မြန်မာ၊ လာအိုကလွဲလို့ တခြားနိုင်ငံတွေဆီ လောင်စာတင်ပို့မှုကို ထိုင်းပိတ်ပင်

မတ်-၇၊၂၀၂၆။People’s Spring

အိမ်နီးချင်းလာအိုနဲ့ မြန်မာတို့ကလွဲလို့ လောင်စာဆီ ပြည်ပတင်ပို့ခွင့် အားလုံးကို ထိုင်းအစိုးရက ပိတ်ပင်လိုက်ပါတယ်။

အီရန်စစ်ပွဲကို အကြောင်းပြုပြီး နိုင်ငံတကာ ရေနံနဲ့ လောင်စာ တင်ပို့မှု လမ်းကြောင်းတွေမှာ အကြီးအကျယ် ရှုပ်ထွေးမှုတွဖြစ်ပေါ်နေတဲ့နောက် ထိုင်းဝန်ကြီးချုပ် အနူတင် ချန်ဝီယာကူက မတ်လ ၆ ရက်နေ့မှာ အခု အမိန့်ကို ထုတ်ပြန်ခဲ့တာ ဖြစ်ပါတယ်။

မြန်မာနဲ့ လာအိုတို့ကလွဲရင် တခြားနိုင်ငံတွေဆီ လောင်စာဆီ အမျိုးမျိုးနဲ့ သဘာဝဓာတ်ငွေ့ရည် (LNG) တင်ပို့မှုတွေအားလုံးကို ယာယီဆိုင်းငံ့ထားစေမယ်လို့ ဝန်ကြီးချုပ်ရဲ့ အမိန့်ကြော်ငြာစာအမှတ် ၂/၂၀၂၆ မှာ ပါရှိခဲ့ပါတယ်။

Public Service Announcement

မတ်လ ၁ ရက်နေ့ ကတည်းက ထိုင်းဟာ လောင်စာဆီ တင်ပို့မှုတွေ အားလုံးကို ရပ်ဆိုင်းမယ်ဆိုတဲ့ သတင်းတွေ ထွက်ပေါ်ခဲ့ပြီး နောက်ပိုင်းမှာတော့ ဘယ်လိုပိတ်ပင်အမိန့်မှမထုတ်ပြန်ရသေးကြောင်း အာဏာပိုင်တွေက ငြင်းဆိုခဲ့ပါတယ်။ မတ်လ ၆ ရက်နေ့မှာတော့ဝန်ကြီးချုပ်ဆီကအမိန့်က တရားဝင် ထွက်ပေါ်လာတာပါ။

ထိုင်းက ပြည်ပတင်ပို့ခွင့် တားမြစ်ထားတဲ့ လောင်စာဆီတွေထဲမှာ ဓာတ်ဆီ၊ လောင်စာဆီ၊ A1 အဆင့် လေယာဉ်ဆီနဲ့ ဓာတ်ငွေ့တွေ ပါဝင်ပါတယ်။ နောက်ထပ် ကြေညာချက်တစ်ခု ထွက်ပေါ်လာမချင်း အဲဒီ တားမြစ်မိန့်က အသက်ဝင်နေမယ်လို့လည်း ထိုင်းအစိုးရက ဆိုပါတယ်။

ဒီလိုဆုံးဖြတ်လိုက်တာဟာလက်ရှိကမ္ဘာ့အရေးအခင်းတွေကြောင့်ပြည်တွင်းမှာလောင်စာပြတ်လပ်သွားမှာကို တားဆီးဖို့ ရည်ရွယ်ဆောင်ရွယ်ခြင်း ဖြစ်တယ်လို့လည်း သိရပါတယ်။

စစ်ပွဲကြောင့် အီရန်ကဟောမုဇ်ရေလက်ကြားကို ပိတ်ပစ်လိုက်ခြင်းကထိုင်းနိုင်ငံရဲ့လောင်စာထောက်ပံ့နိုင်စွမ်းကို အနှောင့်အယှက်တွေ၊မရေရာမှုတွေဖြစ်လာစေနိုင်တယ်လို့လည်းထိုင်းအာဏာပိုင်တွေက သတိပေးထားပါတယ်။ ဟောမုဇ်ဟာ အရှေ့အလယ်ပိုင်း နိုင်ငံတွေရဲ့ ရေနံတွေကို ကမ္ဘာ့အရှေ့ခြမ်းဆီ ရေလမ်းကနေ ပို့ဆောင်ရာမှာ အဓိကအကျဆုံးရေလမ်းကြောင်းတစ်ခုဖြစ်ပါတယ်။

ကိုးကား- Khaosod