ဖေဖော်ဝါရီ-၂၈၊ ၂၀၂၆ ဇေအောင်/People’s Spring
တိုက်ခိုက်ခံရပြီးနောက်ခေတ္တပိတ်ထားရတဲ့ ကံတလူဂိတ် ပြန်ဖွင့်နေလို့ လင်းယုန်ညီနောင်အဖွဲ့က ဒရုန်းနဲ့ ထပ်မံတိုက်ခိုက်ခဲ့ပါတယ်။
ပြီးခဲ့တဲ့ ဇန်နဝါရီ ၁၅ ရက်က စစ်ကိုင်းမြို့နယ်၊ ကံတလူမြို့တိုးဂိတ်က စစ်ကောင်စီစစ်ဆေးရေးဂိတ်ကို လင်းယုန်ညီနောင်ပြောက်ကျားတပ်ဖွဲ့က ဝင်ရောက်တိုက်ခိုက် သိမ်းပိုက်ခဲ့ပြီး ဂိတ်ကိုဖောက်ခွဲဖျက်ဆီးခဲ့ပါတယ်။
အဲဒီအချိန်ကစပြီး စစ်ဆေးရေးဂိတ်ဟာ တစ်လကျော် ရပ်တန့်သွားခဲ့ကြောင်း၊ စစ်အုပ်စုက ကံတလူတိုးဂိတ်တာဝန်ရှိသူတွေနဲ့ပြန်ညှိပြီး ယခုအခါ ဂိတ်ပြန်ဖွင့်နေလို့ ပြီးခဲ့တဲ့ ဖေဖော်ဝါရီ ၂၅ ရက် ညနေ ၄နာရီခွဲခန့်က ၄၀ မမ ဗုံးသီးတွေ၊ ဒရုန်းတွေနဲ့ဗုံးသီးတွေချကာ ထပ်မံတိုက်ခိုက်ခဲ့ကြောင်း လင်းယုန်ညီနောင် ပြောက်ကျားတပ်ဖွဲ့ရဲ့ တာဝန်ရှိသူက ပြောပါတယ်။
Public Service Announcement
“လွန်ခဲ့တဲ့ ၅ ရက် ဝန်းကျင်လောက်ကမှ ပြန်ပြီး ဂိတ်ဖွင့်တာ။ အခုလောလောဆယ်တော့ ဂိတ်က ဆက်ကြေး မကောက်ဘူး။ ဒုတိယအကြိမ် တိုက်ပြီးတဲ့နေ့မှာခွေးက အင်အား ၃၀၀ဝန်းကျင် သုံးပြီးကို နေရာယူထားတာ။ အခုလည်း ကင်းပုန်းတွေနဲ့ ခွေးတွေကင်းယူထားဝာာတွေ ရှိတယ်”လို့ ၎င်းတာဝန်ရှိသူက ပြောပါတယ်။
တိုက်ခိုက်တဲ့ ဗုံးသီးတွေဟာ စစ်အုပ်စုဝင်တွေ လုံခြုံရေးယူထားတဲ့ ဘန်ကာအနီးကို ကျရောက် ပေါက်ကွဲခဲ့ပြီး ဒရုန်းနဲ့ချတဲ့ ဗုံးသီးကတော့ စစ်အုပ်စု လက်အောက်ခံ ရွှေတောင်ရုံးဝင်းအတွင်းကျရောက်ပေါက်ကွဲခဲ့ကြောင်း သိရပါတယ်။
အဲဒီတိုက်ခိုက်မှုကြောင့် စစ်အုပ်စုထိခိုက်မှုရှိနိုင်တယ်လို့ လင်းယုန်ညီနောင် ပြောက်ကျားတပ်ဖွဲ့က ဆိုပါတယ်။
ကံတလူတိုးဂိတ်ဟာ စစ်ကိုင်းတိုင်းအထက်ပိုင်း၊ မကွေးတိုင်းနဲ့ ကချင်ပြည်နယ်သွားတဲ့ခရီးသွားတွေ အများဆုံးဖြတ်သန်းနေတဲ့ဂိတ်ဖြစ်ပြီး စစ်အုပ်စုက မကြာခဏ ဖမ်းဆီးငွေညှစ်လေ့ရှိကြောင်း ဒေသခံတွေက ပြောပါတယ်။
