▪️မြစ်ကြီးနားမှာ လက်နက်ကြီးကျလို့ အရပ်သားထိခိုက်မှုရှိ
ဖေဖော်ဝါရီ ၂၁၊ ၂၀၂၆။ထားမြတ်/People’s Spring
ကချင်ပြည်နယ်၊ ဖားကန့်ဒေသရှိ ကချင်လွတ်လပ်ရေးတပ်မတော်(KIA) တပ်မဟာ(၉) ဌာနချုပ်ကို အာဏာသိမ်းစစ်တပ်က ဒီကနေ့ ဖေဖော်ဝါရီ ၂၁ရက် မနက်ပိုင်းမှာ လေကြောင်း ဗုံးကြဲတိုက်ခိုက်ခဲ့ကြောင်း ကချင်စစ်ရေး သတင်းရင်းမြစ်က ပြောပါတယ်။
ဖေဖော်ဝါရီ ၂၁ရက် မနက် ၉နာရီခွဲကျော် အချိန် မှာ စစ်ကောင်စီတိုက်လေယာဉ်က ဗုံးကြဲတိုက်ခိုက်ခဲ့တာလို့ ဆိုပါတယ်။
Public Service Announcement
တိုက်ခိုက်မှုကြောင့် အထိအခိုက်မရှိဘူးလို့ စစ်ရေး သတင်းရင်းမြစ်က ပြောပါတယ်။
စစ်ကောင်စီက ကချင်ဒေသကို လေကြောင်း စစ်ဆင်ရေးတွေ ပိုလုပ်လာနိုင်လို့ ပြည်သူတွေ ပိုသတိထားဖို့ လိုအပ်တယ်လို့လည်း သတင်းရင်းမြစ်က ပြောပါတယ်။
ဒါ့အပြင် မနေ့ညပိုင်းက မြစ်ကြီးနားမြို့ပေါ် ရပ်ကွက်အချို့ စစ်တပ်ပစ်ခတ်တဲ့ လက်နက်ကြီးကြောင့် အရပ်သား ၃ဦး ဒဏ်ရာရခဲ့တယ်လို့လည်း ပြောပြပါတယ်။
မနေ့ည ဖေဖော်ဝါရီ ၂၀ရက် ည ၈နာရီခွဲလောက် မှာ မြစ်ကြီးနားလေဆိပ်မှာ ဒရုန်းနဲ့ တိုက်ခိုက်ခံရလို့ ခရီးသည်တင်လေယာဉ် ပျက်စီးမှု အချို့ရှိခဲ့ပါတယ်။ လူထိခိုက်သေဆုံးတာတော့ မရှိပါဘူး။
အဲဒီတိုက်ခိုက်မှုကို KIA နဲ့ PDFက လုပ်ဆောင်ခဲ့တာလို့ စစ်ကောင်စီက ဝါဒဖြန့်ကာ ပြင်းထန်စွာ တုန့်ပြန်မယ်လို့ အသိပေးထားပေမယ့် ကချင်စစ်ရေး သတင်းရင်းမြစ်တွေနဲ့ KIA သတင်းရင်းမြစ်အချို့က KIA/PDF အနေနဲ့ အရပ်သားပြည်သူ စီးတဲ့ လေယာဉ်ကို တိုက်ခိုက်မှာ မဟုတ်ဘဲ စစ်တပ်က ကိုယ်တိုင်ဖန်တီးပြီး KIA/PDF အပေါ် အထင်အမြင်မှားအောင် လုပ်ဆောင်တာလို့ တုံ့ပြန်ပါတယ်။
စစ်ကောင်စီဟာ မနေ့ညပိုင်းကလည်း KIO/KIA ဌာနချုပ် လိုင်ဇာမြို့ပေါ် လေယာဉ်ပြန်ဝဲပြီး မြို့ မြောက်ဘက် တောင်ကုန်းက KIA တပ်စခန်းကို လေကြောင်း ဗုံးကြဲတိုက်ခိုက်ခဲ့တယ်လို့ စစ်ရေး သတင်းရင်းမြစ်အချို့က ပြောပါတယ်။
