ဖေဖော်ဝါရီ-၂၅၊၂၀၂၆။နေ့သစ်/People’s Spring
နေပြည်တော် ပျဉ်းမနားမြို့နယ်က အာဟာရသုခဈေးမှာ မီးလောင်မှုဖြစ်နေပြီး ၁နာရီကျော်ကြာတဲ့အထိမီးငြှိမ်းသတ်နေရဆဲဖြစ်တယ်လို့ ဒေသခံတွေက ပြောပါတယ်။
ဖေဖော်ဝါရီ ၂၅ ရက်ည ၈နာရီခွဲကျော်မှာ မီးလောင်မှုစတင်ခဲ့တာဖြစ်ပြီး လက်ရှိအချိန်အထိ ၁၀နာရီခန့်အချိန်ထိ မီးငြှိမ်းသတ်နေရဆဲဖြစ်တယ်လို့ ဒေသခံတစ်ဦးကပြောပါတယ်။
“မီးမငြိမ်းသေးပါဘူး။ လောင်တာများတယ်။ အလယ်ကြောကုန်ပြီ” လို့ ဒေသခံတစ်ဦးက ည ၉နာရီ ၄၀ မှာ လူထုနွေဦးရဲ့ မေးမြန်းမှုကိုပြောပါတယ်။
Public Service Announcement
ဆန်ဆိုင်၊ ကုန်စုံဆိုင် ၊ အလှကုန်ဆိုင် ၊ ပဲကြော်ဆိုင် ၊အဝတ်အထည်ဆိုင်တွေ မီးလောင်သွားတယ်လို့ ဆိုပါတယ်။
မီးသတ်တပ်ဖွဲ့ကတော့ ဒီမီးလောင်မှုကို Level 2 အဆင့်မီးငြှိမ်းသတ်ယာဉ်တွေနဲ့ ငြှိမ်းသတ်နေပြီး ည ၉နာရီခွဲမှာ မီးငြိမ်းတယ်လို့ ထုတ်ပြန်ထားပါတယ်။
“မီးက ၈ နာရီခွဲကျော်ထဲက လောင်တာ တစ်နာရီလောက်ကြာတယ်။ မီးက တော်တော်များတယ်။ ပျဉ်းမနားဘူတာဘက်ကလူတွေတောင် မီးခိုးလုံးတွေကို မြင်ရတယ်။ စျေးရုံထဲ ဆိုင်ခန်းတွေက ကပ်နေတာဆိုတော့ အကုန်မီးကူးပြီး လောင်ကုန်တာပါ။ အလယ်တန်းဆိုင်ခန်းတစ်ခုက စလောင်တယ်လို့ သိရပါတယ်” လို့ ပျဉ်းမနားမြို့ခံတစ်ဦးက ပြောပါတယ်။
အာဟာရသုခဈေး မီးလောင်မှုမှာ လူထိခိုက်မှု မရှိသော်လည်း စျေးရုံအလယ်တန်း ဆိုင်ခန်းအများစု မီးလောင်ပြာကျခဲ့ပြီး ပစ္စည်းတွေပျက်ဆီးဆုံးရှုံးမှု များပြားနိုင်ကြောင်း မျက်မြင်တွေ့ရှိခဲ့သူ ပြည်သူတစ်ဦးက ပြောပါတယ်။
အာဟာရသုခဈေးဟာ ကင်မွန်းတန်းကျေးရွာမှာရှ်ိပြီး ပျဉ်းမနားမြို့နယ်ရဲ့ အဓိက ဈေးကြီးဖြစ်ပါတယ်။ ဂိုထောင်တွေအများဆုံးရှ်ိပြီး ဒီနေ့ည မီးလောင်မှုမှာ ဆုံးရှုံးပျက်စီးမှုအသေးစိတ်ကို မသိရသေးပါဘူး။
ယမန်နေ့ (ဖေဖော်ဝါရီ ၂၄)ကလည်း ရန်ကုန်မြို့ လှိုင်သာယာမြို့နယ် စက်မှုဇုန်အပိုင်း (၅)၊ ဗညားဒလလမ်းရှိ ဖွဲစက်ရုံ နဲ့ မကွေးတိုင်းဒေသကြီး ဆိပ်ဖြူမြို့နယ်၊ ဆိပ်ဖြူ- ကန်ဇွန်းမ လမ်းဘေး၊ ဖူးသိမ့်ဆီဆိုင်တို့မှာ မီးလောင်မှုဖြစ်ပွားခဲ့ပါတယ်။
