ်ကြောင်းချေမှုန်းခံရတာနဲ့ပတ် သက်လို့ သက်ဆိုင်ရာစစ်ဒေသက ထုတ်ပြန်ဖို့ရှိတယ်လို့ အသိပေးပါတယ်။

လက်ရှိကောလင်းမြို့နယ်ရဲ့အရှေ့ခြမ်း၊အနောက်ခြမ်း တွေမှာလည်း စစ်တပ်နဲ့ကာကွယ်ရေးတပ်တွေ ကြား နှစ်ဖက်တိုက်ပွဲတွေက ပြင်းထန်နေပြီး နေ့စဥ် လေကြောင်းတိုက်ခိုက်မှုတွေ ရှိနေတယ်လို့ သိရပါတယ်။

ကောလင်းမြို့နယ် အနောက်ပိုင်းက ကျောက်ကာရွာအနီးမှာစစ်တပ်ကတပ်ကြပ်ကြီးတဦးကို​ဖေဖော်ဝါရီလ၇ရက်မနက်ပိုင်းမှာတော်လှန်ရေးအဖွဲ့တွေက ဖမ်းဆီးမိတယ်လို့ ကောလင်းတော် လှန်ရေး( Kawlin Revolution KR) က ထုတ်ပြန်ထားပါတယ်။

ဒါ့အပြင် မြို့နယ်အရှေ့ဘက်ခြမ်းက သစ်ဖုလ စခန်းကုန်းကို ကာကွယ်ရေးတပ်တွေက ပြီးခဲ့တဲ့ နှစ်လဝန်းကျင်က သိမ်းပိုက်ခဲ့တဲ့နောက် ဝန်သို အခြေစိုက် စစ်တပ် တပ်ရင်းတွေနဲ့ ပြန်ပြီး ထိုးစစ်ဆင်နေလို့ ထိတွေ့မှုတွေ ရှိနေပါတယ်။