မတ်-၁၃၊ ၂၀၂၆။ ထားမြတ်/People’s Spring
တနင်္သာရီတိုင်း၊ သရက်ချောင်းမြို့နယ် အခြေစိုက် ဝင်း၀ စစ်ကောင်စီတပ်စခန်းသိမ်းတိုက်ပွဲမှာ စစ်ကောင်စီတပ်ဖွဲ့ဝင် ၅၀ ကျော် သေဆုံးခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၄) သတင်းရင်းမြစ်က ပြောပါတယ်။
ဝင်း၀တပ်စခန်းဟာ ကရင်အမျိုးသားအစည်းအရုံး(KNU) အုပ်ချုပ်နယ်မြေသတ်မှတ်ချက်အရ မြိတ်ထားဝယ်ခရိုင် ကစယ်ဒို(သရက်ချောင်းဒေသ)မြို့နယ်အတွင်း အမှတ်(၈) လမ်းမမင်းဒပ်ကျေးရွာမှာ တည်ရှိတာပါ။
ဝင်း၀ တပ်စခန်းသိမ်းတိုက်ပွဲကို KNLAနဲ့ ပြည်သူ့ကာကွယ်ရေးတပ်မတော်(PDF) ပူးပေါင်းတပ်က ဖေဖော်ဝါရီ ပထမပတ်မှာ စတင်ခဲ့တာဖြစ်ပြိး တိုက်ပွဲ တလကျော်အကြာ မတ်လ ၁၁ရက်ညနေပိုင်းမှာ အပြီး သတ် သိမ်းပိုက်နိုင်ခဲ့တာပါ။
Public Service Announcement
” အခုက ထွက်ပြေးနေတဲ့ စကစတွေကို လိုက်ပြီး ရှင်းလင်းနေတယ်။ ပြေးသွားတာ အယောက် ၆၀ ကျော်၊ ဖမ်းမိတာမရှိဘူး အကုန်လုံးပဲ သေဆုံး။ သေဆုံးတာ အယောက် ၅၀ ကျော်တယ်”လို့ တပ်မဟာ(၄) သတင်းရင်းမြစ်က ပြောပါတယ်။
ဝင်း၀စခန်း သိမ်းပိုက်နိုင်မှုကို KNU မြိတ်ထားဝယ်ခရိုင်က မတ်လ ၁၂ရက်မှာ ထုတ်ပြန်ခဲ့ရာ စခန်းသိမ်းတိုက်ပွဲ ဓာတ်ပုံဖော်ပြချက်အရ စစ်ကောင်စီထံမှ လက်နက်မျိုးစုံ အလက် ၄၀ ကျော် ၅၀လက်နီးပါး သိမ်းရခဲ့တာ တွေ့ရပါတယ်။
စစ်ကောင်စီအနေနဲ့လည်း ဝင်း၀ စခန်းမကျဖို့ လေကြောင်း ပစ်ကူပေးတိုက်ခိုက်မှုတွေ တောက်လျှောက်လုပ်ဆောင်ခဲ့သလို မြေပြင်ကလည်း စစ်အင်အားဖြည့်တင်းတာတွေ လုပ်ဆောင်ပေမယ့် မအောင်မြင်ခဲ့ပါဘူး။
ဝင်း၀တပ်စခန်းသိမ်းတိုက်ပွဲကို ကရင်လွတ်မြောက်ရေးတပ်မတော် ဗျူဟာအမှတ်(၂)ဦးဆောင်မှုဖြင့် K.N.LA တပ်မဟာ(၄) တပ်ရင်း(၁၂)၊ တပ်မဟာ (၆) တပ်ရင်း(၂၇)၊ တပ်မဟာ(၄)အထူးကွန်မိုတော်တပ်ဖွဲ၊ ဗျူဟာ(၃၃) လက်အောက်ခံ T(5)တပ်ရင်း နဲ့ တော်လှန်းရေးပူးပေါင်းတပ်ဖွဲများ ပူးပေါင်းဆောင်ရွက်ခဲ့တာပါ။
ဝင်း၀တပ်စခန်းသိမ်းတိုက်ပွဲမှာ စစ်ကောင်စီတပ်ဘက်က သေဆုံးထိခိုက်များပြားသလို KNLAတပ်မဟာ(၄) ပူးပေါင်းတပ်ဘက်ကလည်း ကျဆုံးထိခိုက်ရှိခဲ့ပါတယ်။
